TUMAN HOKIMI S.YOʻLDAShEV OLMAZOR MAHALLASI YoShLARI BILAN UChRAShDI

Soʻnggi yillarda davlat idoralari bilan xalq oʻrtasidagi byurokratik toʻsiqlarga barham berilib, rahbarlarning xalq, ayniqsa, yoshlar bilan ochiq muloqotlari, dildan suhbat tarzidagi uchrashuvlari doimiy anʼanaga aylandi. Bu esa rahbarlar uchun xalq hayotiga oid muammolarni joyiga chiqib, batafsil oʻrganish va oʻz vaqtida zarur choralar koʻrish imkonini bermoqda.

Amudaryo tumanida ham “Hokim va yoshlar”, “Hokim xalq bilan muloqotda”, “Sektor rahbarlari muammolarni oʻrganadi”, “Xalq qabulxonasi – xalq xizmatida” mavzularida doimiy ravishda oʻtkazilayotgan ochiq muloqot koʻrinishidagi tadbirlarda aholining barcha qatlamlarini qamrab olinishiga erishilmoqda.

28-dekabr kuni Mangʻit shahrining Olmazor mahallasi hududidagi 82-sonli umumtaʼlim maktabida boʻlib oʻtgan “Hokim va yoshlar” uchrashuvida ham hudud yoshlari hayotiga doir yechimini kutayotgan muammolar oʻrganilib, yoshlar bilan samimiy muloqot tashkil etildi.

Uchrashuvda Amudaryo tumani hokimi Sultonboy Yoʻldashev, Xalq qabulxonasi mudiri Erkin Rajabov, hokim oʻrinbosari Mahmud Shermetov, shuningdek, Olmazor mahallasi hududida istiqomat qiluvchi 30 nafardan ziyod yoshlar ishtirok etdilar.

“Hokim va yoshlar” uchrashuvida tuman hokimi Sultonboy Yoʻldashev mamlakatimizda, shu jumladan tumanimizda yoshlarning bilim olish, kasb-hunar oʻrganishlari, shuningdek, ularning ish bilan bandligini taʼminlash, tadbirkorlik faoliyatlarini yoʻlga qoʻyishlari uchun yaratilayotgan sharoitlar, keng imkoniyatlar haqida batafsil toʻxtalib, yoshlarning ijtimoiy-maʼnaviy, iqtisodiy va madaniy hayotini tubdan yaxshilashga qaratilayotgan eʼtibor va bu borada tumanda amalga oshirilayotgan keng koʻlamli ishlarda yoshlarning ishtiroki xususida soʻz yuritdi.

Uchrashuv davomida hudud yoshlarining murojaatlari ham tinglandi. Xususan, yoshlarning muqobil harbiy xizmat davri uchun shartnoma badallarini toʻlashda yordam berish toʻgʻrisidagi, eshitishda muammolari bor boʻlgan fuqaroning eshitish moslamasi olishda qiynalayotgani, oʻzini oʻzi band qilish tamoyili asosida tikuvchilik yoʻnalishida faoliyatini boshlashda qiynalayotgan fuqaroning tikuv mashinasi xarid qilish uchun subsidiya ajratish haqidagi va ijtimoiy himoyaga muhtoj yana bir oilaning farzandini oʻqitishda qiynalayotgani, oʻqish uchun shartnoma pulini toʻlashda yordam soʻrab qilgan murojaatlari bilan hokim va masʼullar batafsil tanishdilar.

Aksariyat murojaatlar joyida hal etildi. Ayrimlari tegishli tashkilotlar, xususan, bank va aholi bandligini taʼminlash, sogʻlikni saqlash boʻyicha hududiy tibbiyot muassasalari tomonidan ijobiy hal etilishi uchun zarur chora-tadbirlar belgilanib, topshiriqlar berildi.

Shuningdek, uchrashuvda Amudaryo tuman Xalq qabulxonasi mudiri Erkin Rajabov yoshlar hayotiga oid muammolar yechimini topish va bu muammolarni tizimli ravishda hal etish bugungi kunda har bir rahbar xodimning zimmasidagi yuksak masʼuliyatli burchi ekanligini taʼkidlab, bu borada Amudaryo tumani hokimi Sultonboy Yoʻldashevning shaxsiy tashabbusi bilan amalga oshirilayotgan keng qamrovli ishlar haqida soʻz yuritdi.

“Hokim va yoshlar” uchrashuvi har qanday byurokratik toʻsiqlardan xoli, oshkora va samimiy muloqot muhitida oʻtganligi bilan muhim ahamiyat kasb etdi.

Robiya YOʻLDOShEVA.