ТУМАН ҲОКИМИ С.ЙЎЛДАШЕВ ОЛМАЗОР МАҲАЛЛАСИ ЁШЛАРИ БИЛАН УЧРАШДИ

Сўнгги йилларда давлат идоралари билан халқ ўртасидаги бюрократик тўсиқларга барҳам берилиб, раҳбарларнинг халқ, айниқса, ёшлар билан очиқ мулоқотлари, дилдан суҳбат тарзидаги учрашувлари доимий анъанага айланди. Бу эса раҳбарлар учун халқ ҳаётига оид муаммоларни жойига чиқиб, батафсил ўрганиш ва ўз вақтида зарур чоралар кўриш имконини бермоқда.

Амударё туманида ҳам “Ҳоким ва ёшлар”, “Ҳоким халқ билан мулоқотда”, “Сектор раҳбарлари муаммоларни ўрганади”, “Халқ қабулхонаси – халқ хизматида” мавзуларида доимий равишда ўтказилаётган очиқ мулоқот кўринишидаги тадбирларда аҳолининг барча қатламларини қамраб олинишига эришилмоқда.

28 декабрь куни Манғит шаҳрининг Олмазор маҳалласи ҳудудидаги 82-сонли умумтаълим мактабида бўлиб ўтган “Ҳоким ва ёшлар” учрашувида ҳам ҳудуд ёшлари ҳаётига доир ечимини кутаётган муаммолар ўрганилиб, ёшлар билан самимий мулоқот ташкил этилди.

Учрашувда Амударё тумани ҳокими Султонбой Йўлдашев, Халқ қабулхонаси мудири Эркин Ражабов, ҳоким ўринбосари Маҳмуд Шерметов, шунингдек, Олмазор маҳалласи ҳудудида истиқомат қилувчи 30 нафардан зиёд ёшлар иштирок этдилар.

“Ҳоким ва ёшлар” учрашувида туман ҳокими Султонбой Йўлдашев мамлакатимизда, шу жумладан туманимизда ёшларнинг билим олиш, касб-ҳунар ўрганишлари, шунингдек, уларнинг иш билан бандлигини таъминлаш, тадбиркорлик фаолиятларини йўлга қўйишлари учун яратилаётган шароитлар, кенг имкониятлар ҳақида батафсил тўхталиб, ёшларнинг ижтимоий-маънавий, иқтисодий ва маданий ҳаётини тубдан яхшилашга қаратилаётган эътибор ва бу борада туманда амалга оширилаётган кенг кўламли ишларда ёшларнинг иштироки хусусида сўз юритди.

Учрашув давомида ҳудуд ёшларининг мурожаатлари ҳам тингланди. Хусусан, ёшларнинг муқобил ҳарбий хизмат даври учун шартнома бадалларини тўлашда ёрдам бериш тўғрисидаги, эшитишда муаммолари бор бўлган фуқаронинг эшитиш мосламаси олишда қийналаётгани, ўзини ўзи банд қилиш тамойили асосида тикувчилик йўналишида фаолиятини бошлашда қийналаётган фуқаронинг тикув машинаси харид қилиш учун субсидия ажратиш ҳақидаги ва ижтимоий ҳимояга муҳтож яна бир оиланинг фарзандини ўқитишда қийналаётгани, ўқиш учун шартнома пулини тўлашда ёрдам сўраб қилган мурожаатлари билан ҳоким ва масъуллар батафсил танишдилар.

Аксарият мурожаатлар жойида ҳал этилди. Айримлари тегишли ташкилотлар, хусусан, банк ва аҳоли бандлигини таъминлаш, соғликни сақлаш бўйича ҳудудий тиббиёт муассасалари томонидан ижобий ҳал этилиши учун зарур чора-тадбирлар белгиланиб, топшириқлар берилди.

Шунингдек, учрашувда Амударё туман Халқ қабулхонаси мудири Эркин Ражабов ёшлар ҳаётига оид муаммолар ечимини топиш ва бу муаммоларни тизимли равишда ҳал этиш бугунги кунда ҳар бир раҳбар ходимнинг зиммасидаги юксак масъулиятли бурчи эканлигини таъкидлаб, бу борада Амударё тумани ҳокими Султонбой Йўлдашевнинг шахсий ташаббуси билан амалга оширилаётган кенг қамровли ишлар ҳақида сўз юритди.

“Ҳоким ва ёшлар” учрашуви ҳар қандай бюрократик тўсиқлардан холи, ошкора ва самимий мулоқот муҳитида ўтганлиги билан муҳим аҳамият касб этди.

Робия ЙЎЛДОШЕВА.