VAKILLAR YIGʻILIShI OʻTKAZILDI

Mamlakatimizda fuqarolarning oʻzini oʻzi boshqarish instituti – mahalla faoliyatining tashkiliy asoslarini yanada takomillashtirish, uning vazifalari koʻlamini kengaytirish borasida salmoqli ishlar amalga oshirilmoqda.

Bugun mahalla ilgari davlat hokimiyati vakolatida boʻlgan 30 dan ortiq vazifalarni bevosita amalga oshirib, bosqichma-bosqich faoliyat koʻlamini kengaytirib bormoqda. Soʻnggi ikki yil ichida ushbu tizimga doir koʻplab qonun hujjatlarining qabul qilinishi natijasida uning tashkiliy-huquqiy asoslari yanada takomillashib, vazifalari koʻlami ham kengaydi.

Xususan, Oʻzbekiston Respublikasining 2013-yil 22-aprelda qabul qilingan "Fuqarolarning oʻzini oʻzi boshqarish organlari toʻgʻrisida”gi yangi tahrirdagi Qonunining 11-moddasiga muvofiq shaharcha, qishloq, ovul va mahalla fuqarolar yigʻinlari yilning har choragida viloyat, tuman va shahar ijro etuvchi hokimiyat organlari rahbarlarining fuqarolar yigʻinlari faoliyati sohasiga kiruvchi masalalar yuzasidan hisobotini eshitishi belgilab qoʻyilgan.

2014-yil 26-dekabr kuni "Choykoʻl” ovulidagi madaniyat va aholi dam olish markazi binosida tuman hokimining fuqarolar yigʻinlari faoliyati sohasiga kiruvchi masalalar yuzasidan hisoboti boʻyicha "Choykoʻl” ovuli fuqarolar vakillari yigʻilishi boʻlib oʻtdi.

"Choykoʻl” OFY raisi R.Yuldashev raislik qilgan mazkur yigʻilishga jami 70 nafar fuqarolar vakillaridan 68 nafari qatnashdi. Shuningdek, yigʻilishda "Choykoʻl” ovul va "Bosuv” mahalla fuqarolar yigʻinlari masʼul xodimlari, fuqarolar yigʻini asosiy faoliyat yoʻnalishlari boʻyicha komissiyalar aʼzolari, taftish komissiyasi aʼzolari, fuqarolik jamiyati shakllanishini monitoring qilish mustaqil instituti Qoraqalpogʻiston Respublikasi boʻlimi vakili, tuman hokimligi, tumandagi muassasa, korxona va tashkilotlar vakillari hamda ommaviy axborot vositalari vakillari qatnashdilar.

Yigʻilish kun tartibiga "Fuqarolar yigʻinlari faoliyati sohasiga kiruvchi masalalar yuzasidan tuman hokimi R.Yoʻldoshevning hisoboti toʻgʻrisida”gi masala havola qilindi.

Yigʻilishni oʻtkazishdan asosiy maqsad – Oʻzbekiston Respublikasining "Fuqarolarning oʻzini oʻzi boshqarish organlari toʻgʻrisida”gi Qonunining 11-moddasida belgilangan fuqarolar yigʻinining vakolatlariga kiruvchi masalalar, jumladan har chorakda Qoraqalpogʻiston Respublikasi, viloyatlar, Toshkent shahar, tumanlar va shaharlar ijro etuvchi hokimiyat organlari rahbarlarining fuqarolar yigʻinlari faoliyati sohasiga kiruvchi masalalar yuzasidan hisobotlarini eshitish amaliyotini keng joriy qilish hamda Vazirlar Mahkamasining 2014-yil 22-fevraldagi 37-sonli bayoni bilan tasdiqlangan "Oʻzbekiston Respublikasida 2014-yilda fuqarolarning oʻzini oʻzi boshqarish organlari faoliyatining samaradorligini yanada oshirishga qaratilgan qoʻshimcha chora-tadbirlari toʻgʻrisida”gi Dasturning 17-bandi ijrosini taʼminlashdir.

Yigʻilishda tuman hokimi Rajabboy Yoʻldoshev kun tartibidagi masala boʻyicha hamda 2014-yil davomida tumanda amalga oshirilgan ishlar yuzasidan hisobot berdi.

Hisobotda tumanni ijtimoiy-iqtisodiy rivojlantirish borasida amalga oshirilgan ishlar va kelgusidagi rejalar xususida batafsil toʻxtalib oʻtildi.

Yigʻilishda soʻzga chiqqan Choykoʻl ovul fuqarolar yigʻini vakillari tuman hokimining hisobotini qoʻllab-quvvatladi, tuman hokimiga savollar, takliflar bilan murojaat qildilar hamda fikr-mulohazalarini bayon etdilar.

Bu kabi uchrashuv mahalliy darajadagi muammolarga oʻz vaqtida yechim topishga, jamoatchilik nazorati amalga oshirilishiga, davlat hokimiyati va boshqaruvi organlari faoliyatining ochiqligini taʼminlashga, fuqarolarning davlat va jamiyat ishlarini boshqarishda faol ishtirok etishiga hamda davlat organlari, nodavlat notijorat tashkilotlari va fuqarolarning oʻzini oʻzi boshqarish organlari oʻrtasidagi ijtimoiy sheriklik munosabatlarini mustahkamlashga xizmat qiladi.

Yigʻilish yakunida kun tartibidagi masala boʻyicha vakillar yigʻilishining qarori qabul qilindi.

Tuman hokimligi

axborot xizmati.