Atoqli davlat va jamoat arbobi, Oʻzbekiston Qahramoni Musa Tajetdinovich Yerniyazovning xotira kechasi boʻlib oʻtdi

Shu yilning 5-dekabr kuni Oʻzbekiston Respublikasi Vazirlar mahkamasining “Atoqli davlat va jamoat arbobi, Oʻzbekiston Qahramoni Musa Tajetdinovich Yerniyazovning 75-yilligini keng tarzda nishonlash toʻgʻrisida”gi qarori qabul qilingan edi. Qarorga muvofiq 19-dekabr kuni Amudaryo tumani Madaniyat boʻlimi binosida xotira kechasi boʻlib oʻtdi.

“Atoqli davlat va jamoat arbobi, Oʻzbekiston Qahramoni Musa Tajetdinovich Yerniyazovning mehnat yoʻli – ibrat maktabi” nomli xotira kechasida tuman hokimi oʻrinbosari Mahmud Shermetov, fuqarolar yigʻinlari raislari, nuroniylar, keng jamoatchilik vakillari ishtirok etishdi. Tadbir avvalida ustoz sanʼatkorlar tomonidan mumtoz navolar ijro etildi.

Xotira kechasida Musa Tajetdinovich Yerniyazovning porloq xotirasiga bagʻishlab “Oʻzbekkino” milliy agentligi buyurtmasi asosida “Qoraqalpoqfilm” kinostudiyasi tomonidan suratga olingan hujjatli film namoyish etildi.

Stsenariy muallifi Kenesbay Karimov marhumning umri davomida uchragan toʻsiq va qiyinchiliklarga qaramasdan qoraqalpoq xalqi uchun chin dildan fidokorona xizmat qilganligini uning zamondoshlari, hamkasblari, yaqinlarining xotiralari, samimiy fikrlari orqali toʻliq gavdalantirib bergan.

Xotira kechasida tuman hokimi oʻrinbosari Mahmud Shermetov Musa Yerniyazovning 18-yil davomida Qoraqalpogʻiston Respublikasi Joʻqorgʻi Kengesi raisi lavozimida faoliyat yuritib, Qoraqalpogʻiston Respublikasining gullab-yashnashi yoʻlida bor kuch, bilim va gʻayratini safarbar qilganligini, har bir sohada erishilgan salmoqli yutuqlarni qoraqalpoq xalqi Musa Yerniyazovning nomi va faoliyati bilan bogʻlashini aytib oʻtdi.

Musa Yerniyazovning amudaryoliklar uchun chindan ham qadrli el oqsoqoli boʻlganligi, uning tumanga boʻlgan tashrifi davomida aholining turmush sharoitini yanada yaxshilash, iqtisodiy va ijtimoiy sohani rivojlantirish boʻyicha bildirgan taklif va tavsiyalari ijrosi bugungi kunda oʻzining ijobiy samarasini berib kelayotganligi taʼkidlandi.

Darhaqiqat, uning davrida Qoraqalpogʻistonda boshqa sohalardan orqada qolayotgan qishloq xoʻjaligi sohasi gurkirab rivojlandi. Yurtimiz yirik sanoat markaziga aylandi. Katta zavod va fabrikalarning ishga tushirilishi, investitsiyalarning kirib kelishi sababli ochilgan yer osti va yer usti boyliklari bugungi kunda xalqimizning turmushi farovonligiga xizmat qilib kelmoqda.

Xotira kechasida “Nuroniylar” jamoatchilik Kengashi raisi oʻrinbosari Bekman Allaberganov Muhtaram Prezidentimizning boshlab bergan odilona siyosatini Musa Yerniyazov munosib davom qildirganini eʼtirof etib oʻtdi.

U oʻz nutqida Orolning chekinishi oqibatida yuzaga kelgan ekologik muammolarning oldini olish, Ustyurt, Moʻynoqning turmushini yangilashda Musa Yerniyazovning xizmatlari katta ekanligini taʼkidladi. Qolaversa, marhum davlat va jamoat arbobining Amudaryo tumanining eng olis qishloqlarida boʻlib, har bir soha xodimlarining muammolarini tinglashi, ularni oʻzining tashvishidek qabul qilib tezroq hal qilishga oshiqishi har bir rahbar uchun oʻrnak va ibrat yoʻli boʻlib kelayotganligini aytib oʻtdi.

Tadbirda soʻzga chiqqanlar Oʻzbekiston Qahramoni Musa Yerniyazovning porloq xotirasini yod etib u bilan bogʻliq boʻlgan voqealarni esga olishdi, uning xalq manfaati yoʻlida qilgan xayrli ishlarini yana bir bor eʼtirof etishdi.

 Tuman hokimligining Axborot xizmati