Атоқли давлат ва жамоат арбоби, Ўзбекистон Қаҳрамони Муса Тажетдинович Ерниязовнинг хотира кечаси бўлиб ўтди

Шу йилнинг 5 декабрь куни Ўзбекистон Республикаси Вазирлар маҳкамасининг “Атоқли давлат ва жамоат арбоби, Ўзбекистон Қаҳрамони Муса Тажетдинович Ерниязовнинг 75 йиллигини кенг тарзда нишонлаш тўғрисида”ги қарори қабул қилинган эди. Қарорга мувофиқ 19 декабрь куни Амударё тумани Маданият бўлими биносида хотира кечаси бўлиб ўтди.

“Атоқли давлат ва жамоат арбоби, Ўзбекистон Қаҳрамони Муса Тажетдинович Ерниязовнинг меҳнат йўли – ибрат мактаби” номли хотира кечасида туман ҳокими ўринбосари Маҳмуд Шерметов, фуқаролар йиғинлари раислари, нуронийлар, кенг жамоатчилик вакиллари иштирок этишди. Тадбир аввалида устоз санъаткорлар томонидан мумтоз наволар ижро этилди.

Хотира кечасида Муса Тажетдинович Ерниязовнинг порлоқ хотирасига бағишлаб “Ўзбеккино” миллий агентлиги буюртмаси асосида “Қорақалпоқфильм” киностудияси томонидан суратга олинган ҳужжатли фильм намойиш этилди.

Сценарий муаллифи Кенесбай Каримов марҳумнинг умри давомида учраган тўсиқ ва қийинчиликларга қарамасдан қорақалпоқ халқи учун чин дилдан фидокорона хизмат қилганлигини унинг замондошлари, ҳамкасблари, яқинларининг хотиралари, самимий фикрлари орқали тўлиқ гавдалантириб берган.

Хотира кечасида туман ҳокими ўринбосари Маҳмуд Шерметов Муса Ерниязовнинг 18 йил давомида Қорақалпоғистон Республикаси Жўқорғи Кенгеси раиси лавозимида фаолият юритиб, Қорақалпоғистон Республикасининг гуллаб-яшнаши йўлида бор куч, билим ва ғайратини сафарбар қилганлигини, ҳар бир соҳада эришилган салмоқли ютуқларни қорақалпоқ халқи Муса Ерниязовнинг номи ва фаолияти билан боғлашини айтиб ўтди.

Муса Ерниязовнинг амударёликлар учун чиндан ҳам қадрли эл оқсоқоли бўлганлиги, унинг туманга бўлган ташрифи давомида аҳолининг турмуш шароитини янада яхшилаш, иқтисодий ва ижтимоий соҳани ривожлантириш бўйича билдирган таклиф ва тавсиялари ижроси бугунги кунда ўзининг ижобий самарасини бериб келаётганлиги таъкидланди.

Дарҳақиқат, унинг даврида Қорақалпоғистонда бошқа соҳалардан орқада қолаётган қишлоқ хўжалиги соҳаси гуркираб ривожланди. Юртимиз йирик саноат марказига айланди. Катта завод ва фабрикаларнинг ишга туширилиши, инвестицияларнинг кириб келиши сабабли очилган ер ости ва ер усти бойликлари бугунги кунда халқимизнинг турмуши фаровонлигига хизмат қилиб келмоқда.

Хотира кечасида “Нуронийлар” жамоатчилик Кенгаши раиси ўринбосари Бекман Аллаберганов Муҳтарам Президентимизнинг бошлаб берган одилона сиёсатини Муса Ерниязов муносиб давом қилдирганини эътироф этиб ўтди.

У ўз нутқида Оролнинг чекиниши оқибатида юзага келган экологик муаммоларнинг олдини олиш, Устюрт, Мўйноқнинг турмушини янгилашда Муса Ерниязовнинг хизматлари катта эканлигини таъкидлади. Қолаверса, марҳум давлат ва жамоат арбобининг Амударё туманининг энг олис қишлоқларида бўлиб, ҳар бир соҳа ходимларининг муаммоларини тинглаши, уларни ўзининг ташвишидек қабул қилиб тезроқ ҳал қилишга ошиқиши ҳар бир раҳбар учун ўрнак ва ибрат йўли бўлиб келаётганлигини айтиб ўтди.

Тадбирда сўзга чиққанлар Ўзбекистон Қаҳрамони Муса Ерниязовнинг порлоқ хотирасини ёд этиб у билан боғлиқ бўлган воқеаларни эсга олишди, унинг халқ манфаати йўлида қилган хайрли ишларини яна бир бор эътироф этишди.

 Туман ҳокимлигининг Ахборот хизмати