Jayxun ilhomlari

Qorli lahzalar

Yoritadi tunni falak uzra oy,

Sukunat hukmron boʻlgan koʻchada.

Suvlar ham muzlagan hattoki soyda,

Qish...

Bu koʻzlarimning goʻyo ichida.

Yalangʻoch ahvolda turar daraxtlar,

Manzara oʻzgacha, kumush libosda.

Men seni uchratgan oʻsha vaqtlarda,

Ming xayol surgandim noʻxatday boshda.

Qish...

Eslatar menga shirin oʻtmishni,

Qorli lahzalarim oʻchmas yodimdan.

Hammadan qattiqroq sevganman qishni,

Muhrlanib qolgan qish hayotimda.

Qish eslatar menga shirin oʻtmishni...

Sunnatulla Ahmadjon.

Ustozim

Qulluq, deyman doimo,

Mening aziz ustozim.

Oʻrgatar oʻqish, yozish,

Mehribonim ustozim.

Yuzlaridan goʻyoki,

Nur sochilar oftobdek.

Har oʻquvchi koʻngliga,

Yoʻl topadi ustozim.

M.YoʻldOsheva,

83-maktab oʻquvchisi.

Uka

Uka, desam keladi,

Men ne desam qiladi.

Meni yaxshi koʻradi,

Ukajonim mening.

Yiqilsang-da, tur uka,

Qoqilsang-da, yur uka.

Aslo emassan yakka,

Ukajonim mening.

Doimo gʻolib boʻlgin,

Har kun oldinga yurgin.

Koʻp kitoblar oʻqigin,

Ukajonim mening.

Sardorbek Kenjaboyev.

Omonat

Jar ustida turibdi dunyo,

Quchogʻida ne bir sinoat.

Qaytib kelmas moziylar aro,

Baxt – omonat, qaygʻu – omonat.

Oilaning buyuk davlati,

Qadri baland ota – omonat.

Jannatlarning yagona guli,

Bir farishta ona – omonat.

Quvonchingga boʻlgʻuchi dildosh,

Yaqinlaring senga omonat.

Yoʻllaringda eng yaxshi yoʻldosh,

Doʻst atalgan boylik – omonat.

Oqqan daryo umringga qiyos,

Ardoqlasang boʻlar salomat.

Goʻzal kunlar, taʼriflarga mos,

Yoshlik degan neʼmat omonat.

Shoira GULMONOVA,

87-maktab oʻquvchisi.

Ziyokorim

Bizga bilim oʻrgatgan ,

Qalam tutqazib qoʻlga.

Soʻzlab odob-axloqdan,

Boshlagan yorugʻ yoʻlga.

Ziyo nurin taratgan,

Koʻnglimiz shod aylagan.

Tilab eng baland parvoz.

Dunyoni anglatgan Ustoz!

Lobaroy Olimboyeva,

 57-maktab oʻquvchisi.

QISh

Qish bagʻrida oʻynaymiz,

Oʻynab, sira toʻymaymiz.

Yangi yilning zavqini,

Yuraklarga joylaymiz.

Oppoq qor ogʻushida,

Yurtning qorli qishida.

Betakror sinoat bor,

Oq koʻrpa – kumushida.

Mashhura Rajabova,

82-maktab oʻquvchisi.