ILGʻOR FERMERLARGA TUMAN HOKIMINING TAShAKKURNOMALARI TOPShIRILDI
7-dekabr kuni Amudaryo tumani hokimligida ilgʻor fermerlar ishtirokida yigʻilish oʻtkazildi. Yigʻilishda tuman hokimi Sultonboy Yoʻldoshev barcha fermerlar hamda Qishloq xoʻjaligi sohasi fidoyilarini Konstitutsiyamizning 30 yillik bayrami va yaqinlashib kelayotagan Qishloq xoʻjaligi xodimlari kuni bilan tabrikladi.
Darhaqiqit, rizq-roʻzimiz bunyodkorlari – mirishkor dehqon va fermerlar, zahmatkash chorvador va pillakorlar, mohir suvchi va irrigatorlar, oʻz ishining haqiqiy ustasi boʻlgan mexanizator va agronomlarimiz yozni yoz, qishni qish demay oʻz kasblariga vijdonan yondoshib mamlakatimiz iqtisodiyoti barqarorligiga, xalqimiz farovonligiga oʻz hissalarini qoʻshib kelmoqdalar.
Amudaryo tumanining mehnatkash fermerlari bu yil ham oʻz zimmalaridagi vazifalarini aʼlo darajada ado etib, yuqori natijalarga erishdilar.
Yigʻilishda mana shunday fidoyi va mehnatkash, ishning koʻzini biladigan, tadbirkor va ishbilarmon fermerlarga yerdan yuqori hosil yetishtirib, iqtisodiyotimiz rivoji va xalqimiz farovonligiga qoʻshayotgan hissasi uchun tuman hokimligining tashakkurnomalari topshirildi.
Joriy yilda tumandagi 352 ta fermer xoʻjaliklarining 13 ming 900 gektar maydoniga chigit ekildi. Ekilgan chigitlardan tekis nihollar olinib, yaxshi parvarish qilingani bois rejadagi 44 ming 755 tonna oʻrniga 44 ming 844 tonna hosil olindi.
2022-yil hosili uchun tuman boʻyicha 6000 gektar maydonga gʻalla ekilgan, 2 ta gʻallachilik klasterlari va fermer xoʻjaliklari oʻrtasida 8960 tonna don yetishtirish boʻyicha shartnomalar tuzilgan edi. Gʻalla ekilgan maydonlarda bir tekis unib chiqqan nihollarning agrotexnik qoidalar asosida parvarish qilinishi, mineral oʻgʻitlar bilan oziqlatirilib oʻz vaqtida oʻrib-yigʻib olinishi tufayli belgilangan reja 143,2 foizga ortigʻi bilan bajarildi. Mirishkor dehqonlarimiz shartnomadagi 8960 tonna oʻrniga 12 ming 832 tonna don topshirdilar.
Gʻallakorlarimiz 2023-yilda ham moʻl hosil yetishtirish niyatida ayni kunlarda bugʻdoy tarbiyasiga katta eʼtibor qaratishmoqda. Joriy yilda kelgusi yil hosili uchun 360 ta fermer xoʻjaliklarining 7581 gektar maydonlariga gʻalla ekildi. Bu oʻtgan yilgiga qaraganda 1581 gektarga koʻpdir.
Bundan tashqari, yakunlanayotgan yilda tumanimiz qishloq xoʻjaligining asosiy tarmoqlaridan biri − pillachilik boʻyicha ham quvonarli yutuqlar qoʻlga kiritildi. “Jayxun silk” masʼuliyati cheklangan jamiyati tomonidan 4163 quti ipak urugʻi pillakorlarga yetkazib berildi va 237,4 tonna pilla yetishtirildi. Har bir qutidan olingan oʻrtacha hosildorlik 56,9 kg ni tashil qildi.
Albatta, qishloq xoʻjaligi sohasida oson va yengil yoʻlning oʻzi boʻlmaydi. Tabiat injiqliklari, suv resurslarining cheklangani, turli hasharot va zararkunandalar bilan kurashish har bir dehqondan katta azmu shijoat, mirishkorlik va tajribani talab etadi. Mana shunday muammolarga qaramasdan, bor bilim va tajribalarini ishga solib mehnat qilayotgan dehqonlarimiz tufayli Amudaryo tumani Respublikadagi boshqa tumanlar orasida qishloq xoʻjalik mahsulotlari yetishtirish boʻyicha peshqadamlikni qoʻldan bermay kelmoqda.
Yigʻilish soʻngida tuman hokimi Sultonboy Yoʻldoshev mana shunday ilgʻor va tajribali fermerlarga butun amudaryoliklar nomidan minnatdorchilik bildirib, kelgusi ishlarida omad va zafarlar tiladi.
Tuman hokimligining Axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
