ИЛҒОР ФЕРМЕРЛАРГА ТУМАН ҲОКИМИНИНГ ТАШАККУРНОМАЛАРИ ТОПШИРИЛДИ
7 декабрь куни Амударё тумани ҳокимлигида илғор фермерлар иштирокида йиғилиш ўтказилди. Йиғилишда туман ҳокими Султонбой Йўлдошев барча фермерлар ҳамда Қишлоқ хўжалиги соҳаси фидойиларини Конституциямизнинг 30 йиллик байрами ва яқинлашиб келаётаган Қишлоқ хўжалиги ходимлари куни билан табриклади.
Дарҳақиқит, ризқ-рўзимиз бунёдкорлари – миришкор деҳқон ва фермерлар, заҳматкаш чорвадор ва пиллакорлар, моҳир сувчи ва ирригаторлар, ўз ишининг ҳақиқий устаси бўлган механизатор ва агрономларимиз ёзни ёз, қишни қиш демай ўз касбларига виждонан ёндошиб мамлакатимиз иқтисодиёти барқарорлигига, халқимиз фаровонлигига ўз ҳиссаларини қўшиб келмоқдалар.
Амударё туманининг меҳнаткаш фермерлари бу йил ҳам ўз зиммаларидаги вазифаларини аъло даражада адо этиб, юқори натижаларга эришдилар.
Йиғилишда мана шундай фидойи ва меҳнаткаш, ишнинг кўзини биладиган, тадбиркор ва ишбилармон фермерларга ердан юқори ҳосил етиштириб, иқтисодиётимиз ривожи ва халқимиз фаровонлигига қўшаётган ҳиссаси учун туман ҳокимлигининг ташаккурномалари топширилди.
Жорий йилда тумандаги 352 та фермер хўжаликларининг 13 минг 900 гектар майдонига чигит экилди. Экилган чигитлардан текис ниҳоллар олиниб, яхши парвариш қилингани боис режадаги 44 минг 755 тонна ўрнига 44 минг 844 тонна ҳосил олинди.
2022 йил ҳосили учун туман бўйича 6000 гектар майдонга ғалла экилган, 2 та ғаллачилик кластерлари ва фермер хўжаликлари ўртасида 8960 тонна дон етиштириш бўйича шартномалар тузилган эди. Ғалла экилган майдонларда бир текис униб чиққан ниҳолларнинг агротехник қоидалар асосида парвариш қилиниши, минерал ўғитлар билан озиқлатирилиб ўз вақтида ўриб-йиғиб олиниши туфайли белгиланган режа 143,2 фоизга ортиғи билан бажарилди. Миришкор деҳқонларимиз шартномадаги 8960 тонна ўрнига 12 минг 832 тонна дон топширдилар.
Ғаллакорларимиз 2023 йилда ҳам мўл ҳосил етиштириш ниятида айни кунларда буғдой тарбиясига катта эътибор қаратишмоқда. Жорий йилда келгуси йил ҳосили учун 360 та фермер хўжаликларининг 7581 гектар майдонларига ғалла экилди. Бу ўтган йилгига қараганда 1581 гектарга кўпдир.
Бундан ташқари, якунланаётган йилда туманимиз қишлоқ хўжалигининг асосий тармоқларидан бири − пиллачилик бўйича ҳам қувонарли ютуқлар қўлга киритилди. “Jayxun silk” масъулияти чекланган жамияти томонидан 4163 қути ипак уруғи пиллакорларга етказиб берилди ва 237,4 тонна пилла етиштирилди. Ҳар бир қутидан олинган ўртача ҳосилдорлик 56,9 кг ни ташил қилди.
Албатта, қишлоқ хўжалиги соҳасида осон ва енгил йўлнинг ўзи бўлмайди. Табиат инжиқликлари, сув ресурсларининг чеклангани, турли ҳашарот ва зараркунандалар билан курашиш ҳар бир деҳқондан катта азму шижоат, миришкорлик ва тажрибани талаб этади. Мана шундай муаммоларга қарамасдан, бор билим ва тажрибаларини ишга солиб меҳнат қилаётган деҳқонларимиз туфайли Амударё тумани Республикадаги бошқа туманлар орасида қишлоқ хўжалик маҳсулотлари етиштириш бўйича пешқадамликни қўлдан бермай келмоқда.
Йиғилиш сўнгида туман ҳокими Султонбой Йўлдошев мана шундай илғор ва тажрибали фермерларга бутун амударёликлар номидан миннатдорчилик билдириб, келгуси ишларида омад ва зафарлар тилади.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
