“Martabang ulugʻ boʻlsin, ona tilim” mavzusida bayram tadbiri boʻlib oʻtdi

Til − millatning bebaho boyligi, benazir qadriyati va tengsiz mulki hisoblanadi. Tilda ana shu tilning ijodkori boʻlgan xalq, elatning tarixi va madaniyati aks etadi.

1989-yil 1-dekabr — Qoraqalpogʻiston tarixidagi muhim sanalardan biri sifatida tarixga muhrlangan. Mazkur sanada Qoraqalpoq xalqining azaliy orzusi roʻyobga chiqdi va qoraqalpoq tiliga davlat tili maqomi berildi. Ushbu kun har yili Qoraqalpogʻiston Respublikasining barcha hududlarida keng tarzda nishonlanib kelinadi. Shu jumladan Amudaryo tumanida ham sana munosabati bilan qator tadbirlar tashkil etildi.

1-dekabr kuni Prezident taʼlim muassasalari Agentligi tizimidagi Amudaryo tumani ixtisoslashtirilgan maktabi jamoasi hamda tuman Madaniyat boʻlimi hamkorligida “Martabang ulugʻ boʻlsin, ona tilim” mavzusidagi tadbir oʻtkazildi.

Tadbir avvalida ixtisoslashtirilgan maktab direktorining maʼnaviy-maʼrifiy ishlar boʻyicha oʻrinbosari Ravshan Xolmuradov qoraqalpoq tiliga davlat tili maqomi berilganining 33 yilligi bilan barcha oʻquvchilarni va oʻqituvchilarni tabrikladi. Shu bilan birga qoraqalpoq xalqining milliy urf-odatlari, anʼanalari, qadriyatlari haqida gapirib, Ibrayim Yusupovning goʻzal sheʼrlaridan namunalar oʻqidi.

Shuningdek, u oʻz soʻzida soʻnggi yillarda oʻzbek va qoraqalpoq tillarini yanada rivojlantirish, boyitishga alohida eʼtibor berilayotganligini, bu borada Amudaryo tumanida ham barcha sharoitlar yaratilib, taʼlim muassasalari oʻzbek va qoraqalpoq tillaridagi darsliklar bilan yetarli darajada taʼminlanganligini aytib oʻtdi.

Tadbir davomida tumanimizning taniqli sanʼatkorlari, tuman Madaniyat boʻlimi xodimlari, havaskorlik jamoalari hamda maktab oʻquvchilari ishtirokidagi katta kontsert dasturi namoyish qilindi.

Rang-barang badiiy chiqishlar, dilrabo kuy-qoʻshiqlar, maftunkor raqslar tomoshabinlarda katta taassurot qoldirdi.

Ona tili, Vatan, doʻstlik hamda insoniy fazilatlarni ulugʻlovchi goʻzal sheʼrlar oʻquvchilar qalbida vatanparvarlik tuygʻularining yanada mustahkamlanishiga xizmat qildi.

Kontsert dasturi davomida tadbir mehmoni boʻlgan Oʻzbekiston “Milliy tiklanish” demokratik partiyasi tuman Kengashi ijrochi kotibi Shirin Yangibayeva barchani bayram bilan samimiy tabrikladi.

 Oʻquvchilarga qoraqalpoq tilining jamiyatdagi oʻrni, uni yanada rivojlantirish, boyitish maqsadida amalga oshirilayotgan chora-tadbirlar, qabul qilinayotgan normativ-huquqiy hujjatlarning mazmun-mohiyati haqida batafsil maʼlumot berdi. Shuningdek, oʻquvchilarga tilmizning sofligini saqlash zarurligi, uni yanada boyitish uchun har bir shaxs hissa qoʻshishi lozimligini aytib oʻtdi.

Darhaqiqat, bugungi kunda qoraqalpoq tilining oʻrni va obroʻsini orttirish boʻyicha koʻplab amaliy ishlar qilinmoqda. Jumladan, “Qoraqalpoq tilining raqamlashtirilgan texnologiyasi” nomidagi ilmiy-amaliy loyiha amalga oshirilmoqda. Shu bilan birga qoraqalpoq tilidagi audio-kitoblar platformasini yaratish ustida ish olib borilmoqda.

 Qolaversa, atamalarning qoraqalpoq tilidagi tarjimalari Atamalar komissiyasi tomonidan ishlab chiqilib, 5 tomlik “Qaraqalpaq tilinin tusindirme soʻzligi” kitobi nashrga tayyorlanmoqda.

 Aytish kerakki, amalga oshirilayotgan bu kabi chora-tadbirlar qoraqalpoq tiliga boʻlgan yuksak eʼtiborning yorqin namunasidir.

Tuman hokimligining Axborot xizmati.