“BESh MUHIM TAShABBUS – YoShLARGA QANOT” GRANT LOYIHASI DOIRASIDA KONTsERT DASTURI NAMOYISh ETILDI

Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan tashkil qilingan davlat granti tanlovida “Mening oilam” gazetasi tahririyatining “Besh muhim tashabbus – yoshlarga qanot” nomli loyihasi gʻolib boʻlgan edi.

“Mening oilam” gazetasi tahririyati ijodiy jamoasi mazkur fond tomonidan moliyalashtirilgan loyiha doirasida oʻquv muassasalarida, ovul va mahallalarda turli xil mavzulardagi maʼnaviy-maʼrifiy tadbirlar oʻtkazish orqali Prezidentimiz tashabbusi bilan joriy etilgan besh muhim tashabbus boʻyicha yoshlarning ijtimoiy folligini oshirish borasida faoliyat olib borishmoqda.

Gazetaning maxsus muxbiri, Qoraqalpogʻiston Respublikasida xizmat koʻrsatgan jurnalist, loyiha koordinatori Robiya Yoʻldosheva loyihada koʻzda tutilgan reja asosida Mangʻit shahridagi 9-sonli bolalar musiqa va sanʼat maktabida nogironligi boʻlgan yoshlarning musiqa va sanʼatga qiziqishini oshirish maqsadida mazkur musiqa va sanʼat maktabi maʼmuriyati hamda tuman Nogironlar jamiyati bilan hamkorlikda musiqa va sanʼat maktabi oʻquvchilarining kontsert dasturini tashkil etdi.

Ushbu kontsert dasturi davomida Amudaryo tumanining turli hududlaridagi umumtaʼlim maktablarining uyda taʼlim oluvchi oʻquvchilari, shuningdek ovul va mahallalarda istiqomat qiluvchi nogironligi boʻlgan, sanʼat va musiqaga ixlosmand yoshlar va ularning ota-onalari ishtirok etdilar.

Tadbirni “Besh muhim tashabbus – yoshlarga qanot” loyihasi koordinatori Robiya Yoʻldosheva ochdi va mamlakatimizda imkoniyati cheklangan yoshlarni har tomonlama qoʻllab-quvvatlash, ularning musiqa va sanʼatga boʻlgan iqtidorlarini rivojlantirish maqsadida tashkil etilayotgan mazkur kontsert dasturining ahamiyati xususida soʻz yuritib, tadbir ishtirokchilarini 3-dekabr – Xalqaro Nogironlar kuni va yaqinlashib kelayotgan Oʻzbekiston Respublikasi Konstitutsiyasi qabul qilinganining 30 yilligi bilan tabrikladi.

Kontsert dasturi davomida 9-sonli bolalar musiqa va sanʼat maktabi direktori, Qoraqalpogʻiston Respublikasida xizmat koʻrsatgan madaniyat xodimi Yoʻldashboy Obdalov, “Besh muhim tashabbus”ning birinchi yoʻnalishi yoshlarni musiqa va sanʼatga qiziqtirish, ularning ushbu yoʻnalish boʻyicha iqtidorlarini rivojlantirish va qoʻllab-quvvatlash yuzasidan mamlakatimizda, shu jumladan tumanimizda, shuningdek 9-sonli bolalar musiqa va sanʼat maktabida amalga oshirilayotgan amaliy ishlarning ahamiyati xususida soʻz yuritdi.

Shundan soʻng, musiqa va sanʼat maktabida taʼlim olayotgan sanʼatsevar yoshlar oʻz iqtidorlarini namoyish etdilar. Oʻzbek va qadrdosh xalqlar milliy cholgʻu asboblarida biri-biridan mazmundor, yoqimli kuylar chalib, ashulalar aytishdi, raqslar ijro etishdi. Ayniqsa, xalq cholgʻulari orkestri, estarada xonandaligi, anʼanaviy ijrochilik, rubob, doira, raqs yoʻnalishlarida musiqiy taʼlim olayotgan oʻquvchi-yoshlarning ijrolari kontsert dasturini yanada boyitdi.

Kontsert dasturida ishtirok etgan yoshlar oʻz tengdoshlarining ijro mahoratlaridan mamnun boʻldilar, shu bilan birga ular qalbida musiqa va sanʼatga boʻlgan mehr va ishtiyoqlari ortdi. Tadbirda ishtirok etgan yoshlar miriqib hordiq chiqardilar hamda oʻzlari ham musiqa bilan shugʻullanish istagida ekanliklarini bildirdilar.

Kontsert dasturi yakunida faol va jamoatchi yoshlarga sovgʻalar berilib, “Ranglar jilosi” Respublika tanlovida munosib ishtirok etgan ijodkor yoshlarga mazkur musiqa va sanʼat maktabi direktori Yoʻldoshboy Obdalov tomonidan tashakkurnomalar topshirildi.

Robiya YOʻLDOShEVA.