“Bolalarga bering dunyoni” mavzusidagi tanlov boʻlib oʻtdi

Mamlakatimizning barcha joylarida boʻlgani kabi tumanimizda ham yoshlar maʼnaviyatini yuksaltirish, ularning ijodiy salohiyatini yuzaga chiqarish, ularni turli zararli illatlardan himoya qilish borasida turli tadbirlar, uchrashuvlar, tanlovlar oʻtkazilib kelinmoqda.

Maktab oʻquvchilarining boʻsh vaqtlarini mazmunli tashkil qilish, sanʼat sohasi bilan birgalikda huquqiy  siyosiy madaniyatini oshirish hamda Prezidentimiz tomonidan belgilab berilgan besh muhim tashabbusni amalga oshirish maqsadida tuman “Barkamol avlod” bolalar maktabida “20-noyabr butun dunyo bolalar kuni” ham “8-dekabr – Oʻzbekiston Respublikasi Konstitutsiyasining 30-yilligi” munosabati bilan “Bolalarga bering dunyoni” mavzusidagi tanlov boʻlib oʻtdi.

Ushbu mavzudagi respublika tanlovining tuman bosqichida tumanimizdagi umumtaʼlim maktablaridan kelgan 168 nafar yosh rassomlar ishtirok etishdi. Mazkur tanlov tumanimizda kelajagidan ulkan umid kutsa boʻladigan iqtidorli yosh rassomlar juda koʻp ekanligini koʻrsatdi. Ularning moʻyqalamidan bunyod boʻlayotgan rang-barang tasvirlar har qanday odamning qalbida goʻzal hislarni uygʻotishi tabiiy.

Yosh rassomlar tomonidan yaratilayotgan Ona – Vatan, tabiat, ona – yurt, Vatan timsollari koʻnglimizga hayajon soladi.

Yosh rassomlar oldiga “Bola huquqlari”, “Konstitutsiyaviy islohotlar yoshlar nigohida” mavzusiga oid suratlarni chizish yoʻnalishlari belgilandi.

Koʻrik tanlovning borishini tajribali mutaxassislardan iborat hakamlar hayʼati nazorat qilib bordi.

Hakamlar hayʼati tomonidan ijodiy ishlar 100 ballik tizimda baholab borishi belgilandi. Bunda yosh rassomlar ijodiy ishining bola huquqlarini himoya qilish targʻib qilinganligi, milliy va zamonaviy xususiyatlarning aks etganligi, konstitutsiyaviy islohotlarning keng yoritilganligi, badiiy saviyasi va sifatliligi kompozitsion talablarga mos kelishiga ulkan eʼtibor qaratildi.

Qiziqarli bellashuvlarga boy boʻlgan tanlov yakunida nufuzli hakamlar hayʼatining eʼtirofiga koʻra 83-sonli maktab oʻquvchisi Maftuna Hayitboyeva, 32-sonli maktab oʻquvchisi Ruhshona Norboyeva 1-oʻrinni, 40-sonli maktab oʻquvchisi Zafar Bahromboyev, 83-sonli maktab oʻquvchisi Jasmina Jumaniyazova 2-oʻrinni, 31-sonli maktab oʻquvchisi Charos Jumaniyazova, 9-sonli maktab oʻquvchisi Doniyor Baxtiyorov 3-oʻringa munosib deb topildilar. Ularga diplom va qimmatbaho sovgʻalar topshirildi.

Shuningdek, yosh rassomlarning bir guruhiga tanlovdagi faol ishtiroklari uchun faxriy yorliqlar topshirildi.

Tanlov soʻngida tanlov tashkilotchilari chiqib gapirib yosh rassomlarning respublika tanlovidagi ijodiy ishlarida ham yutuqlar tiladi.

Yosh rassomlar tanlovi tuman prokuraturasi, tuman Xalq taʼlimi boʻlimi, yoshlar ishlari agentligi tuman boʻlimi, “Barkamol avlod” bolalar maktabi hamkorligida oʻtkazildi.

Mazkur tanlovni oʻtkazishdan maqsad – oʻquvchi-yoshlar oʻrtasida huquqiy bilimdonlikni kuchaytirish, ularning hayot darajasi va bilim sifatini oshirish, ijodiy salohiyatini, vatanparvarlik tuygʻularini, ular qalbida yot gʻoyalarga qarshi mustahkam immunitetni shakllantirish hamda yurtimizda oʻsib kelayotgan yosh avlodni huquqiy jamiyatga hurmat ruhida tarbiyalash, baxt-iftixor tuygʻusini shakllantirish, mustaqil va erkin fikrlovchi qatʼiy pozitsiyaga ega boʻlgan yuksak bilimli, intellektual salohiyatli, mustaqillik tamoyillariga sodiq, jismoniy va maʼnaviy jihatdan yetuk barkamol avlodni tarbiyalash, yurtimizda amalga oshirilayotgan islohotlarning mohiyatini yosh avlod ongiga chuqur singdirishdir.

Oʻrozali REYIMOV, “Jayxun ilhomlari” NNT raisi.