“Болаларга беринг дунёни” мавзусидаги танлов бўлиб ўтди

Мамлакатимизнинг барча жойларида бўлгани каби туманимизда ҳам ёшлар маънавиятини юксалтириш, уларнинг ижодий салоҳиятини юзага чиқариш, уларни турли зарарли иллатлардан ҳимоя қилиш борасида турли тадбирлар, учрашувлар, танловлар ўтказилиб келинмоқда.

Мактаб ўқувчиларининг бўш вақтларини мазмунли ташкил қилиш, санъат соҳаси билан биргаликда ҳуқуқий  сиёсий маданиятини ошириш ҳамда Президентимиз томонидан белгилаб берилган беш муҳим ташаббусни амалга ошириш мақсадида туман “Баркамол авлод” болалар мактабида “20 ноябрь бутун дунё болалар куни” ҳам “8 декабрь – Ўзбекистон Республикаси Конституциясининг 30 йиллиги” муносабати билан “Болаларга беринг дунёни” мавзусидаги танлов бўлиб ўтди.

Ушбу мавзудаги республика танловининг туман босқичида туманимиздаги умумтаълим мактабларидан келган 168 нафар ёш рассомлар иштирок этишди. Мазкур танлов туманимизда келажагидан улкан умид кутса бўладиган иқтидорли ёш рассомлар жуда кўп эканлигини кўрсатди. Уларнинг мўйқаламидан бунёд бўлаётган ранг-баранг тасвирлар ҳар қандай одамнинг қалбида гўзал ҳисларни уйғотиши табиий.

Ёш рассомлар томонидан яратилаётган Она – Ватан, табиат, она – юрт, Ватан тимсоллари кўнглимизга ҳаяжон солади.

Ёш рассомлар олдига “Бола ҳуқуқлари”, “Конституциявий ислоҳотлар ёшлар нигоҳида” мавзусига оид суратларни чизиш йўналишлари белгиланди.

Кўрик танловнинг боришини тажрибали мутахассислардан иборат ҳакамлар ҳайъати назорат қилиб борди.

Ҳакамлар ҳайъати томонидан ижодий ишлар 100 баллик тизимда баҳолаб бориши белгиланди. Бунда ёш рассомлар ижодий ишининг бола ҳуқуқларини ҳимоя қилиш тарғиб қилинганлиги, миллий ва замонавий хусусиятларнинг акс этганлиги, конституциявий ислоҳотларнинг кенг ёритилганлиги, бадиий савияси ва сифатлилиги композицион талабларга мос келишига улкан эътибор қаратилди.

Қизиқарли беллашувларга бой бўлган танлов якунида нуфузли ҳакамлар ҳайъатининг эътирофига кўра 83-сонли мактаб ўқувчиси Мафтуна Ҳайитбоева, 32-сонли мактаб ўқувчиси Руҳшона Норбоева 1-ўринни, 40-сонли мактаб ўқувчиси Зафар Баҳромбоев, 83-сонли мактаб ўқувчиси Жасмина Жуманиязова 2-ўринни, 31-сонли мактаб ўқувчиси Чарос Жуманиязова, 9-сонли мактаб ўқувчиси Дониёр Бахтиёров 3-ўринга муносиб деб топилдилар. Уларга диплом ва қимматбаҳо совғалар топширилди.

Шунингдек, ёш рассомларнинг бир гуруҳига танловдаги фаол иштироклари учун фахрий ёрлиқлар топширилди.

Танлов сўнгида танлов ташкилотчилари чиқиб гапириб ёш рассомларнинг республика танловидаги ижодий ишларида ҳам ютуқлар тилади.

Ёш рассомлар танлови туман прокуратураси, туман Халқ таълими бўлими, ёшлар ишлари агентлиги туман бўлими, “Баркамол авлод” болалар мактаби ҳамкорлигида ўтказилди.

Мазкур танловни ўтказишдан мақсад – ўқувчи-ёшлар ўртасида ҳуқуқий билимдонликни кучайтириш, уларнинг ҳаёт даражаси ва билим сифатини ошириш, ижодий салоҳиятини, ватанпарварлик туйғуларини, улар қалбида ёт ғояларга қарши мустаҳкам иммунитетни шакллантириш ҳамда юртимизда ўсиб келаётган ёш авлодни ҳуқуқий жамиятга ҳурмат руҳида тарбиялаш, бахт-ифтихор туйғусини шакллантириш, мустақил ва эркин фикрловчи қатъий позицияга эга бўлган юксак билимли, интеллектуал салоҳиятли, мустақиллик тамойилларига содиқ, жисмоний ва маънавий жиҳатдан етук баркамол авлодни тарбиялаш, юртимизда амалга оширилаётган ислоҳотларнинг моҳиятини ёш авлод онгига чуқур сингдиришдир.

Ўрозали РЕЙИМОВ, “Жайхун илҳомлари” ННТ раиси.