QAROR MAZMUN-MOHIYaTINI TARGʻIB ETIShGA BAGʻIShLANGAN YIGʻILISh OʻTKAZILDI

Oʻzbekiston Respublikasi Prezidentinining joriy yil 25-oktyabrdagi “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi Qaroriga muvofiq Amudaryo tumanida amalga oshiriladigan ishlar rejasi tasdiqlangan edi.

Ushbu maqsadlar uchun tumanimiz boʻyicha 22 milliard 209 million soʻm pul mablagʻ ajratilishi belgilangan va ovul va mahallalar hududlaridagi mavjud muammolarni bartaraf etish rejalashtirilgan. Xususan, tuman hududidagi 19 ta ovul va mahallalardagi jami 50,4 kilometr ichki yoʻllarni taʼmirlash, ichimlik suvi taʼminotini yaxshilash maqsadida ikki mahallaga suv tozalash inshootini qurish, elektr energiyasi taʼminotini yaxshilash, bolalar sport maydonchasini va ikkita mahallaning maʼmuriy binolarini yangidan qurish rejalashtirilgan.

21-noyabr kuni tuman hokimligi majlislar xonasida ushbu qaror ahamiyatini keng jamoatchilikka yetkazish maqsadida yigʻilish oʻtkazildi.

Yigʻilishda Oliy Majlis Senati aʼzosi Ulugʻbek Jalmenov, Qoraqalpogʻiston Respublikasi Joʻqorgʻi Kengesi deputatlari, tuman Kengashi deputatlari, hokimlik masʼul xodimlari, korxona, tashkilotlar rahbarlari ishtirok etdilar.

Yigʻilishda Oliy Majlis Senati aʼzosi Ulugʻbek Jalmenov Prezidentning yuqorida qayd etilgan qarorida hududlarni obod qilish, ovul va mahallalarda infratuzilma bilan bogʻliq eng dolzarb masalalarni tizimli hal etish, xususan, joylarda ichki yoʻllar, ichimlik suvi, elektr energiyasi, gaz taʼminotini, taʼlim, sogʻliqni saqlash, madaniyat sport va boshqa infratuzilma obʼektlarini yaxshilash, shu asosda aholi uchun munosib turmush sharoitlarini yaratish maqsad qilinganini taʼkidlab oʻtdi. Buning uchun Qoraqalpogʻiston Respublikasi, viloyatlar, Toshkent shahri boʻyicha hududiy ishchi guruhlar tashkil etilib, ular tomonidan respublika boʻyicha 9370 ta mahallada aholining turmush darajasiga bevosita taʼsir koʻrsatuvchi eng dolzarb masalalar oʻrganilgan. Shu asosda 2022-2032-yillarda mahallalar infratuzilmasini rivojlantirish boʻyicha loyihalar dasturlari ishlab chiqilgan.

Qayd etish joizki, tumanimizda ham qarorga muvofiq amalga oshiriladigan loyihalar belgilanib, bugungi kunda loyihalar tender savdolariga qoʻyilgan. Jarayon dekabr oyida yakunlanadi va amaliy ishlar boshlanadi. Bu boʻyicha tuman hokimi, sektorlar rahbarlari va boshqa masʼullar hududlar aholisi bilan uchrashuvlar oʻtkazib, amalga oshiriladigan ishlarni keng tushuntirmoqdalar. Tegishli mutasaddilar har haftada joylarga chiqqan holda mahallalarda amalga oshirilayotgan ishlar oʻz vaqtida va samarali tashkil qilinishini nazoratga olib, dolzarb muammolar hal etilayotganligi yuzasidan aholiga batafsil tushuntirish va tashviqot ishlarini tashkil etib boradalar. Hududlar infratuzilmasini rivojlantirish boʻyicha loyihalarni amalga oshirishda ajratilgan mablagʻlarning maqsadli sarflanishi, qurilish, taʼmirlash ishlarining sifatli ado etilishi deputatlar va keng jamoatchilik tomonidan ham qatʼiy nazorat qilib boriladi.

Yigʻilish ishtirokchilariga tuman miqyosida mazkur qarorga muvofiq amalga oshiriladigan ishlar koʻlami boʻyicha toʻliq maʼlumotlar berildi. Prezidentimizning “2022-2023-yillarda mahallalar infrastrukturasini yanada yaxshilash boʻyicha qoʻshimcha chora-tadbirlar toʻgʻrisida”gi Qarorining ijrosi boʻyicha qilinadigan ishlar tumanimiz aholisi turmushi sifatini, farovonligini yanada oshirishga xizmat qiladi.

Oygul RAJABOVA.