Prezidentning tumandagi Xalq qabulxonasi tomonidan hokim yordamchilari faoliyati samaradorligi oʻrganib borilmoqda

Oʻzbekiston Respublikasi Prezidentining Amudaryo tumanidagi Xalq qabulxonasi tomonidan sektorlar, davlat organlari va boshqa tashkilotlarning uyma-uy yurish, murojaatlar bilan ishlash, ijtimoiy va boshqa obʼektlarda aniqlangan muammolarni hal qilish borasidagi faoliyatini oʻrganish, koʻrib chiqilishi majburiy boʻlgan taqdimnomalar kiritish, shuningdek, sektorlar faoliyatini baholashda ishtirok etish boʻyicha 2022-yilning oʻtgan davri mobaynida tizimli ishlar amalga oshirildi.

Jumladan, Oʻzbekiston Respublikasi Prezidentining Virtual qabulxonasida 2022-yil 30-sentyabr sanasiga qadar jismoniy va yuridik shaxslar tomonidan jami 1970 ta masala boʻyicha murojaatlar roʻyxatga olingan boʻlib, koʻrib chiqilgan murojaatlarning 31,6 foizi ijobiy hal etilgan va 48,3 foizi huquqiy maʼlumot berish orqali hal qilingan. 0,8 foiz murojaat esa uzoq muddatli nazoratga olinib, zarur tushuntirishlar berilgan, 1 tasi koʻrmasdan qoldirilgan, 9 tasi rad etilgan, 11 tasi tugatilgan. Qolgan 46 tasini esa koʻrib chiqish jarayoni davom etmoqda.

Tuman aholisi tomonidan turli xil mazmundagi murojaatlar kelib tushmoqda. Har bir murojaat atroflicha oʻrganilib, oʻz vaqtida javob berilmoqda. Bundan tashqari, tumandagi davlat organlari va tashkilotlar tomonidan murojaatlarni koʻrib chiqish muddatlariga amal qilinishi ham nazoratga olingan. Bu borada baʼzi kamchiliklar ham uchramoqda. Jumladan,  tuman Aholi bandligiga koʻmaklashish markazi va elektr taʼminoti korxonasi tomonidan murojaatlarni koʻrib chiqish davomida Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonunining 27 va 28-moddalarida keltirilgan talablar buzilganligi uchun Amudaryo tumanidagi Xalq qabulxonasi tomonidan tegishli davlat organlariga taqdimnomalar chiqarilib, natijada masʼul xodimlarga nisbatan Oʻzbekiston Respublikasi Mehnat kodeksining 181-moddasi 1-qismiga asosan hayfsan intizomiy jazo chorasi qoʻllanildi.

Oʻzbekiston Respublikasi Prezidentining 2021-yil 3-dekabrdagi “Mahallalarda tadbirkorlikni rivojlantirish, aholi bandligini taʼminlash va kambagʻallakni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida”gi Qarorida Oʻzbekiston Respublikasi Prezidentining Xalq qabulxonalariga mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha kelib tushayotgan murojaatlarni tahlil qilgan xolda, hokim yordamchilari faoliyatining natijadorligini oʻrganish, oʻrganish natijalarini xalq deputatlari tuman Kengashlarida muhokama qilib borish amaliyotini yoʻlga qoʻyish vazifasi yuklatilgan.

Ushbu qaror asosida Oʻzbekiston Respublikasi Prezidentining Amudaryo tumanidagi Xalq qabulxonasi tomonidan tumandagi hokim yordamchilari faoliyati oʻrganilib, natijalar xalq deputatlari Amudaryo tuman Kengashi sessiyalarida muhokama qilib borilmoqda.

Oʻrganish natijalari shuni koʻrsatmoqdaki, hokim yordamchilari tomonidan joriy yil boshidan tumanda mavjud barcha, yaʼni 36 ming 65 ta xonadonlar xatlovdan oʻtkazilgan hamda toifalarga ajratilgan. Xatlov oʻtkazilgan xonadonlarda 8 ming 579 nafar mehnatga layoqatli ishsizlar aniqlangan. Ularning bandligini taʼminlash va aholining daromad manbaini shakllantirish maqsadida hokim yordamchilari koʻmagi bilan jami 3090 nafar fuqarolarga imtiyozli kredit olish uchun tavsiyanomalar berilib, shu kungacha 2 700 nafarga yaqin fuqarolarning loyihalari bank krediti bilan moliyalashtirilgan. Aholining tomorqada bandligini taʼminlash maqsadida 266 nafar fuqarolarga jami 885,4 mln.soʻm subsidiya mablagʻlari ajratilgan. 4 ta kooperatsiyalar tashkil qilinib, ularning ish boshlashi uchun 144 nafar fuqarolarga jami 432,1 mln. soʻm mablagʻ ajratilgan.

Tumandagi umumiy maydoni 901,2 gektar boʻlgan qishloq xoʻjaligi yerlari zaxiraga olingan. Bugungi kunda "E-AUKSION" elektron savdo platformasi orqali 773,7 gektar yer maydonlari 2 866 nafar fuqarolarga ajratilgan. Natijada shu kungacha 7 ming 417 nafar fuqarolarning bandligi taʼminlangan. Ulardan 2818 nafari doimiy ish joylariga joylashgan boʻlsa, 1105 nafar fuqarolar haq toʻlanadigan jamoat ishlariga jalb chilingan.   3494 nafar fuqarolar esa oʻzini-oʻzi band qilgan shaxslar sifatida roʻyxatdan oʻtgan.

Oʻzbekiston Respublikasi Prezidentining Amudaryo tumanidagi Xalq qabulxonasi bundan keyin ham xalq va davlat oʻrtasida ishonchli koʻprik boʻlib, odamlarning dardini tinglash va muammolarini yechish borasidagi faoliyatini samarali tarzda davom ettiradi.

E.Rajabov, Xalq qabulxonasi mudiri.