Президентнинг тумандаги Халқ қабулхонаси томонидан ҳоким ёрдамчилари фаолияти самарадорлиги ўрганиб борилмоқда

Ўзбекистон Республикаси Президентининг Амударё туманидаги Халқ қабулхонаси томонидан секторлар, давлат органлари ва бошқа ташкилотларнинг уйма-уй юриш, мурожаатлар билан ишлаш, ижтимоий ва бошқа объектларда аниқланган муаммоларни ҳал қилиш борасидаги фаолиятини ўрганиш, кўриб чиқилиши мажбурий бўлган тақдимномалар киритиш, шунингдек, секторлар фаолиятини баҳолашда иштирок этиш бўйича 2022 йилнинг ўтган даври мобайнида тизимли ишлар амалга оширилди.

Жумладан, Ўзбекистон Республикаси Президентининг Виртуал қабулхонасида 2022 йил 30 сентябрь санасига қадар жисмоний ва юридик шахслар томонидан жами 1970 та масала бўйича мурожаатлар рўйхатга олинган бўлиб, кўриб чиқилган мурожаатларнинг 31,6 фоизи ижобий ҳал этилган ва 48,3 фоизи ҳуқуқий маълумот бериш орқали ҳал қилинган. 0,8 фоиз мурожаат эса узоқ муддатли назоратга олиниб, зарур тушунтиришлар берилган, 1 таси кўрмасдан қолдирилган, 9 таси рад этилган, 11 таси тугатилган. Қолган 46 тасини эса кўриб чиқиш жараёни давом этмоқда.

Туман аҳолиси томонидан турли хил мазмундаги мурожаатлар келиб тушмоқда. Ҳар бир мурожаат атрофлича ўрганилиб, ўз вақтида жавоб берилмоқда. Бундан ташқари, тумандаги давлат органлари ва ташкилотлар томонидан мурожаатларни кўриб чиқиш муддатларига амал қилиниши ҳам назоратга олинган. Бу борада баъзи камчиликлар ҳам учрамоқда. Жумладан,  туман Аҳоли бандлигига кўмаклашиш маркази ва электр таъминоти корхонаси томонидан мурожаатларни кўриб чиқиш давомида Ўзбекистон Республикасининг “Жисмоний ва юридик шахсларнинг мурожаатлари тўғрисида”ги Қонунининг 27 ва 28-моддаларида келтирилган талаблар бузилганлиги учун Амударё туманидаги Халқ қабулхонаси томонидан тегишли давлат органларига тақдимномалар чиқарилиб, натижада масъул ходимларга нисбатан Ўзбекистон Республикаси Меҳнат кодексининг 181-моддаси 1-қисмига асосан ҳайфсан интизомий жазо чораси қўлланилди.

Ўзбекистон Республикаси Президентининг 2021 йил 3 декабрдаги “Маҳаллаларда тадбиркорликни ривожлантириш, аҳоли бандлигини таъминлаш ва камбағаллакни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида”ги Қарорида Ўзбекистон Республикаси Президентининг Халқ қабулхоналарига маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича келиб тушаётган мурожаатларни таҳлил қилган холда, ҳоким ёрдамчилари фаолиятининг натижадорлигини ўрганиш, ўрганиш натижаларини халқ депутатлари туман Кенгашларида муҳокама қилиб бориш амалиётини йўлга қўйиш вазифаси юклатилган.

Ушбу қарор асосида Ўзбекистон Республикаси Президентининг Амударё туманидаги Халқ қабулхонаси томонидан тумандаги ҳоким ёрдамчилари фаолияти ўрганилиб, натижалар халқ депутатлари Амударё туман Кенгаши сессияларида муҳокама қилиб борилмоқда.

Ўрганиш натижалари шуни кўрсатмоқдаки, ҳоким ёрдамчилари томонидан жорий йил бошидан туманда мавжуд барча, яъни 36 минг 65 та хонадонлар хатловдан ўтказилган ҳамда тоифаларга ажратилган. Хатлов ўтказилган хонадонларда 8 минг 579 нафар меҳнатга лаёқатли ишсизлар аниқланган. Уларнинг бандлигини таъминлаш ва аҳолининг даромад манбаини шакллантириш мақсадида ҳоким ёрдамчилари кўмаги билан жами 3090 нафар фуқароларга имтиёзли кредит олиш учун тавсияномалар берилиб, шу кунгача 2 700 нафарга яқин фуқароларнинг лойиҳалари банк кредити билан молиялаштирилган. Аҳолининг томорқада бандлигини таъминлаш мақсадида 266 нафар фуқароларга жами 885,4 млн.сўм субсидия маблағлари ажратилган. 4 та кооперациялар ташкил қилиниб, уларнинг иш бошлаши учун 144 нафар фуқароларга жами 432,1 млн. сўм маблағ ажратилган.

Тумандаги умумий майдони 901,2 гектар бўлган қишлоқ хўжалиги ерлари захирага олинган. Бугунги кунда "E-AUKSION" электрон савдо платформаси орқали 773,7 гектар ер майдонлари 2 866 нафар фуқароларга ажратилган. Натижада шу кунгача 7 минг 417 нафар фуқароларнинг бандлиги таъминланган. Улардан 2818 нафари доимий иш жойларига жойлашган бўлса, 1105 нафар фуқаролар ҳақ тўланадиган жамоат ишларига жалб чилинган.   3494 нафар фуқаролар эса ўзини-ўзи банд қилган шахслар сифатида рўйхатдан ўтган.

Ўзбекистон Республикаси Президентининг Амударё туманидаги Халқ қабулхонаси бундан кейин ҳам халқ ва давлат ўртасида ишончли кўприк бўлиб, одамларнинг дардини тинглаш ва муаммоларини ечиш борасидаги фаолиятини самарали тарзда давом эттиради.

Э.Ражабов, Халқ қабулхонаси мудири.