AMUDARYo TUMANIDA TIBBIYoT XODIMLARI KUNI KENG NIShONLANDI

Mamlakatimizda 2006-yildan buyon noyabr oyining ikkinchi yakshanbasi Oʻzbekiston Respublikasi Tibbiyot xodimlari kuni sifatida keng nishonlab kelinadi.

Sana munosabati bilan 11-noyabr kuni Amudaryo tumani madaniyat markazida bayram tadbiri tashkil qilindi. Unda tumandagi tibbiyot muassasalari xodimlari, shifokorlar va hamshiralar, keng jamoatchilik vakillari qatnashdi.

Tadbirda tuman hokimi Sultonboy Yoʻldoshev ishtirok etib, tibbiyot xodimlarini kasb bayrami bilan samimiy tabrikladi. Taʼkidlanganidek, inson borki, hayoti davomida albatta shifokor yordamiga ehtiyoj sezadi. Sogʻlom insongina oilasiga naf keltirib, davlat va jamiyat rivojiga hissa qoʻshadi. Shu boisdan ham, aholi salomatligini asrash, tibbiyot xodimlarining mehnatini eʼzozlash va ragʻbatlantirish davlat siyosatining ustuvor vazifalaridan hisoblanadi.

Mamlakatimizda soʻnggi yillarda bu sohada ham salmoqli ishlar amalga oshirilmoqda. Sogʻlikni saqlash tizimiga ilgʻor texnologiyalar joriy qilinib, tibbiyot maskanlarining moddiy-texnik bazasi mustahkamlanmoqda. Eng chekka qishloqlarda ham tibbiy punktlar, oilaviy poliklinikalar tashkil qilinib, aholi malakali tibbiy xizmat bilan toʻliq qamrab olinmoqda. Eng muhimi, tibbiyot xodimlarining ish haqlarini oshirish, ijtimoiy muhofazasini yaxshilashga eʼtibor qaratilib, jamiyatda shifokorlarning nufuzini oshirish borasida tizimli ishlar qilinmoqda.

Shundan keyin tuman hokimi sektorlar rahbarlari bilan birgalikda tibbiyot sohasining bir guruh ilgʻorlariga faxriy yorliqlar va esdalik sovgʻalari topshirildi.

Shuni alohida taʼkidlash joizki, davlatimiz va hukumatimiz tomonidan tibbiy xizmat sifatini yanada yaxshilash maqsadida qator amaliy ishlar qilinmoqda. Sohaga har yili mahalliy byudjet hisobidan ham mablagʻ yoʻnaltirilib, tibbiyot maskanlariga turli uskuna va jihozlar xarid qilinmoqda.

Masalan, birgina joriy yilda tibbiy asbob-uskunalar xaridiga 1,2 mlrd soʻm, 2021-yilda 1,3 mlrd soʻm, 2020-yilda 2,1 mlrd soʻm mablagʻ ajratildi. Natijada, 7 ta oilaviy poliklinikalarda aholiga tibbiy xizmat koʻrsatish sifati ancha oshdi.

Bayram tadbirida tuman tibbiyot birlashmasi boshligʻi Faxriddin Abdullayev va boshqalar soʻzga chiqib, hamkasblarini bayram bilan qutladilar.

Soʻzga chiqqanlar mamlakatimizda, xususan tumanimizda tibbiyot sohasini rivojlantirishga berilayotgan eʼtibor haqida toʻxtalib oʻtdi. Jumladan, birgina joriy yilda 11 ta olis va chekka mahallalarga maxsus konteynerlar oʻrnatilib, 1,3 mlrd soʻmlik taʼmirlash ishlari olib borilmoqda. Bu oʻz navbatida tuman markazidan olis hududlarda yashovchi 32 ming nafar aholiga tibbiy xizmat koʻrsatishga xizmat qiladi.

Qoraqalpogʻiston Respublikasi byudjeti hisobidan 4,9 mlrd soʻm evaziga 2 ta obʼektda, yaʼni Qangli oilaviy shifokor punkti va 72-sonli oilaviy poliklinikada qurilish-taʼmirlash ishlari amalga oshirilmoqda.

Mangʻit shahrida qiymati 14,3 mlrd. soʻmlik 90-oʻrinli yangi tugʻruq boʻlimi binosini qurish ishlari davom ettirilmoqda. Bularning barchasi aholiga tibbiy xizmat koʻrsatish sifatini yangi bosqichga olib chiqish va tibbiyot xodimlari uchun munosib shart-sharoitlar yaratish yoʻlida amalga oshirilayotgan islohotlar natijasidir.

Bayram tadbiri tuman madaniyat boʻlimi sanʼatkorlarining kuy-qoʻshiqlari bilan davom etdi.

Tadbirda ishtirok etgan tibbiyot xodimlari, jumladan, tuman Tibbiyot birlashmasi, Markaziy shifoxona, Tez tibbiy yordam boʻlimi, Koʻp tarmoqli markaziy poliklinika, shuningdek, hududlardagi qishloq oilaviy poliklinikalari, chekka qishloqlardagi “Mahalla tibbiyot punkt”lari va boshqa tibbiyot muassasalari faollari maroqli hordiq chiqardilar. Zero, ular nafaqat bayram kunida, balki hamisha eʼzoz va ehtiromga munosibdir.

Insonning hali xomila paytidan tortib, dunyoga kelishi, sogʻlom va barkamol boʻlib ulgʻayishi, voyaga yetishi jarayonida, bir soʻz bilan aytganda, umri davomida salomatlik posbonlarining koʻmagi va tavsiyalariga ehtiyoj boʻladi. Shunday ekan, har birimiz shifokor va hamshiralarning mashaqqatli mehnatlarini eʼtirof etib, fidokorona xizmatlari uchun taʼzim qilamiz.

Fursatdan foydalanib, yurtimizdagi barcha tibbiyot xodimlarini kasb bayrami bilan tabriklaymiz! Hamisha mashaqqatli mehnatlaringizning rohatini koʻrib, sharafli kasbingizdan kamol topib, davlatimiz va jamiyatimiz, el-yurtning eʼzozida yurishingizga tilakdoshmiz!

Tuman hokimligining Axborot xizmati.