АМУДАРЁ ТУМАНИДА ТИББИЁТ ХОДИМЛАРИ КУНИ КЕНГ НИШОНЛАНДИ

Мамлакатимизда 2006 йилдан буён ноябрь ойининг иккинчи якшанбаси Ўзбекистон Республикаси Тиббиёт ходимлари куни сифатида кенг нишонлаб келинади.

Сана муносабати билан 11 ноябрь куни Амударё тумани маданият марказида байрам тадбири ташкил қилинди. Унда тумандаги тиббиёт муассасалари ходимлари, шифокорлар ва ҳамширалар, кенг жамоатчилик вакиллари қатнашди.

Тадбирда туман ҳокими Султонбой Йўлдошев иштирок этиб, тиббиёт ходимларини касб байрами билан самимий табриклади. Таъкидланганидек, инсон борки, ҳаёти давомида албатта шифокор ёрдамига эҳтиёж сезади. Соғлом инсонгина оиласига наф келтириб, давлат ва жамият ривожига ҳисса қўшади. Шу боисдан ҳам, аҳоли саломатлигини асраш, тиббиёт ходимларининг меҳнатини эъзозлаш ва рағбатлантириш давлат сиёсатининг устувор вазифаларидан ҳисобланади.

Мамлакатимизда сўнгги йилларда бу соҳада ҳам салмоқли ишлар амалга оширилмоқда. Соғликни сақлаш тизимига илғор технологиялар жорий қилиниб, тиббиёт масканларининг моддий-техник базаси мустаҳкамланмоқда. Энг чекка қишлоқларда ҳам тиббий пунктлар, оилавий поликлиникалар ташкил қилиниб, аҳоли малакали тиббий хизмат билан тўлиқ қамраб олинмоқда. Энг муҳими, тиббиёт ходимларининг иш ҳақларини ошириш, ижтимоий муҳофазасини яхшилашга эътибор қаратилиб, жамиятда шифокорларнинг нуфузини ошириш борасида тизимли ишлар қилинмоқда.

Шундан кейин туман ҳокими секторлар раҳбарлари билан биргаликда тиббиёт соҳасининг бир гуруҳ илғорларига фахрий ёрлиқлар ва эсдалик совғалари топширилди.

Шуни алоҳида таъкидлаш жоизки, давлатимиз ва ҳукуматимиз томонидан тиббий хизмат сифатини янада яхшилаш мақсадида қатор амалий ишлар қилинмоқда. Соҳага ҳар йили маҳаллий бюджет ҳисобидан ҳам маблағ йўналтирилиб, тиббиёт масканларига турли ускуна ва жиҳозлар харид қилинмоқда.

Масалан, биргина жорий йилда тиббий асбоб-ускуналар харидига 1,2 млрд сўм, 2021 йилда 1,3 млрд сўм, 2020 йилда 2,1 млрд сўм маблағ ажратилди. Натижада, 7 та оилавий поликлиникаларда аҳолига тиббий хизмат кўрсатиш сифати анча ошди.

Байрам тадбирида туман тиббиёт бирлашмаси бошлиғи Фахриддин Абдуллаев ва бошқалар сўзга чиқиб, ҳамкасбларини байрам билан қутладилар.

Сўзга чиққанлар мамлакатимизда, хусусан туманимизда тиббиёт соҳасини ривожлантиришга берилаётган эътибор ҳақида тўхталиб ўтди. Жумладан, биргина жорий йилда 11 та олис ва чекка маҳаллаларга махсус контейнерлар ўрнатилиб, 1,3 млрд сўмлик таъмирлаш ишлари олиб борилмоқда. Бу ўз навбатида туман марказидан олис ҳудудларда яшовчи 32 минг нафар аҳолига тиббий хизмат кўрсатишга хизмат қилади.

Қорақалпоғистон Республикаси бюджети ҳисобидан 4,9 млрд сўм эвазига 2 та объектда, яъни Қангли оилавий шифокор пункти ва 72-сонли оилавий поликлиникада қурилиш-таъмирлаш ишлари амалга оширилмоқда.

Манғит шаҳрида қиймати 14,3 млрд. сўмлик 90 ўринли янги туғруқ бўлими биносини қуриш ишлари давом эттирилмоқда. Буларнинг барчаси аҳолига тиббий хизмат кўрсатиш сифатини янги босқичга олиб чиқиш ва тиббиёт ходимлари учун муносиб шарт-шароитлар яратиш йўлида амалга оширилаётган ислоҳотлар натижасидир.

Байрам тадбири туман маданият бўлими санъаткорларининг куй-қўшиқлари билан давом этди.

Тадбирда иштирок этган тиббиёт ходимлари, жумладан, туман Тиббиёт бирлашмаси, Марказий шифохона, Тез тиббий ёрдам бўлими, Кўп тармоқли марказий поликлиника, шунингдек, ҳудудлардаги қишлоқ оилавий поликлиникалари, чекка қишлоқлардаги “Маҳалла тиббиёт пункт”лари ва бошқа тиббиёт муассасалари фаоллари мароқли ҳордиқ чиқардилар. Зеро, улар нафақат байрам кунида, балки ҳамиша эъзоз ва эҳтиромга муносибдир.

Инсоннинг ҳали хомила пайтидан тортиб, дунёга келиши, соғлом ва баркамол бўлиб улғайиши, вояга етиши жараёнида, бир сўз билан айтганда, умри давомида саломатлик посбонларининг кўмаги ва тавсияларига эҳтиёж бўлади. Шундай экан, ҳар биримиз шифокор ва ҳамшираларнинг машаққатли меҳнатларини эътироф этиб, фидокорона хизматлари учун таъзим қиламиз.

Фурсатдан фойдаланиб, юртимиздаги барча тиббиёт ходимларини касб байрами билан табриклаймиз! Ҳамиша машаққатли меҳнатларингизнинг роҳатини кўриб, шарафли касбингиздан камол топиб, давлатимиз ва жамиятимиз, эл-юртнинг эъзозида юришингизга тилакдошмиз!

Туман ҳокимлигининг Ахборот хизмати.