FAXRIY OʻQITUVChINING 80-YILLIGI MUNOSABATI BILAN VOLEYBOL MUSOBAQASI OʻTKAZILDI

Oʻqituvchilik dunyodagi eng eʼzozli, sharafli va mashaqqatli kasbdir. Insonni murgʻakligidan ilm dunyosi sari yetaklab, komillik sari yoʻnaltiruvchi kasb egalari har qancha hurmat-u ehtiromlarga loyiqdir.

Amudaryo tumanidagi 11-sonli maktabda 40-yil jismoniy tarbiya fani oʻqituvchisi boʻlib ishlab, koʻplab shogirdlar yetishtirgan, tumanimizda sportning voleybol turi rivojiga munosib hissa qoʻshgan Gulmirza Sobirov ana shunday, el eʼzozidagi insonlarning biri.

Yaqinda Qipchoqdagi 1-sonli kasb-hunar maktabida faxriy oʻqituvchi Gulmirza Sobirovning 80-yilligiga bagʻishlab voleybol boʻyicha musobaqa tashkil etildi.

Daryoboʻyi mahallasi yoshlar yetakchisi Shahlo Oʻrozboyeva tashabbusi bilan tashkil etilgan musobaqada Daryoboʻyi, Uyshin mahallalari, Qipchoq, Choykoʻl, Qangli ovullari yoshlarining 5 ta voleybol jamoalari oʻzaro kuch sinashish uchun yigʻildilar.

Tadbirda Gulmirza Sobirovning 80-yilligi munosabati bilan Daryoboʻyi mahallasi yoshlar yetakchisi Shahlo Oʻrozboyeva, 22-sonli maktabning jismoniy tarbiya fani oʻqituvchisi Shavkat Nurekeyev, 65-sonli maktab oʻqituvchisi Sanjar Oʻrozboyev, Beshtom mahalla fuqarolar yigʻini raisi Ozod Siytimov, Qipchoq shaharcha fuqarolar yigʻini raisi Nuraddin Xolboyevlar ustoz oʻqituvchi haqida yigʻilganlarga iliq xotiralarini gapirib berdilar. Hudud aholisi orasida oʻz mehnatlari bilan ulkan eʼtibor qozongan faxriy muallimning taʼlim berishdagi fidoyiliklari, oʻziga xos uslublari tilga olindi.

Musobaqalar boshlanishiga start berilishi barcha yigʻilganlarning diqqat-eʼtiborini oʻyin maydoniga jamladi. Beshta jamoa aʼzolari ham gʻoliblik uchun astoydil intilib, hamjihatlikda murosasiz kurashdilar. Mahoratli va tajribali jismoniy tarbiya oʻqituvchilari musobaqani odillik bilan boshqarib bordilar.

Musobaqa yakunlangach, tashkilochilar – Gulmirza Sobirovning bir guruh shogirdlari uni tabarruk yoshi bilan qutlash uchun xonadoniga tashrif buyurishdi. Nuroniy ustozga xalqimizning milliy kiyimi – chopon kiydirib, sovgʻa-salomlar hadya etishdi.

Farzandlari, nevara-chevaralari ardogʻida keksalik gashtini surib yashayotgan Gulmirza Sobirov oʻzining 80-yilligi munosabati bilan musobaqa uyushtirishga bosh boʻlgan mahalla yoshlari yetakchisi Shahlo Oʻrozboyevaga, yoʻqlab kelgan barcha shogirdlariga minnatdorchilik bildirdi.

Shuni alohida eʼtirof etish kerakki, faxriy muallim 40-yil mobaynida maktabda oʻquvchilarning sogʻlom, jismonan baquvvat boʻlib voyaga yetishlari uchun fidoyilik qilish bilan birga, namunali oila sohibi sifatida turmush oʻrtogʻi bilan farzandlarini ham odobli, el xizmatiga kamarbasta qilib voyaga yetkazdilar. Uning barcha farzandlari ota kasbini eʼzozlab, turli maktablarda yosh avlodga taʼlim-tarbiya berishayapti.

Ustoz atrofida jam boʻlgan sobiq shogirdlar bular haqda, oʻzlarining hayotida Gulmirza Sobirovdan olgan saboqlarining nechogʻlik ahamiyatli boʻlganligi haqida suhbat qurdilar. Xotiralar tilga kirgan lahzalarda “Ustoz otangday ulugʻ” degan xalqimizning naqli yana bir bor oʻz ifodasini topganday boʻldi.

Oygul RAJABOVA.