“Ayollar daftari”da turuvchi ayollar uchun “Oilaviy munosabatlarni mustahkamlash” mavzusida psixologik trening oʻtkazildi

Xotin-qizlarning jamiyatdagi ijtimoiy-siyosiy mavqeini oshirish, bandligini taʼminlash, yashash sharoitini yaxshilash, bir soʻz bilan aytganda ularga munosib turmush sharoitini yaratish davlatimiz siyosatining ustuvor maqsadlaridan bir hisoblanadi.

Shu maqsadda ijtimoiy himoyaga muhtoj, bandligi taʼminlanmagan, tadbirkorlik qilish istagida boʻlgan, boquvchisi vafot etgan yoki jazoni ijro etish muassasalarida saqlanayotgan, uy-joyga muhtoj, nogironligi bor yoki qaramogʻida nogiron farzandlari boʻlgan ayollarga har tomonlama koʻmak koʻrsatish maqsadida “Ayollar daftari” joriy qilindi. Shuningdek, mazkur daftarga ruhiy tushkunlikka tushib qolgan, psixologik yordamga muhtoj ayollar ham kiritilib, ular bilan muntazam ravishda psixologik treninglar oʻtkazish yoʻlga qoʻyilgan. Maqsad − ayollarning stressdan ozod boʻlishiga, sogʻlom hayot tarziga qaytishlarida yordam berishdan iboratdir.

25-oktyabr kuni Amudaryo tumanining Toʻlqin ovul fuqarolar yigʻinida “Ayollar daftari”ga kiritilgan ayollar bilan navbatdagi trening mashgʻulotlari boʻlib oʻtdi. Mashgʻulotni 33-sonli umumtaʼlim maktabi psixologi Manzura Saparbayeva olib bordi.

Trening “Ayollar daftari”dagi ayollarning “Oilaviy munosabatlarni mustahkamlash” mavzusida boʻlib, ishtirokchilar 3 ta shart asosida oʻz dunyoqarashlarini, oila aʼzolari bilan yoʻlga qoʻygan munosabatlarini tahlil qildilar.

Birinchi shart − “Minnatdorchilik daraxti” sharti boʻlib, unda ishtirokchilar oʻzlarini oʻzlari sevgan mevali daraxtga qiyosladilar.

Kimdir oʻzini anor mevasi singari boʻlishni xohlashini, sababi anor sabr bilan meva tugib, pishib yetilgan sayin shirin va goʻzal boʻlishi, shuningdek, bagʻriga son-sanoqsiz donalarni jamlaganini aytib, oilaviy munosabatlarda ham sabrli va bagʻrikeng boʻlish lozimligini aytib oʻtdi.

Yana kimdir olma kabi boʻlishni istashini, sababi olmani barcha sevib isteʼmol qilishi, u yoz va kuz faslida son-sanoqsiz mevalar tugib barchaning dasturxonidan oʻrin olishini taʼkidladi. Psixologik trening davomida baʼzi ayollar oʻzini uzumga, tut daraxtiga oʻxshatib, uning foydali xususiyatlarini aytib oʻtishdi.

Ikkinchi shart − “Ayol kishining oiladagi oʻrni” mavzusi atrofida boʻlib, ayol kishi oilada, jamiyatda qanday muomala madaniyatiga ega boʻlishi lozimligi haqida suhbat qurildi. Tarqatma materiallar orqali ularning fikrlari oʻrganildi.

Yakuniy shart − “Kechiring va ozod boʻling” deb nomlandi. Ushbu shartda ayollar oilada kelib chiqqan har xil nizoli vaziyatlarda oʻzini tutish, bosiqlik bilan muammoni hal qilish boʻyicha koʻnikmaga ega boʻlishdi.

Har bir ishtirokchi pufakchalarni shishirib osmonga uchirib yubordi. Bu bilan ular jahl chiqqan paytda oʻzini tutishni, koʻngilda gina saqlamaslik, kechirimli boʻlish, boʻlib oʻtgan koʻngilsiz voqealarni unutish va bu singari holatlarga boshqa yoʻl qoʻymaslik boʻyicha koʻnikmalarga ega boʻlishdi.

Psixologik treningda har bir ishtirokchi faol qatnashib, psixolog tomonidan berilgan tavsiyalar asosida oiladagi rafiqalik, kelinlik, onalik vazifalarini chuqur anglab yetdilar. Shu bilan birga oiladagi sogʻlom muhitni yanada mustahkamlash boʻyicha bilimlarga ega boʻlishdi.

Jamiyatning bosh boʻgʻini boʻlmish oilalar mustahkamligi Vatanimiz farovonligida va gullab-yashnashida muhim ahamiyat kasb etadi. Sababi, oila tinch boʻlsa yurt ham tinch va osuda boʻladi.

Oilaviy kelishmovchiliklar va ajrimlarning oldini olishda mahallalarda yangidan ish boshlagan xotin-qizlar faollari ham samarali tarzda faoliyat yuritishmoqda.

Shuningdek, ayollarning bandligi taʼminlash, ularning jamiyatdagi ijtimoiy-siyosiy faolligini oshirish boʻyicha ham xotin-qizlar faollari tashabbusi bilan koʻplab ijobiy ishlar qilinmoqda.

Toʻlqin ovulining xotin-qizlar faoli Gavhar Babatayeva ham hokim yordamchisi bilan hamkorlikda mahallasida istiqomat qiluvchi 4 ming 7 nafar ayol-qizning har biri bilan muloqot qilib, ularning muammolariga yechim topishga intilmoqda.

Shu kunga qadar “Ayollar daftari”da turuvchi 142 nafar ayol-qizga turli yordamlar koʻrsatildi. Daftardagi 25 nafar ayol tikuvchilik boʻyicha sertifikat olib, oʻz faoliyatini yoʻlga qoʻydilar.

Ayollar uchun tabdirkorlikning turli yoʻnalishi boʻyicha berilayotgan yengilliklar, imtiyozlar ularni yanada ruhlantirib, yangidan yangi marralar sari chorlamoqda. Ayniqsa, tumandagi “Ayollar daftari”ga kiritilgan ayollarga koʻrsatilayotgan ijtimoiy yordamlar tufayli ularning yashash sharoiti yaxshilanib, doimiy daromad manbaiga ega boʻlishmoqda.

Tuman hokimligining Axborot xizmati.