AMERIKALIK PROFESSOR OʻQITUVChI TUMANIMIZDAGI IXTISOSLAShTIRILGAN MAKTABGA TAShRIF BUYuRDI

Ixtisoslashtirilgan maktablar tashkil etishga yagona yondoshuvni shakllantirish, ushbu maktablar tarmogʻini kengaytirish, moddiy-texnika bazasini mustahkamlash hamda taʼlim jarayoniga jalb qilish, iqtidorli yoshlarni aniqlash tanlash, oʻqitish va tarbiyalash tizimini takomillashtirish maqsadida Prezident farmoniga koʻra, mamlakatimizdagi barcha ixtisoslashtirilgan maktablar Prezident taʼlim muassasalari agentligi tizimiga oʻtkazilgan edi. Tumanimizning Mangʻit shahridagi Nukus davlat pedagogika instituti qoshidagi aniq fanlarga ixtisoslashtirilgan maktab ham Agentlik tizimidagi Amudaryo tuman ixtisoslashtirilgan maktabga aylantirildi. Avgust oyida qatʼiy talablar asosida oʻtkazilgan test sinovlari orqali oʻquvchilar maktabga qabul qilindi. Shuningdek, oʻqituvchilar ham belgilangan test sinovlari natijalariga koʻra ishga olindi.

Ayni kunda ushbu maktabda taʼlim-tarbiya jarayoni belgilangan standartlar asosida olib borilayotir. Shuningdek, ixtisoslik fanlaridan taʼlim dasturlarini takomillashtirish va amaliyotga joriy etish maqsadida matematika, informatika, fizika, kimyo, biologiya va chet tili fanlaridan taʼlim dasturlarini takomillashtirish jarayoniga malakali mahalliy va xorijiy mutaxassislarni jalb qilish, ilgʻor milliy hamda xorijiy tajribalardan foydalanishga alohida eʼtibor qaratilmoqda.

Shu maqsadda joriy yilning 22-oktyabrida tumanimizdagi ixtisoslashtirilgan maktabga ingliz tili fani oʻqituvchisi Mavluda Niyozova taklifiga binoan amerikalik professor oʻqituvchi ESN, yaʼni “ingliz tilida soʻzlashuvchi xalqlar” nomli loyiha doirasida Qoraqalpogʻiston Respublikasi va Xorazm viloyati ingliz tili oʻqituvchilarining malakasini oshirishga, taʼlim berish jarayoniga yangi innovatsion texnologiyalarni tatbiq etishga masʼul boʻlgan Maurin Runey tashrif buyurdi.

Mehmon ushbu muassasa sinfxonalarida ingliz tilini oʻqitish jarayonini kuzatdi va yuqori samaraga erishish borasida oʻz tavsiya va takliflarini berdi. Shuningdek, muassasada ingliz tilini qunt bilan oʻrgatayotgan trener oʻqituvchi Mavluda Niyozova rahbarligida tayyorlangan tadbirda ham ishtirok etdi.

Tadbirda oʻquvchilarning ingliz tilida ijro etgan sheʼrlari, qoʻshiqlari, sahna koʻrinishlari Maurin Runey xonimga juda yoqdi va ularning ingliz tilini chiroyli talaffuz qilishidan zavqlandi.

Tadbir soʻngida u oʻquvchilar bilan ingliz tilini qanday oʻrganayotganliklari, darsliklar haqida suhbatlashdi. Oʻquvchilarning Amerika taʼlim tizimiga oid bergan savollariga batafsil javoblar berdi va ularning qiziqishlaridan quvonganini izhor etdi.

Shu kuni mehmon tumanimizning Olmazor mahallasidagi Xotira xiyobonida, xiyobondagi muzeyda ham boʻlib, tariximizga oid eksponatlarni eʼtibor bilan tomosha qildi va tumanimizga tashrifidan juda mamnun boʻldi.

Maurin Runey qadimiy Chilpiq qoʻrgʻonida ham boʻlib, obida tarixi haqidagi maʼlumotlarni qiziqib tingladi. Amerikalik professor oʻqituvchining tashrifi va bu yerdagi taʼlim haqidagi iliq fikrlari muassasada taʼlim olayotgan oʻquvchilarga ham, oʻqituvchilarga ham yuqori motivatsiya berdi. Ular tadbirlarni tashkillashtirgan muassasa oʻqituvchilari Mavluda Niyozova, Mohira Shomurodova, Muhayyo Toirovalardan juda minnatdor boʻldilar.

Oygul RAJABOVA.