АМЕРИКАЛИК ПРОФЕССОР ЎҚИТУВЧИ ТУМАНИМИЗДАГИ ИХТИСОСЛАШТИРИЛГАН МАКТАБГА ТАШРИФ БУЮРДИ
Ихтисослаштирилган мактаблар ташкил этишга ягона ёндошувни шакллантириш, ушбу мактаблар тармоғини кенгайтириш, моддий-техника базасини мустаҳкамлаш ҳамда таълим жараёнига жалб қилиш, иқтидорли ёшларни аниқлаш танлаш, ўқитиш ва тарбиялаш тизимини такомиллаштириш мақсадида Президент фармонига кўра, мамлакатимиздаги барча ихтисослаштирилган мактаблар Президент таълим муассасалари агентлиги тизимига ўтказилган эди. Туманимизнинг Манғит шаҳридаги Нукус давлат педагогика институти қошидаги аниқ фанларга ихтисослаштирилган мактаб ҳам Агентлик тизимидаги Амударё туман ихтисослаштирилган мактабга айлантирилди. Август ойида қатъий талаблар асосида ўтказилган тест синовлари орқали ўқувчилар мактабга қабул қилинди. Шунингдек, ўқитувчилар ҳам белгиланган тест синовлари натижаларига кўра ишга олинди.
Айни кунда ушбу мактабда таълим-тарбия жараёни белгиланган стандартлар асосида олиб борилаётир. Шунингдек, ихтисослик фанларидан таълим дастурларини такомиллаштириш ва амалиётга жорий этиш мақсадида математика, информатика, физика, кимё, биология ва чет тили фанларидан таълим дастурларини такомиллаштириш жараёнига малакали маҳаллий ва хорижий мутахассисларни жалб қилиш, илғор миллий ҳамда хорижий тажрибалардан фойдаланишга алоҳида эътибор қаратилмоқда.
Шу мақсадда жорий йилнинг 22 октябрида туманимиздаги ихтисослаштирилган мактабга инглиз тили фани ўқитувчиси Мавлуда Ниёзова таклифига биноан америкалик профессор ўқитувчи ESN, яъни “инглиз тилида сўзлашувчи халқлар” номли лойиҳа доирасида Қорақалпоғистон Республикаси ва Хоразм вилояти инглиз тили ўқитувчиларининг малакасини оширишга, таълим бериш жараёнига янги инновацион технологияларни татбиқ этишга масъул бўлган Маурин Руней ташриф буюрди.
Меҳмон ушбу муассаса синфхоналарида инглиз тилини ўқитиш жараёнини кузатди ва юқори самарага эришиш борасида ўз тавсия ва таклифларини берди. Шунингдек, муассасада инглиз тилини қунт билан ўргатаётган тренер ўқитувчи Мавлуда Ниёзова раҳбарлигида тайёрланган тадбирда ҳам иштирок этди.
Тадбирда ўқувчиларнинг инглиз тилида ижро этган шеърлари, қўшиқлари, саҳна кўринишлари Маурин Руней хонимга жуда ёқди ва уларнинг инглиз тилини чиройли талаффуз қилишидан завқланди.
Тадбир сўнгида у ўқувчилар билан инглиз тилини қандай ўрганаётганликлари, дарсликлар ҳақида суҳбатлашди. Ўқувчиларнинг Америка таълим тизимига оид берган саволларига батафсил жавоблар берди ва уларнинг қизиқишларидан қувонганини изҳор этди.
Шу куни меҳмон туманимизнинг Олмазор маҳалласидаги Хотира хиёбонида, хиёбондаги музейда ҳам бўлиб, тарихимизга оид экспонатларни эътибор билан томоша қилди ва туманимизга ташрифидан жуда мамнун бўлди.
Маурин Руней қадимий Чилпиқ қўрғонида ҳам бўлиб, обида тарихи ҳақидаги маълумотларни қизиқиб тинглади. Америкалик профессор ўқитувчининг ташрифи ва бу ердаги таълим ҳақидаги илиқ фикрлари муассасада таълим олаётган ўқувчиларга ҳам, ўқитувчиларга ҳам юқори мотивация берди. Улар тадбирларни ташкиллаштирган муассаса ўқитувчилари Мавлуда Ниёзова, Моҳира Шомуродова, Муҳайё Тоировалардан жуда миннатдор бўлдилар.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
