Olmazor mahallasida tuman hokimining yoshlar bilan navbatdagi uchrashuvi boʻlib oʻtdi

Mamlakatimizda yosh avlod kelajagi hamisha davlat siyosatining markazida boʻlib kelmoqda. Bugungi kunda ham yoshlar hayotida yuzaga kelgan muammolarni bartaraf etish uchun barcha sohalarda keng koʻlamli islohotlar jadallik bilan olib borilmoqda. Ayniqsa, bunda yoshlarning hayotidagi mavjud muammo va kamchiliklarni bartaraf etishda muntazam ravishda oʻtkazilib kelinayotgan hokim va yoshlar uchrashuvlari muhim ahamiyatga ega boʻlmoqda.

Amudaryo tumanining Olmazor mahallasi hududidagi 82-sonli maktabda tuman hokimi Sultonboy Yoʻldashevning yoshlar bilan navbatdagi uchrashuvi boʻlib oʻtdi.

Unda tuman Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov, tegishli korxona, tashkilot masʼullari hamda mahallaning faol yoshlari ishtirok etishdi.

Uchrashuvda tuman Xalq qabulxonasi boʻlimi mudiri Erkin Rajabov yoshlarning oʻqib bilim olishi, kasb-hunar egallashlari uchun barcha sharoitlar yaratilganini taʼkidlab yoshlarni doimo olgʻa intilishga, qunt bilan oʻqib bilim olishga chorladi.

Shundan soʻng, tuman hokimi Sultonboy Yoʻldashev Oʻzbekiston Respublikasi Prezidentining 2022-yil 31-avgust kungi “Qoraqalpogʻiston Respublikasida tadbirkorlik, innovattsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi farmonining mazmun-mohiyati haqida batafsil tushuntish berdi.

Tuman hokimi farmonda yoshlar uchun koʻplab kulayliklar, imkoniyatlar yaratilganini taʼkidladi. Jumladan, oilaviy tadbirkorlikni rivojlantirish, yosh tadbirkorlar uchun yaratilgan yengilliklar, oliy taʼlim muassasalari uchun ajratilgan qoʻshmcha qabul kvotalari xususida toʻxtalib, yoshlarni shijoat bilan olgʻa intilishga chorladi.

Uchrashuvda mahallada faoliyat yuritayotgan hokim yordamchisi, yoshlar yetakchisining faoliyati samaradorligi ham taxlil qilindi. Aytish kerakki, yoshlar yetakchisi mahalladagi 14 yoshdan 30 yoshgacha boʻlgan yoshlar bilan birgalikda ishlashib, ularning boʻsh vaqtini mazmunli oʻtkazishda tashabbus koʻrsatib kelmoqda.

Tashkil etilayotgan turli sport musobaqalari, madaniy-maʼrifiy tadbirlar, ayniqsa, “Besh tashabbus olimpiadasi”da iqidorli yoshlar aniqlanib, munosib oʻrinlarni egallashmoqda.

Uchrashuvda mahallaning hokim yordamchisi tavsiyanomasiga asosan tadbirkorlik qilish istagidagi yoshlarga ajratilgan imtiyozli kreditlar, subsidiyalar xususida maʼlumot berib oʻtildi.

Shuningdek, hokim yordamchisi tomonidan mahalla infratuzilmasini yaxshilash, tadbirkorlik obʼektlarini koʻpaytirish, aholi bandligini taʼminlash boʻyicha joriy yilning 9 oyi davomida amalga oshirilgan ishlar sarhisob qilindi.

Uchrashuv yakunida tuman hokimi yoshlardan kelib tushgan turli mazmundagi savollarga javob berish barobarida tadbirkorlik qilish istagida boʻlgan yoshlarga oʻzining maslahat va tavsiyalarini ham berib oʻtdi.

Tuman hokimligining Axborot xizmati.