TIL – MILLAT TIMSOLI

Oʻzbek tili turkiy tillar oilasiga mansub boʻlib, hozirgi kunda Yer yuzi aholisining qariyib 50 million aholisi uchun asosiy muloqot vositasidir. Til-millatning borligi, millat birligi va butunligining timsolidir. Har qanday xalqning tarixi ham, dunyoda oʻzining kimligini anglash, jamiyatning kelajagini koʻrish idroki ham shu timsolga koʻra mavjuddir. Bu timsol barcha kishilarimizning bir yurt fuqarolari sifatida birlashuviga xizmat qilmoqda. Bu holat tabiiyki, oʻzbek tili rivojining jadallashuviga, imkoniyatlarining yanada kengayishiga ham koʻmak bermoqda.

Milliy maʼnaviyatimizning ajralmas qismi boʻlgan ona tilimizga 1989-yil 21-oktyabr kuni davlat tili maqomi berilgan. Shu kundan eʼtiboran har yili bu sana bayram sifatida yurtimizning turli goʻshalarida koʻtarinki ruhda nishonlanib kelmoqda.

Oʻzbek tili mustaqil davlatimizning bayrogʻi, gerbi, madhiyasi, Konstitutsiyasi qatorida turadigan, qonun yoʻli bilan himoya qilinadigan timsollaridan biriga aylandi. Oʻzbek tiliga davlat tili maqomining berilishi bu tilning nufuzini oshiribgina qolmay, yurtimizning turli millatga mansub fuqarolari oʻzbek tilini davlatimizning muqaddas timsoli sifatida oʻrganmoqdalar, bu tilda gaplashmoqdalar, unga yuksak ehtirom koʻrsatmoqdalar.

Ona tili va adabiyot fani oʻqituvchisi sifatida shuni alohida eʼtirof etishim kerakki, maktabda oʻquvchilarda nutq madaniyatini rivojlantirish oʻzbek tili taʼlimining asosiy vazifalaridan biri sanaladi. Taʼlim jarayonida oʻquvchilarga nutqda milliy tilning oʻziga xosligi, maʼno jihatidan aniqligiga, soʻzlarni qoʻllashga eʼtibor berishi kerakligi doim tushuntirib boriladi. Shu bilan birga adabiy tilning orfoepik meʼyorlari, yozma shakli, yaʼni orfografiya, uslub va shu kabi meʼyorlar haqida koʻnikmalar hosil qilinadi. Nutq madaniyati adabiy til meʼyorlari asosida oʻquvchilarning aqliy va amaliy tushunchalarini kengaytirish natijasida shakllanadi.

Ulugʻ bobomiz Alisher Navoiy “Mahbub-ul-qulub” asarida taʼkidlaganidek, “Til... nutqning qurolidir. Agar nutq nomaʼqul boʻlib chiqsa, tilning ofatidir”. Millatimiz qadr-qimmatining bosh ustuni boʻlmish tilimiz hurmatini joyiga qoʻyishday sharafli ishda hamisha faol boʻlish, uni sofligicha asrab-avaylash har birimiz uchun ham farz, ham qarzdir.

Anora Qozoqova, 65-sonli maktabning ona tili va adabiyot fani oʻqituvchisi.