Kitob bilan yuksalgan ayol — millat kelajagi

Insoniyat tamadduni tarixiga nazar tashlar ekanmiz, jamiyatning maʼnaviy qiyofasini belgilovchi eng muhim mezonlardan biri bu ayolning ilm-maʼrifatga boʻlgan intilishi ekaniga guvoh boʻlamiz. “Kitob” va “Ayol” tushunchalari bir-biriga shu qadar uygʻun va payvandki, ularni ayro holda tasavvur qilish qiyin. Bilimli ayol nafaqat oʻz hayotini, balki butun bir jamiyatning kelajagini nurafshon etishga qodir qudratli kuchdir. Amudaryo tumani Axborot-kutubxona markazida tashkil etilgan «Kitob bilan yuksalgan ayol» nomli davra suhbatining mazmun-mohiyatida ham «Bir erkak oʻqisa – bir inson bilimli boʻladi, bir ayol oʻqisa – butun millat bilimli boʻladi» degan hayotiy hikmat mujassam boʻldi.

Axborot-kutubxona markazida boʻlib oʻtgan mazkur tadbirning asosiy diqqat markazida bolalar kitobxonligini rivojlantirishda ayolning va oilaning tutgan oʻrni mavzusi boʻldi. Davra suhbatining mehmoni – Amudaryo tuman hokimi oʻrinbosari, Oila va xotin-qizlar boʻlimi boshligʻi Goʻzal Sabirova oʻz nutqida bu boradagi muhim jihatlarga toʻxtalib oʻtdi. Taʼkidlandiki, bolani kitobga doʻst qilish – unga dunyoni anglash kalitini berish bilan barobardir. Oila bu ilk taʼlim dargohi, ota-ona esa farzand uchun hayotdagi eng birinchi va eng muhim muallimlardir. Agar biz bugun farzandlarimiz qalbida kitobga nisbatan samimiy muhabbat uygʻota olsak, ertaga bilimli, yuksak maʼnaviyatli va chin vatanparvar avlodni tarbiyalagan boʻlamiz.

Tadbirda mahallalarning faol onaxonlari va yosh kitobxonlarning ishtirok etishi avlodlar oʻrtasidagi maʼnaviy koʻprikning yanada mustahkamlanishiga xizmat qildi. Onaxonlarning hayotiy tajribalari va yoshlarning bilimga boʻlgan ishtiyoqi davra suhbatiga oʻzgacha fayz bagʻishladi. Muloqot davomida har bir ishtirokchi kitobxonlik madaniyatini oshirish boʻyicha oʻz fikr-mulohazalarini oʻrtoqlashdi. Yoshlarni kitob mutolaasiga chorlovchi samimiy soʻzlar, badiiy asarlarning inson ruhiyatiga taʼsiri haqidagi hayotiy misollar barchada katta taassurot qoldirdi. Bu kabi tadbirlar jamiyatimizda kitobxonlik muhitini yanada yaxshilashga, ayollarning ijtimoiy-siyosiy faolligini oshirish bilan birga, ularning maʼnaviy olamini yuksaltirishga xizmat qiladi.

Bugungi tezkor zamon ayoldan nafaqat uy ishlari yoki farzand tarbiyasini, balki keng dunyoqarash va intellektual salohiyatni ham talab etmoqda. Davra suhbati davomida aynan elektron va bosma kitoblarning uygʻunligi, ayollarning zamonaviy ilm-fan yutuqlaridan xabardor boʻlishi jamiyatdagi ijtimoiy barqarorlikning asosiy omili ekani eʼtirof etildi. Mutolaa qiladigan ayol – bu har qanday murakkab vaziyatda toʻgʻri qaror qabul qila oladigan, oiladagi maʼnaviy muhitni sogʻlom saqlashga qodir boʻlgan kuchli shaxs boʻlishi qayd qilindi.

Shuningdek, uchrashuvda kitobxonlik madaniyatini oilada shakllantirishning amaliy usullari haqida ham qizgʻin fikr almashildi. Ota-onaning farzand koʻz oʻngida kitob oʻqishi – bu har qanday nasihatdan koʻra taʼsirliroq tarbiya usuli ekani hayotiy misollar bilan tushuntirib berildi. Mahalla faollari va onaxonlar oʻz nutqlarida xonadonlarda shaxsiy kutubxonalarni tashkil etish, bolalarga sovgʻa sifatida kitob berish anʼanasini qayta tiklash zarurligini taʼkidladilar. Bu kabi jonli muloqotlar ayollarning nafaqat bilim olishiga, balki jamiyatda oʻz oʻrnini topishi va kelajak avlod oldidagi masʼuliyatini yanada chuqurroq his qilishiga xizmat qilishi shubhasizdir.

Xulosa oʻrnida aytish mumkinki, kitob bilan yuksalgan ayol – bu baxtli va farovon jamiyat demakdir. Amudaryo tumanida oʻtkazilgan ushbu maʼnaviy-maʼrifiy uchrashuv yana bir bor isbotladiki, kitob va maʼrifat bor joyda doimo yuksalish, taraqqiyot va fayz-baraka boʻladi. Zero, kitob sahifalariga muhrlangan bilimlar asrlar osha insoniyatga toʻgʻri yoʻlni koʻrsatib kelgan va bundan keyin ham jamiyatimizning maʼnaviy ustuni boʻlib qolaveradi. Shunday ekan, farzandlarimizga nafaqat moddiy boylik, balki eng avvalo kitobga boʻlgan mehr va yuksak maʼnaviyatni meros qilib qoldirishimiz lozim.