INShOLAR TANLOVI GʻOLIBLARI TAQDIRLANDI

Oʻquvchi-yoshlarni milliy va umuminsoniy qadriyatlarga sodiqlik ruhida tarbiyalash, ularning maʼnaviy, estetik, axloqiy dunyoqarashini kengaytirish, tafakkurini turli xil yot gʻoyalar taʼsiridan himoya qilish hamda yurtimizning chinakam fidoyilari etib tarbiyalash bugungi kunning eng dolzarb vazifasidir. Chunki yoshlar ertagi kunimizning egalaridir. Shu boisdan ularning intillekual va ijodiy salohiyatini yuksaltirish mamlakatimizda amalga oshirilayotgan islohotlarga daxldorlik tuygʻularini tarbiyalash juda muhim.

Yaqinda tumanimiz maktablarining 9-11-sinflari oʻquvchilari oʻrtasida Respublika Maʼnaviyat va maʼrifat markazi Amudaryo tuman boʻlinmasi, tuman Xalq taʼlimi boʻlimi va “Jayxun ilhomlari” nodavlat notijorat tashkiloti hamkorligida 15-oktyabr – Xalqaro qishloq ayollari kuni munosabati bilan “Mening qishlogʻim”, “Mening onam – qishlogʻim fayzi” mavzularida oʻtkazilgan insholar tanlovi ham shu maqsadga xizmat qiladi.

Insholar tanlovida tumanimizdagi 85 ta maktablarning 9-11-sinflarida taʼlim olayotgan iqtidorli oʻgʻil-qizlar ishtirok etdilar.

Shuni alohida eʼtirof etish, joizki, bugungi kun yoshlarining dunyoqarashi keng. Taʼlim muassasalarida ularning zamonaviy axborot-kommunikatsion texnologiyalaridan foydalanishlari, bilimlarini oshirishlari uchun barcha sharoitlar yaratilgan. Internet kutubxonalar, maktabdagi kutubxonalardagi mavjud nodir adabiyotlarni mutolaa qilish oʻquvchilarning ijodiy qobiliyatini yuksaltirishga xizmat qilayotir. Buni tumanimizda badiiy ijod bilan shugʻullanayotgan oʻquvchilar soni ortib, bir qancha oʻquvchilarning kitoblari nashrdan chiqayotganida ham yaqqol koʻrish mumkin. Tumanimizda tashkil etilgan nashriyot yoshlarning ijod mahsulini chop etishga tayyorlashga ulkan hissa qoʻshayotir. Shuningdek, “Jayxun ilhomlari” nodavlat notijorat tashkiloti ijodkor yoshlarni qoʻllab-quvvatlab, ularning oʻzligini namoyon etishlariga sharoit yaratmoqda.

“Xalqaro qishloq ayollari kuni” munosabati bilan hamkor tashkilotlarning birgalikda oʻtkazgan tanlovi ham ijodkor oʻquvchilarning iqtidorlarini sinovdan oʻtkazishga bir minbar boʻldi, deyish mumkin.

Tanlovga taqdim etilgan insholarning tahlili ularning mavzu yuzasidan mustaqil va erkin fikrlari borligini koʻrsatdi.

Hakamlar hayʼati qaroriga koʻra tanlovda uchinchi oʻrinni 39-sonli maktabning 9-sinf oʻquvchisi Sevinch Bozorboyeva, ikkinchi oʻrinni 84-sonli maktabning 11-sinf oʻquvchisi Mardona Rahimboyeva, birinchi oʻrinni esa 73-sonli maktabning 11-sinf oʻquvchisi Komila Gulimmatovalar egalladilar. Shuningdek, 27-, 18-, 5-, 2-, 69- va 85-sonli maktablar oʻquvchilari turli nominatsiyalar boʻyicha ragʻbatlantirildi.

Tanlov gʻoliblari Respublika Maʼnaviyat va maʼrifat markazi tuman boʻlinmasi tomonidan ragʻbatlantirildi.

Insholar tanlovi tumanimiz maktablarida taʼlim olayotgan oʻquvchi-yoshlarning ijodiy qobiliyatini yuksaltirishga xizmat qiladi.

Oygul RAJABOVA.