15-oktyabr − Xalqaro qishloq ayollari kuni

Mehnatdan baxt topgan qishloq ayoli

Bugun mamlakatimizda turli sohalarda faoliyat yuritayotgan xotin-qizlar oʻz aql-zakovati, mehnati bilan jamiyat rivojiga hissa qoʻshmoqda. Quvonarlisi, boshqa sohalar qatori qishloq xoʻjaligida faoliyat yuritib, fermerlik bilan shugʻullanayotgan ayollar ham koʻplab topiladi. Amudaryo tumani markazidan ancha olisda joylashgan Nazarxan ovulida istiqomat qiluvchi Qizlargul Doʻsimbetova ham yurtimiz forovonligiga, aholi dasturxonlarining toʻkinligiga oʻz hissasini qoʻshib kelayotgan fermer ayollardan biri.

1984-yilda Nukus tumanidan Amudaryo tumanining Nazarxan ovuliga kelin boʻlib tushgan mehnatkash ayol 2002-yilda oʻzining fermerlik faoliyatini yoʻlga qoʻydi. Umr yoʻldoshi Qazaqbay Bekpoʻlatov bilan birgalikda 3 oʻgʻil va bir qizni tarbiyalab, voyaga yetkazdi. Ikki nafar oʻgʻlini qishloq xoʻjaligi institutida oʻqitib, ularga ham oʻzidagi bor bilim va tajribani oʻrgatib kelmoqda.

Tadbirkor ayol bugungi kun fermerlari koʻp tarmoqli boʻlishi zarur degan tamoyilga rioya qilgan holda fermer xoʻjaligi dalalarida paxta, gʻalla, poliz ekinlarini yetishtirishdan tashqari 2 bosh zotdor sigir, 300dan ortiq parranda hamda asalarilar boqayapti. Qizlargul Doʻsimbetovaning kelinlari har kuni ertalab sigirlaridan 50 litr sut sogʻib olib, Nukus shahriga joʻnatadi.

Shuningdek, fermer oʻz mahallasidagi yoshlarning bandligini taʼminlashga ham oʻz hissasini qoʻshmoqda. Muhtaram Prezidentimizning tegishli qaroriga muvofiq mahalladagi 4 nafar ishsiz yoshlarga 25 sotixdan yer ajratib berildi.

Qizlargul Doʻsimbetova yoshlarga ekin ekish, parvarishlash hamda vaqtida yigʻib-terib olish boʻyicha oʻzining maslahtlarini berib, beminnat yordamlar koʻrsatib kelmoqda. Undan tashqari, sahovatpesha fermer mahallasidagi ishsiz yoshlardan biri Jamshidbek Yoʻldoshevga bir bosh sigir berdi.

Bugungi kunda Qizlargul Doʻsimbetovaning fermer xoʻjaligidagi 61 gektar yer maydonlarida paxta, gʻalla, shuningdek qishloq xoʻjaligining boshqa mahsulotlari yetishtirilib, aholi bandligiga va mamlakat iqtisodiyoti barqarorligiga hissa qoʻshilmoqda.

2021-yilda fermer ayolning mashaqqatli mehnatlari eʼtirof etilib, “Qishloq xoʻjaligi fidoyisi” koʻkrak nishoni bilan taqdirlandi.

13-oktyabr kuni fermerning Toshkent shahrida 15-oktyabr − “Xalqaro qishloq ayollari kuni” munosabati bilan “Qishloq hududlarida ayollar tadbirkorligini rivojlantirish istiqbollari va aholining oziq-ovqat xavfsizligini taʼminlashdagi ishtiroki” mavzusida oʻtkazilgan Respublika forumiga taklif etilgani yana bir quvonchli voqea boʻldi.

Barchaga ayonki, qishloq ayollarining mehnati shahar ayollarinikidan ancha ogʻirroq. Hatto, eng rivojlangan mamlakatlarda ham ular ishdan boʻsh vaqtlarida oʻz tomorqalarida qishloq xoʻjaligi mahsulotlarini yetishitirib, aholi farovonligiga va iqtisodiyot rivojiga oʻz hissalarini qoʻshib kelishgan.

Qizlargul Doʻsimbetova ham nafaqada boʻlishiga qaramasdan har bir kunini dala boshida, terimchilar bilan birgalikda oʻtkazadi. Bu bilan ham cheklanib qolmasdan, jamoat ishlarida ham hamisha faol. Mahallasida tashkil etilgan “Oqila ayollar” harakati aʼzosi. Mahallaning xotin-qizlar faoli Guljahon Ibragimova bilan birgalikda mahallalardagi notinch oilalar bilan suhbatlashib, ajrimlarning oldini olish ishlariga hissa qoʻshib kelmoqda.

Tinib tinchimas fermer ayol dangasalik va erinchoqlik insonga maʼnaviy va iqtisodiy cheklovlar qoʻyib, hayotida muammolar koʻpayishiga olib keladi deb hisoblaydi, mehnat hamisha insonni ulugʻlashiga, halol mehnat qilib, elga naf keltirgan kishi hech qachon kam boʻlmasligiga ishonadi.

20-yildan ortiq vaqt mobaynida fermerlik faoliyati bilan shugʻullanib kelayotgan ayol barchani mehnatsevar boʻlib yashashga, ayniqsa yoshlarni bugungi yaratilayotgan imkoniyatlardan samarali foydalanishga chaqiradi.

Ha, chindan ham, haqiqiy baxt – oilang xotirjamligi, mehantlaring rohatini koʻrib yashashdir. Biz ham Qizlargul Doʻsimbetova singari barcha mehnatkash ayollarimizni 15-oktyabr − “Xalqaro qishloq ayollari kuni” bilan tabriklaymiz!

Tuman hokimligining Axborot xizmati.