15 октябрь − Халқаро қишлоқ аёллари куни

Меҳнатдан бахт топган қишлоқ аёли

Бугун мамлакатимизда турли соҳаларда фаолият юритаётган хотин-қизлар ўз ақл-заковати, меҳнати билан жамият ривожига ҳисса қўшмоқда. Қувонарлиси, бошқа соҳалар қатори қишлоқ хўжалигида фаолият юритиб, фермерлик билан шуғулланаётган аёллар ҳам кўплаб топилади. Амударё тумани марказидан анча олисда жойлашган Назархан овулида истиқомат қилувчи Қизларгул Дўсимбетова ҳам юртимиз форовонлигига, аҳоли дастурхонларининг тўкинлигига ўз ҳиссасини қўшиб келаётган фермер аёллардан бири.

1984 йилда Нукус туманидан Амударё туманининг Назархан овулига келин бўлиб тушган меҳнаткаш аёл 2002 йилда ўзининг фермерлик фаолиятини йўлга қўйди. Умр йўлдоши Қазақбай Бекпўлатов билан биргаликда 3 ўғил ва бир қизни тарбиялаб, вояга етказди. Икки нафар ўғлини қишлоқ хўжалиги институтида ўқитиб, уларга ҳам ўзидаги бор билим ва тажрибани ўргатиб келмоқда.

Тадбиркор аёл бугунги кун фермерлари кўп тармоқли бўлиши зарур деган тамойилга риоя қилган ҳолда фермер хўжалиги далаларида пахта, ғалла, полиз экинларини етиштиришдан ташқари 2 бош зотдор сигир, 300дан ортиқ парранда ҳамда асаларилар боқаяпти. Қизларгул Дўсимбетованинг келинлари ҳар куни эрталаб сигирларидан 50 литр сут соғиб олиб, Нукус шаҳрига жўнатади.

Шунингдек, фермер ўз маҳалласидаги ёшларнинг бандлигини таъминлашга ҳам ўз ҳиссасини қўшмоқда. Муҳтарам Президентимизнинг тегишли қарорига мувофиқ маҳалладаги 4 нафар ишсиз ёшларга 25 сотихдан ер ажратиб берилди.

Қизларгул Дўсимбетова ёшларга экин экиш, парваришлаш ҳамда вақтида йиғиб-териб олиш бўйича ўзининг маслаҳтларини бериб, беминнат ёрдамлар кўрсатиб келмоқда. Ундан ташқари, саҳоватпеша фермер маҳалласидаги ишсиз ёшлардан бири Жамшидбек Йўлдошевга бир бош сигир берди.

Бугунги кунда Қизларгул Дўсимбетованинг фермер хўжалигидаги 61 гектар ер майдонларида пахта, ғалла, шунингдек қишлоқ хўжалигининг бошқа маҳсулотлари етиштирилиб, аҳоли бандлигига ва мамлакат иқтисодиёти барқарорлигига ҳисса қўшилмоқда.

2021 йилда фермер аёлнинг машаққатли меҳнатлари эътироф этилиб, “Қишлоқ хўжалиги фидойиси” кўкрак нишони билан тақдирланди.

13 октябрь куни фермернинг Тошкент шаҳрида 15 октябрь − “Халқаро қишлоқ аёллари куни” муносабати билан “Қишлоқ ҳудудларида аёллар тадбиркорлигини ривожлантириш истиқболлари ва аҳолининг озиқ-овқат хавфсизлигини таъминлашдаги иштироки” мавзусида ўтказилган Республика форумига таклиф этилгани яна бир қувончли воқеа бўлди.

Барчага аёнки, қишлоқ аёлларининг меҳнати шаҳар аёллариникидан анча оғирроқ. Ҳатто, энг ривожланган мамлакатларда ҳам улар ишдан бўш вақтларида ўз томорқаларида қишлоқ хўжалиги маҳсулотларини етишитириб, аҳоли фаровонлигига ва иқтисодиёт ривожига ўз ҳиссаларини қўшиб келишган.

Қизларгул Дўсимбетова ҳам нафақада бўлишига қарамасдан ҳар бир кунини дала бошида, теримчилар билан биргаликда ўтказади. Бу билан ҳам чекланиб қолмасдан, жамоат ишларида ҳам ҳамиша фаол. Маҳалласида ташкил этилган “Оқила аёллар” ҳаракати аъзоси. Маҳалланинг хотин-қизлар фаоли Гулжаҳон Ибрагимова билан биргаликда маҳаллалардаги нотинч оилалар билан суҳбатлашиб, ажримларнинг олдини олиш ишларига ҳисса қўшиб келмоқда.

Тиниб тинчимас фермер аёл дангасалик ва эринчоқлик инсонга маънавий ва иқтисодий чекловлар қўйиб, ҳаётида муаммолар кўпайишига олиб келади деб ҳисоблайди, меҳнат ҳамиша инсонни улуғлашига, ҳалол меҳнат қилиб, элга наф келтирган киши ҳеч қачон кам бўлмаслигига ишонади.

20 йилдан ортиқ вақт мобайнида фермерлик фаолияти билан шуғулланиб келаётган аёл барчани меҳнатсевар бўлиб яшашга, айниқса ёшларни бугунги яратилаётган имкониятлардан самарали фойдаланишга чақиради.

Ҳа, чиндан ҳам, ҳақиқий бахт – оиланг хотиржамлиги, меҳантларинг роҳатини кўриб яшашдир. Биз ҳам Қизларгул Дўсимбетова сингари барча меҳнаткаш аёлларимизни 15 октябрь − “Халқаро қишлоқ аёллари куни” билан табриклаймиз!

Туман ҳокимлигининг Ахборот хизмати.