Jayxun ilhomlari

Bayram muborak
Jajji  qoʻlchalarga tutqazib qalam,
Qiynalib harflarni oʻrgatar arang.
Kasbi orqasidan boʻlgan muhtaram,
Bayramingiz qutlugʻ, aziz ustozlar!

Mehrini shogirddan darigʻ tutmagan,
Muloyim soʻzlardan nari oʻtmagan.
Oʻzi qiynalsa ham minnat etmagan,
Bayramingiz qutlugʻ, aziz ustozlar!

Bir paytlar kasbining boʻlmagan qadri,
Hech kimga aytolmay ichida dardi.
Hozir eʼzozlanar ustozning qadri,
Bayramingiz qutlugʻ, aziz ustozlar!

Shogirdlar quvonchi sigʻmay ichiga,
Oliygohga kirar bilim kuchi-la.
Bularning hammasi ustoz kuchi-da,
Bayramingiz qutlugʻ, aziz ustozlar!

Gina-kuduratdan boʻlmadi asar,
Bayram shodligidan ayirma, agar.
Farhodning tilagi boʻldi muxtasar,
Bayramingiz qutlugʻ, aziz ustozlar!
Farhod Avaz.

Ota-onamizday aziz
Farzandim, deb ardoqlaguvchi,
Sal kechiksam, soʻroqlaguvchi.
Onamizday bagʻriga bosib,
Buyuklarga qiyoslaguvchi.

Yutuqlardan koʻnglimiz toshsa,
Havolanib, kibrimiz oshsa.
Qanotiga olgisi kelar,
Tergab, yoʻlga solgisi kelar.

Otamizday moʻʼtabardir u,
Bari ishdan xabardordir u.
Hayotimiz osmoni aro,
Eng jonfido, yalovbardor u.
Mashhura Rajabova,
 82-maktab oʻquvchisi.

Birinchi ustozim
Menga harf oʻrgatgan
Va aqlimni oshirgan.
Xato qilsam jilmayib,
Eng birinchi kechirgan –
Aziz Ustozim!
Qoʻlimga berib qalam,
Oʻrgatgan hayot ilmin.
Mening ikkinchi onam,
Onajon oʻqituvchim –
Aziz Ustozim!
Iroda Egamberganova,
55-sonli maktab oʻquvchisi.

Tabrik
Bizga bilim oʻrgatgan,
Qoʻlga qalam tutqazgan.
Odob-axloq sirlarin,
Yurakka jo aylagan.
Ziyo nurin taratib,
Koʻnglimni shod aylagan.
Dunyolarni tanitib,
Va hayotga yoʻllagan.
Quvvatlagan parvozim,
Omon boʻling Ustozim!
Lobaroy Olimbeova,
57-maktab oʻquvchisi.

Muallim
Oftobdayin yoʻlimiz yorituvchi,
Har qadamda mehr nurin sochuvchi.
Matonat-u shijoatda tanhoyim,
Oq yoʻl tilab kuzatuvchi muallim.

Poyingizga bosh egaman taʼzimda,
Siz panoh boʻldingiz qish-u yozimda.
Mehr-muhabbati misoli oftob,
Koʻzlari choʻlponim, yuzlari mohtob.

Siz yurgan yoʻllardan yurgim keladi,
Har bitta soʻzingiz jahoniy taʼlim.
Dunyo yoshlaridan oʻzgim keladi,
Ilm-u irfoningiz uqib, Muallim!
Dilnura Rahimboyeva.

Ustozlarimga
Muloyimdir soʻzingiz,
Kulib turar koʻzingiz.
Siz-la baland parvozim,
Qalbi daryo ustozim!
Onamdayin suyuksiz,
Otamdayin buyuksiz.
Siz-la barcha yutugʻim -
Vatandayin ulugʻim!
Mehr berib bizlarga,
Sehr qoʻshib soʻzlarga.
Dunyolarga ovozim,
Taratguvchi ustozim!

Nilufar TOJIMURODOVA,
21-maktab oʻquvchisi.