“BIZ BILIMDON BOLALARMIZ!” ShIORI OSTIDA BOShLANGʻICh TAʼLIM FAN OYLIGI OʻTKAZILDI

Yurtimizdagi barcha umumtaʼlim maktablarida sentyabr oyini boshlangʻich taʼlim fan oyligi sifatida nishonlash anʼanaga aylanib bormoqda. Alifboni oʻrganishga kirishgan bolalar, oʻqish-yozishni puxta oʻrganib, 2-sinfga qadam qoʻygan, shuningdek, ilm-fan asoslarini puxta egallash sari intilayotgan, hatto bu borada oʻz iqtidorlarini namoyon etayotgan boshlangʻich sinflar oʻquvchilari uchun boshlangʻiya taʼlim fan oyligi doirasidagi tadbirlar qiziqarli taassurotlar bilan oʻtmoqda.

Amudaryo tuman XTBga qarashli 36-sonli umumtaʼlim maktabida ham sentyabr oyi davomida fan oyligi doirasida biri-biridan qiziqarli tadbirlar, ochiq darslar tashkil qilinib, insholar hamda diktantlar tanlovlari oʻtkazildi. 24-sentyabr kuni esa boshlangʻich sinf oʻqituvchilari Nasiba Bobojonova, Saragul Yusupova, Alisher Yoʻldoshev, Gulnoza Matrizayeva, Malohat Rahimova, Barno Matsapoyeva, Barchinoy Xoʻjamurodova, Barno Ibodullayeva, Iqboloy Allaberganova, Zulxumor Jamolovalar tomonidan tayyorlangan fan oyligi yakuniga bagʻishlangan adabiy-badiiy tadbir boʻlib oʻtdi.

“Biz bilimdon yoshlarmiz!” shiori ostida oʻtkazilishi rejalashtirilgan boshlangʻich taʼlim fan oyligining yakuniy bosqichiga bagʻishlangan tadbirning maʼnaviy-maʼrifiy jihatdan taʼsirchanligini oshirish maqsadida maktab sahnasi boshlangʻich sinflar oʻquvchilari tomonidan chiroyli bezatildi. Unda oʻquvchilarning besh muhim tashabbus doirasida amalga oshirgan ishlari, xususan, rassomlik, chevarlik, kitobxonlik, kompyuter savodxonliklarini aks ettiruvchi koʻrgazmali vositalari aks ettirildi.

Tadbirni maʼnaviy-maʼrifiy ishlar boʻyicha direktor oʻrinbosari Vahobjon Davletov ochdi  va tadbir ishtirokchilariga, boshlangʻich sinflar oʻquvchilari hamda oʻqituvchilariga bir oy davom etgan boshlangʻich sinflar fan oyligini muvaffaqiyatli tarzda oʻtkazganliklari uchun minnatdorchilik bildirdi. Shu bilan birga yaqinlashib kelayotgan 1-oktyabr – Oʻqituvchi va murabbiylar kuni – umumxalq bayrami bilan barchani muborakbod etdi. Vahobjon Davletov boshlangʻich sinfda berilgan mukammal taʼlim va tarbiyaning ahamiyati haqida toʻxtalib, insonning shaxs sifatida shakllanishida boshlangʻich taʼlim muhim oʻrni egallashi, insonning aynan ana shu taʼlim-tarbiya jarayonida olgan bilimi oʻz kelajagi uchun qoʻyiladigan mustahkam poydevor boʻlishini taʼkidladi.

Tadbirda boshlangʻich sinf oʻquvchilarining barchasi faol ishtirok etib, oʻzlari tayyorlagan Vatanni, tinchlikni tarannum etuvchi kuy-qoʻshiqlari hamda sheʼrlari bilan barchani xushnud qildi.

Ular oʻz ijrolari orqali maktab oʻquvchilarining chuqur bilim olish bilan birga musiqa, raqs sanʼatini ham puxta egallayotganligini amalda namoyon etdilar.

Fan oyligi doirasida “Havaskor rassomlar” tanlovi ham oʻtkazilib, gʻolib oʻquvchilar ragʻbatlantirildi. Tadbirda faol ishtirok etgan oʻquvchilar bilan bir qatorda insholar hamda diktantlar tanlovi gʻoliblari ham maktab maʼmuriyati tomonidan faxriy yorliqlar bilan taqdirlandi.

Boshlangʻich sinflar fan oyligini oʻtkazishdan maqsad maktabdagi iqtidorli, oʻquvchilarni ragʻbatlantirish, ulardagi ijodiy qobiliyatni oʻstirish, bu boradagi taʼlim-tarbiya uslublarini takomillashtirish hamda samaradorligini oshirish orqali oʻquvchi-yoshlarni kelajakda oʻzlari tanlagan yoʻnalishlar boʻyicha kasb-kor egallashlari uchun mustahkam zamin yaratishdir.

Muhayyo Karimova, 36-sonli maktabning ijodiy-madaniy masalalar boʻyicha targʻibotchisi.