Tuman hokimining yoshlar bilan navbatdagi uchrashuvi boʻlib oʻtdi

Mamlakatimizda yoshlarga qaratilayotgan eʼtibor, oʻsib kelayotgan barkamol avlodga boʻlgan gʻamxoʻrlik davlat siyosati darajasiga koʻtarilgani bilan ham ahamiyatlidir. Zero, yoshlar – Vatan kelajagi, ertangi kunning bunyodkorlaridir.

Shu eʼtibor va gʻamxoʻrlikning amaliy ifodasi sifatida joylarda yoshlar bilan uchrashuvlar oʻtkazilib, ularning muammolari tinglanmoqda. 15-sentyabr kuni Amudaryo tumanining Qipchoq ovul fuqarolar yigʻini binosida boʻlib oʻtgan “Hokim va yoshlar uchrashuvi” ham shular jumlasidandir. Uchrashuvda yoshlarning takliflari, muammolari tuman hokimi va tegishli tashkilotlar masʼullari tomonidan tinglandi.

Uchrashuvda tuman Xalq qabulxonasi boʻlimi mudiri Erkin Rajabov mamlakatimizda yoshlar uchun yaratilayotgan imkoniyat va sharoitlarga javoban ularning taʼlim, fan, ishlab chiqarish, tibbiyot, sport sohasida erishayotgan yutuqlari haqida oʻzining iliq fikrlarini bildirib oʻtdi.

Shundan soʻng tuman hokimi Sultonboy Yoʻldashev Oʻzbekiston Respublikasi Prezidentining 2022-yil 31-avgust kungi “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼtlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi Farmonida yosh tadbirkorlarga berilgan imkoniyatlar, qulayliklar hamda oilaviy tadbirkorlikni rivojlantirish dasturlari doirasida amalga oshirilishi belgilangan vazifalar haqida tuhtalib oʻtdi.

Qolaversa, 2022/2023 oʻquv yili uchun Qoraqalpogʻiston Respublikasida umumiy oʻrta, oʻrta-maxsus va professional taʼlim muassasalarini tamomlagan 500 nafar, keyingi oʻquv yillari uchun esa har yili 1-sentyabrga qadar 6 500 nafar yoshlarning viloyatlardagi davlat oliy taʼlim muassasalariga qoʻshimcha qabul parametrlari asosida oʻqishga qabul qilinishi belgilangani yoshlar uchun katta imkoniyat ekanligini taʼkidladi.

Shuningdek, sektor rahbari yoshlarni ijtimoiy va siyosiy faol boʻlishga, vatanparvarlik va hamjihatlik xislatlarini toʻliq namoyon qilishga undadi.

Tuman hokimining yoshlar bilan boʻlib oʻtgan ochiq va samimiy uchrashuvida ularning kundalik turmushida uchrayotgan muammolar, yechimini kutayotgan masalalar yuzasidan muloqot qilindi.

Qipchoq ovul fuqarolar yigʻini va Qipchoq shaharcha fuqarolar yigʻinida istiqomat qiluvchi faol yoshlaridan bir nechta murojaatlar kelib tushdi. Bandlik, subsidiya asosida tikuv mashinasi olish, kontrakt-toʻlovining qoplab berilishi kabi masalalar shular jumlasidandir.

Murojaatlar yuzasidan Yoshlar ishlari agentligi tuman boʻlimi boshligʻi Sardor Ismoilovga hamda masʼullarga topshiriqlar berilib, ijrosi nazoratga olindi.

Bugungi kunda yoshlarga qaratilayotgan eʼtibor va imkoniyatlar natijasi oʻlaroq tumandagi koʻplab yoshlar oʻz tadbirkorlik faoliyatini yoʻlga qoʻyganlar.

Yoshlarning tadbirkorlik va hunarmandchilik loyihalarini qoʻllab kuvvatlash maqsadida tumandagi 646 nafar yurtdoshlarimizga 14 mldr. 200 mln. soʻm kreditlar ajratildi. Natijada 670 ta ish oʻrni yaratildi. Bunday koʻrsatkichlar albatta, ertangi kunga ishonch va mehnatsevarlik bilan harakat qilayotgan yoshlarning erishayotgan muvafaqqiyatlaridir.

Yigʻilish yakunida tuman hokimi yoshlarga murojaat qilib, bugun amalga oshirilayotgan ulkan bunyodkorlik ishlarining barchasi yoshlar uchunligini, ular oʻz ustida doimiy ishlab, hamisha yuqori marralarni zabt etishga intilishlari lozimligini taʼkidladi.

Tuman hokimliging Axborot xizmati.