Referendum oʻtkazuvchi uchastka komissiyalari aʼzoligiga nomzodlar uchun oʻquv seminarlari oʻtkazilmoqda

Mamlakatimiz Mustaqillikka erishgan dastlabki yillardayoq qabul qilingan Oʻzbekiston Respublikasi Konstitutsiyasi insonparvar qadriyatlarni, xalqaro huquqiy meʼzon va talablarni oʻzida mujassam etgan yagona qomusimiz hisoblanadi.

Shiddat bilan rivojlanayotgan zamon, dunyoda roʻy berayotgan ijtimoiy, iqtisodiy, siyosiy oʻzgarishlar konstitutsiyamizga oʻzgartirish va qoʻshimchalar kiritishni talab etmoqda. Shu maqsadda oʻtgan yili Prezident saylovoldi uchrashuvlarida saylovchilar tomonidan Asosiy qonunimizni bugungi hayot talablariga mos holda yangilash masalasi koʻtarilgan edi.

Fuqarolarimizning bu boradagi xohish va istaklarini amalga oshirish uchun Oliy Majlis palatalari tomonidan Konstitutsiyaviy komissiya tuzilib, faoliyat boshladi. Komissiya taklifi asosida Parlament tomonidan tayyorlangan Qonun loyihasi umumxalq muhokamasiga qoʻyildi.

Amaldagi qonunchiligimizga koʻra, parlamentning oʻzi ham Konstitutsiyaga oʻzgartish kiritish vakolatiga ega. Lekin, konstitutsiyaviy islohotni fuqarolarimizning fikri va qoʻllab-quvvatlashi asosida referendum orqali amalga oshirilishi koʻzda tutilgani xalqimizning xohish va irodasi ifodasidir.

Oʻzbekiston Respublikasi Konstitutsiyasiga oʻzgartirish va qoʻshimchalar kiritish boʻyicha oʻtkazilishi kutilayotgan umumxalq referendumi oldidan joylardagi referendum oʻtkazuvchi uchastka komissiyalari aʼzoligiga nomzodlar uchun oʻquv seminar oʻtkazilmoqda.

14-sentyabr kuni Amudaryo tumanining Olmazor mahallasi hududidagi 82-sonli umumtaʼlim maktabi binosida Konstitutsiyaga oʻzgartirish va qoʻshimchalar kiritish boʻyicha umumxalq referendumi oldidan joylardagi referendum oʻtkazuvchi uchastka komissiyalari aʼzoligiga nomzodlar uchun oʻquv seminar boʻlib oʻtdi.

Seminarda Oliy taʼlim muassasasi oʻqituvchilari − Tajixal Qudaybergenova, Salamat Ganiyev, Yerpolat Gʻaniyev hamda tumandagi muassasa-tashkilot rahbarlari − Ulugʻbek Abdurahmonov, Azimjon Bekbernenov, Bahodir Jumaniyazovlar trenerlik qilishdi.

Seminar 3 guruhga boʻlingan holda olib borildi. Har bir guruhda 21 nafardan ishtirokchilar, yaʼni referendum oʻtkazuvchi uchastka komissiyalari aʼzoligiga nomzodlar qatnashib, “Oʻzbekiston Respublikasining referendumi toʻgʻrisida”gi Oʻzbekiston Respublikasi Qonunining mazmun-mohiyati bilan batafsil tanishtirildi.

Taʼkidlanganidek, Qonunning 7-moddasiga binoan referendumga tayyorgarlik koʻrish va uni oʻtkazishni referendum oʻtkazuvchi komissiyalar amalga oshiradi. Ular fuqarolarni oʻz ishlaridan, jumladan, okruglar, ovoz berish uchastkalari tuzilganligi, komissiyalarning tarkibi, ularning joylashgan manzili va ish vaqtidan voqif etadilar, ovoz beruvchi fuqarolarning roʻyxatlari bilan tanishtiradilar, ovoz berish yakunlaridan xabardor qiladilar.

Shuningdek, Referendum oʻtkazuvchi uchastka komissiyasi referendum tayinlash toʻgʻrisidagi qaror eʼlon qilinganidan keyin okrug komissiyasi tomonidan yigirma besh kundan kechikmay besh nafardan oʻn toʻqqiz nafargacha aʼzodan iborat tarkibda tuziladi.

Referendum oʻtkazuvchi uchastka komissiyasining raisi, rais oʻrinbosari va kotibi komissiya majlisida uning aʼzolari orasidan saylanadi.

Seminar dovimida Konstitutsiyaga kiritilashi lozim boʻlgan normalarni fuqarolarning maʼqullashi yoki maʼqullamasligi byulletenlarga maxsus belgilar orqali koʻrsatib oʻtilishi va natijalarni sarhisob qilib, referendum oʻtkazuvchi okrug komissiyasiga taqdim qilish tartibi hamda mazkur jarayonning tashkil etilishida ochiqlik va shaffoflikni taʼminlash muhim ahamiyatga ega ekanligi aytib oʻtildi.

Shundan soʻng, seminar ishtirokchilari trenerlarga oʻzlarini qiziqtirgan savollar bilan murojaat qilib, tegishlicha javoblar oldilar.

Tuman hokimligining Axborot xizmati.