Jayxun ilhomlari

Koʻngilli kechmoqda

Fasli yoz oyida – oxirgi hafta,

Koʻngilli kechmoqda, bu harna gap-da.

Kichik bir sheʼr bundan unsa ham mayli,

Shunchaki havasda, ilhom tufayli.

 

Ajoyib ochilgan xush boʻyli gullar -

Bilan band oʻtadi kunlar-u tunlar.

Oʻsishin koʻraman oʻzim aylanib,

Suhbatlar quraman suyib-boylanib.

 

Qum yuzin kuydirgan harorat ketdi,

Sogʻinchli suydirgan farogʻat yetdi.

Bolalar, yosh-yalang suvga tushdilar,

Choʻmilib, salqinlab quvonch quchdilar.

* * *

Ucharlar ustidan qushlar galasi,

Ortidan termulib qolar bolasi.

Otizlar ichida oyqizlar gʻayrat –

Mehnat qiladilar – gʻanimat fursat.

Koʻksida havaslar barq urgan oʻsmir –

Yigitlar yelishar bahs urib bir-bir.

Koʻrganning sira ham toʻymaydi koʻzi,

Ular mard yigitlar, bir boʻlar soʻzi.

Jumaboy Hidoyatov,

Qizilcholi mahallasi.

 

Mahallam

("Nuroniylar tanlovi"da kuylangan qoʻshiq")

Daryoboʻyi derlar manim mahallam,

Koʻchalari koʻrkam, ravon mahallam.

Odamlari ishchan, boʻston mahallam,

Hamjihat insonlarga makon mahallam.

 

Bogʻlarga burkangan, suvlari toza,

Qizlari Barchinoy bari ozoda.

Alpomish oʻgʻlonlar ulgʻaygan bunda,

Yangi Oʻzbekiston aro tanho mahallam.

 

Jayhundan suv ichgan "yashil makon"im,

Rahbarlari ilgʻor, nurli boʻstonim.

Bogʻlarida ulgʻayar avlodlar xurram,

Taraqqiy qilaver doim, mahallam.

 

Nuroniylar hurmat-izzatda bugun,

Yurtboshimiz Qarori amalda har kun.

Obod yurtda yoshlari kezmoqda olam,

Vatan ichra buyuk Vatan – mahallam!

Baxtiyor JOʻLLIBOYeV,

Daryoboʻyi MFY faoli.

 

Koʻzmunchoq

Mitti qushdek, goʻzal mushtipar,

Koʻngil siri pinhona oʻzing.

Shoʻring qursin qizaloqqina,

Oʻz uyingga mehmonsan oʻzing.

 

Omonatdir ota uy senga,

Barin tashlab ketasan yiroq.

Qoʻlingdagi shu mittigina,

Koʻzmunchoqdek qolasan, faqat.

 

Hamma senga aql beradi,

Gangib qolding shu on, soniya.

Koʻnglingdagi kim borligini,

Hatto onang ham bilmaydi-ya.

 

Qiz bolasan, palaxmon toshi,

Qayga otsa ketaverasan.

Koʻnglingdagi qolib oxiri,

Oʻz yoringni sevaverasan.

 

Sen bir qushsan, sen bir hikoya,

Baxt qushiga erishmoq qiyin.

Yozsa hamki yoʻqdir nihoya,

Sening kuying kuylamoq qiyin.

Munisa TOJIBOYeVA,

20-sonli maktab oʻquvchisi.

 

Yolgʻon doʻst

Sen doʻstingga fidolar boʻlsang,

Bilmasa u juda ham yomon.

Gʻamlariga yelkalar tutsang,

Tanimasa, bu senga armon.

 

Bobom aytar: “qora kuningda,

Yonlaringda turmagan doʻstmas.

Paydo boʻlib yaxshi kuningda,

Quchoq ochsa, bilgin, odammas”.

 

Odamlarning sarasi asli,

Ayirmaydi shoh-u gadoni.

Kelganida tanlamoq fasli,

Tanlar doʻstga joni fidoni.

Maftuna Qurbonboyeva,

36-sonli maktab oʻquvchisi.

 

Tilaklar

Behuda gaplarni qilib muxtasar,

Tilaklarim aytay, bordir birtalay.

Yozganlarim oʻqib, ey aqli raso,

Oʻzing chiqar undan bir-bir xulosa.

Koʻngilda borini chiqardim tilga,

Zero, maʼqul boʻlsa sheʼrlarim elga.

Endi men asosiy maqsadga oʻtay,

Aytay tilaklarim, bordir birtalay:

Tillardan tushmagay bir soʻz erta kech,

Noming oʻchsin urush! Dunyo boʻlsin tinch!

Daryo boʻlib oqsin, hosil boʻlsin moʻl,

Xirmonlar, omborlar donlarga toʻlsin.

Dasturxonga bersin fayz-u baraka,

Sogʻ-omon yetkazsin har nurli tongga.

Xonadonlar obod, oilalar tinch,

Xalqimiz salomat, xotirjam boʻlsin.

Kelinlar vafoli, yigitlar suyanch,

El-u Vataniga togʻ-qalqon boʻlsin.

Toʻylarda yangrasin doimo yalla,

Beshiklar ustida aytilsin alla.

Kishilar birodar, qarindoshlarday,

Oʻrtasida boʻlsin mehr-oqibat.

Nizolar yoʻq boʻlib, uning oʻrniga

Doʻstona yashasin aka-ukaday.

Qarilarga imon, yoshlarga umr,

Baxtiyor yashasin, qolmasdan armon.

Har kishi ketarda foniy dunyodan

Rozi boʻlib ketsin, ketsin bearmon.

Iloho tilaklar ijobat boʻlsin,

Barcha xonadonlar shodlikka toʻlsin.

Odil OllAyorov, mehnat faxriysi.

 

Chidadim

Boʻlib ketganim yoʻq gʻam ichra ado,

Gʻururimni hech yoʻqotmadim.

Koʻp narsamdan boʻlsam-da, judo,

Men toʻkilib, erib ketmadim –

Chidadim...

 

Yaqinlarim oʻgirsa-da, yuz,

Payqamasa, koʻrib turgan koʻz.

Qaqshatib ketsa-da, achchiq soʻz,

Yigʻlab-yigʻlab qurib ketmadim –

Chidadim...

 

Gunohimdan gap boshlasalar,

Koʻnglimni koʻp gʻashlasalar,

Hatto yurak-bagʻrim tilsalar,

Gʻam yukidan oʻlib ketmadim –

Chidadim.

Nodira Yangiboyeva,

Oʻrta qalʼa ovuli.

 

Qodiriy bobo

"Oʻtgan kunlar" kitobin oʻqib,

Choʻmib qoldim gʻamgin xayolga.

Bobomizning ogʻir qismati,

Koʻmib qoʻydi mungli savolga.

 

Xalqin dilga koʻchirgan bobom,

Fido boʻlib yashagan bobom.

Soʻngra qilgan gunohin bilmay,

Aybsiz aybdor otilgan bobom.

 

Oʻtgan kunlar oʻtib boradi,

Siz kutgan kun keldi-ku, bobo.

Mustaqillik epkinlarida,

Qalbimizda yashaysiz bobo.

Sevinch QODIROVA,

57-sonli maktab oʻquvchisi.

 

Bir kosa sharob...

Doʻstlar davrasida mayxoʻrlik qildik.

Jom ichra tomchilar soʻzlardi goʻyo.

Bizdan zoʻri yoʻq ekan biz shuni bildik,

Bir kosa sharobga yengildi dunyo.

 

Unutdik bir nafas goʻzal qizlarni,

Xazonlarga toʻlgan oʻsha kuzlarni.

Siz bizdan kechdingiz nimayam derdik,

Unutdik shu ondan biz ham sizlarni.

 

Yoʻllarim poylagan ey onaizor,

Oʻgʻlingdek koʻrnamak yana qayda bor?

Yuzingdagi ajinlar taqdir chizigʻi,

Boshingdagi sochmi yoki oppoq qor?

 

Onajon, onajon, nega bundaysan,

Qanoti yoʻq farishtaga oʻxshaysan.

Umring oʻtib ketdi bolangni oʻylab,

Qachon sen ham oʻzing uchun yashaysan?

 

Bilmam, nega shu on seni oʻyladim,

Dilimda borini bordek soʻyladim.

Mastlik bu aslida rostlik degani,

Farzand boʻlib seni ancha qiynadim.

 

Ichishni qoʻy deding, hamon qoʻymadim...

Faxriddin Saʼdullayev.