Senatning 29-yalpi majlisida qabul qilingan qonun hujjatlarining mazmun-mohiyatini tushuntirishga bagʻishlangan yigʻilish boʻlib oʻtdi

Joriy yilning 4–5-avgust kunlari Toshkent shahrida Oʻzbekiston Respublikasi Oliy Majlisi Senatining yigirma toʻqqizinchi yalpi majlisi boʻlib oʻtgan edi. Yalpi majlisda 14 ta masala, shu jumladan 6 ta qonun loyihasi koʻrib chiqilib, senatorlar tomonidan qizgʻin muhokama qilindi.

 11-avgust kuni Amudaryo tumani hokimligining majlislar zalida Senatning mazkur yalpi majlisida koʻrib chiqilgan masalalar, muhokama qilingan qonun loyihalarining mazmun-mohiyatini tushuntirish va jamoatchilik nazoratini yoʻlga qoʻyish boʻyicha yigʻilish boʻlib oʻtdi.

Yigʻilishda Oʻzbekiston Respublikasi Oliy Majlisi Senatining Orolboʻyi mintaqasini rivojlantirish masalalari qoʻmitasi raisi, senator Boriy Alixanov, tuman hokimi Sultonboy Yoʻldashev hamda tumandan saylangan Qoraqalpogʻiston Respublikasi Joʻqorgʻi Kengesi deputatlari, Xalq deputatlari tuman Kengashi deputatlari, sektor rahbarlari, hokim oʻrinbosarlari hamda tegishli korxona va tashkilot rahbarlari, ommaviy axborot vositalari vakillari ishtirok etishdi.

Yigʻilishni tuman hokimi Sultonboy Yoʻldashev ochdi va olib bordi.

Dastalab, senator Boriy Alixanov yalpi majlis davomida koʻrib chiqilgan masalalar yuzasidan maʼruza qildi. Senator jamiyat taraqqiyoti, mamlakat rivoji qonun ustuvorligi bilan kafolatlanishi, har qanday global sharoitda, har qanday vaziyatda inson huquq va manfaatlarini taʼminlash, iqtisodiy barqarorlikni saqlab qolish, ijtimoiy himoyani kuchaytirish, yosh avlod tarʼlim-tarbiyasiga yanada jiddiy eʼtibor qaratish muhim vazifalardan sanalishini taʼkidladi.

Shundan soʻng senator “Davlat qarzi toʻgʻrisida”gi Qonun loyihasining mazmun-mohiyatiga toʻxtalib oʻtdi.

Qayd etilganidek, Qonun bilan davlat qarzi va unga xizmat koʻrsatish xarajatlarining ustuvorligi, davlat qarzining cheklangan hajmlari, davlat hokimiyati va boshqaruv organlarining davlat qarzini boshqarishdagi vakolatlarni belgilash koʻzda tutilgan. “Davlat qarzi toʻgʻrisida”gi axborotning ochiqligi va va shaffofligini taʼminlashga qaratilgan Qonun senatorlar tomonidan maʼqullangan.

Yigʻilish davomida senator “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonunning mazmun mohiyati haqida ham batafsil tushuntirish berib oʻtdi.

Qonunda Oʻzbekiston Respublikasining “Mahalliy davlat hokimiyati toʻgʻrisida”gi, “Ichki ishlar organlari toʻgʻrisida”gi va “Maʼmuriy qamoqni oʻtash tartibi toʻgʻrisida”gi qonunlariga hamda Maʼmuriy javobgarlik toʻgʻrisidagi kodeksiga oʻzgartish va qoʻshimchalar kiritish nazarda tutilgan.

Yigʻilish qatnashchilari kun tartibida koʻrib chiqilgan masalalar yuzasidan oʻz fikr va mulohazalarini bildirdi. Shuningdek, oʻzlarini qiziqtirgan savollar bilan senatorga murojaat qilib, tegishlicha javoblar oldi.

Shu oʻrinda aytish kerakki, Oliy Majlis Senatining yigirma toʻqqizinchi yalpi majlisida koʻrib chiqilgan qonun loyihalarining huquqiy asosini takomillashtirishga oid bir qator masalalar bilan keng jamoatchilik vakillarini tanishtirish hamda ularning fikrlarini oʻrganish jamiyatmizdagi har bir fuqaroning mamlakatimizda roʻy berayotgan muhim siyosiy jarayonlarga oʻz munosabatini bildirib, faol ishtirok etishida muhim omil boʻlib xizmat qilayotir.

Tuman hokimligining Axborot xizmati.