Nazarxon ovuli yoshlari bilan tuman hokimining navbatdagi uchrashuvi boʻlib oʻtdi

Bugungi kunda mamlakatimizda yosh avlodning sifatli taʼlim olishi, sport va boshqa yoʻnalishlarda isteʼdodini namoyon etishi, jamiyatda munosib oʻrnini topishi uchun gʻamxoʻrlik tobora kuchaytirilmoqda. Chunki farovon hayot – mukammal tarbiyadan boshlanadi.

Shu boisdan yoshlarni barkamol qilib tarbiyalash, ularning hayotga mustaqil qadam qoʻyishlari uchun barcha sharoitlarni yaratish, yoshlar bilan ishlash samaradorligini oshirish doimo davlatimizning ustuvor maqsad-vazifalaridan boʻlib kelmoqda.

Amudaryo tumanida ham bu borada koʻpgina saʼy-harakatlar olib borilmoqda.

Joriy yilning 4-avgust kuni Nazarxon ovul fuqarolar yigʻini binosida yoshlar bandligini taʼminlash, muammo va takliflarini oʻrganish, ularni qoʻllab-quvvatlash hamda munosib shart-sharoitlar yaratib berish maqsadida “Hokim va yoshlar” uchrashuvi oʻtkazilgani ham bu boradagi navbatdagi qadamdir.

Uchrashuvda tuman hokimi Sultonboy Yoʻldashev, hokim oʻrinbosari Mahmud Shermetov, Yoshlar ishlari agentligi tuman boʻlimi boshligʻi Sardor Ismailov, tegishli tashkilotlar mutasaddilari hamda 30 nafarga yaqin faol yoshlar ishtirok etishdi.

Tuman hokimi Sultonboy Yoʻldashev uchrashuvda dastlab mamlakatimizda yoshlarning yuksak marralarni egallashlari uchun yaratilayotgan shart-sharoitlar, cheksiz imkoniyatlar haqida toʻxtalib, yoshlarni oʻqib, bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga daʼvat qildi.

Undan tashqari, “Erishgan yutuqlarimiz oʻzimizniki, biz xato va kamchiliklarni oʻrganib, ularni bartaraf qilishga harakat qilmogʻimiz kerak!” degan fikrni hayotiy shior qilib olish kerakligini taʼkidladi.

Tuman hokimi katta yutuqlarni qoʻlga kiritib, tengdoshlariga namuna boʻlib kelayotgan, bilimga chanqoq, izlanuvchan tumanimiz yoshlari haqida ham oʻzining samimiy fikr-mulohazalarini bildirdi.

Uchrashuvda yoshlarning taklif va istaklarini oʻrganish, muammolarini hal etishga koʻmaklashish yuzasidan belgilangan chora-tadbirlar, uyushmagan yoshlarni kasb-hunarga oʻrgatish va ish bilan taʼminlash, yoshlarni madaniyat, sanʼat, kitobxonlik, axborot texnologiyalari toʻgaraklari hamda sport va harbiy-vatanparvarlik yoʻnalishidagi tadbirlarga jalb etish borasida amalga oshirilayotgan tadbirlar toʻgʻrisida batafsil maʼlumot berildi.

Shuningdek, yoshlar taʼlim-tarbiyasi uchun qoʻshimcha sharoitlar yaratish, ishsiz yoshlarning bandligini taʼminlashga qaratilgan kompleks chora-tadbirlarni amaliyotga joriy etish masalalariga ham toʻxtalib oʻtildi.

Shundan soʻng tuman hokimi bilan ochiq va samimiy suhbat boshlandi. Yoshlar asosan oʻzlarining savollari, takliflar hamda muammolari bilan tuman hokimiga murojaat qilishdi.

Uchrashuv davomida tuman hokimiga yoshlardan 5 nafari bandlikni taʼminlash, tadbirkorlik bilan shugʻullanishda koʻmak berish, kasb-hunarga oʻqitish va boshqa oʻzlarini qiynayotgan muammolarni hal etishda koʻmak soʻrab, murojaat qildi. Ushbu murojaatlarning 2 tasi shu yerning oʻzida hal etilgan boʻlsa, qolgan 3 tasini hal etish yuzasidan mutasaddilarga topshiriq va koʻrsatmalar berdi.

Uchrashuv yakunida yoshlar tomonidan bildirilgan savol va takliflarga batafsil javoblar berilib, amaliy va ijobiy natijalar koʻrilishi boʻyicha chora-tadbirlar belgilandi.

Tuman hokimligining Axborot xizmati.