Hokim yordamchisi xalq xizmatida

Bugungi kunda Amudaryo tumanida 49 ta ovul va mahalla fuqarolar yigʻini mavjud boʻlib, har bir ovul va mahallaga 1 nafar hokim yordamchisi biriktirilgan. Hokim yordamchilari aholi bandligini taʼminlash, kambagʻallikni qisqartirish boʻyicha tizimli ishlar olib bormoqda.

Jumladan, Arnaboʻyi mahallasining hokim yordamchisi Suroj Oʻrazmatov ham yanvar oyida hokim yordamchisi lavozimiga ochiq tanlov asosida tayinlaib, oʻz ish faoliyatini samarali tarzda olib bormoqda.

Mahallaga aholi jon boshidan kelib chiqib, 1 mlrd. 522 mln soʻm miqdorda kredit resurslari ajratilgan boʻlib, bugungi kunda 35 nafar fuqaroga ushbu mablagʻlar hisobidan 780 mln. soʻm miqdorida tadbirkorlikning turli yoʻnalishlari bilan shugʻullanish uchun kreditlar ajratildi.

Bugungi kunda mahallada 770 ta xonadonda 4 ming 299 nafar aholi istiqomat qiladi. Hokim yordamchisi ushbu fuqarolar bilan birma-bir suhbatlashish asnosida muammolarni “xonadonbay” tarzda oʻrganib hal qilishga erishmoqda.

Jumladan, mahallada yashovchi Charshamboy Qoʻchqarovga 33 mln. soʻm miqdorida imtiyozli kredit olishda amaliy yordam berildi. Charshamboy aka ushbu mablagʻga yuk tashishga moʻljallangan mototsikl sotib olib, mahalladoshlarining ogʻirini yengil qilish bilan birga anchagina daromad ham topmoqda. Qolaversa, oʻz dalasida yetishtirgan qishloq xoʻjaligi mahsulotlarini bozorga olib chiqib sotishda, mahalladoshlarining ogʻir yuklarini manzillariga yetkazib berishda ushbu mototsikl qoʻl kelmoqda. Mahallada hokim yordamchisi koʻmagi bilan mana shunday mototsikl sohibi boʻlgan yana 3 nafar fuqaro bor.

Undan tashqari, hokim yordamchisining bevosita yordami bilan 20 mln. soʻm imtiyozli kredit olib, hovlisida asalarichilik bilan shugʻullanayotgan Ozodboy Toʻrayev ham katta daromad koʻrmoqda. Ayni kunlarda Ozodboy aka asalari qutilaridan asal yigʻib olmoqda. 20 quti asalari uyasidan 350-400 kilogrammdan ortiq asal olib, 1 kilogramm asalni 60 ming soʻmdan sotadi va har mavsumda 24-25 million soʻm atrofida foyda koʻradi.

Ayni kunlarda Arnaboʻyi mahallasida parrandachilik kooperatsiyasini tashkil qilish boʻyicha ham tashkiliy ishlar olib borilmoqda.

Bundan tashqari, hokim yordamchisining amaliy koʻmagi bilan mahalla hududida istiqomat qiluvchi “Ayollar daftari”, “Yoshlar daftari”ga kiritilgan 25 nafar fuqaroning har biriga 80 ta tovuq, shuningdek, tovuqlarni boqish uchun 1 oylik don-dun olib berildi. Tovuqlardan bir kunda oʻrtacha 70-75 ta tuxum olinib, bozor rastalari arzon va sifatli tuxumlar bilan taʼminlanishiga hissa qoʻshilmoqda. Ishsiz, bandligi taʼminlanmagan ayol-qizlar, yoshlarga berilgan bunday imkoniyat ularning uyda oʻtirib ham katta daromad topishida muhim omil boʻlib xizmat qilayotir.

Aytish joizki, joriy yildan boshlab mamlakatimiz mahallalarida ish boshlagan ushbu mutlaqo yangi tizim ahvoli ogʻir oilalarga manzilli koʻmak berish, ularni ishbilarmonlikka jalb qilish orqali kambagʻallikni qisqartirish va xalqimiz farovonligini taʼminlashga qaratilgani bilan katta ahamiyatga ega. Qolaversa, kimningdir ogʻirini yengil qilish, yashash sharoitining yaxshilanishiga yordam berishning savobi ulugʻdir. Arnaboʻyi mahallasining hokim yordamchisi Suroj Oʻrazmatov ham mahallasida istiqomat qilayotgan aholining muammolarini hal etishda ularga koʻmakchi va suyanchiq boʻlib kelmoqda.

Tuman hokimligining Axborot xizmati