Ҳоким ёрдамчиси халқ хизматида

Бугунги кунда Амударё туманида 49 та овул ва маҳалла фуқаролар йиғини мавжуд бўлиб, ҳар бир овул ва маҳаллага 1 нафар ҳоким ёрдамчиси бириктирилган. Ҳоким ёрдамчилари аҳоли бандлигини таъминлаш, камбағалликни қисқартириш бўйича тизимли ишлар олиб бормоқда.

Жумладан, Арнабўйи маҳалласининг ҳоким ёрдамчиси Сурож Ўразматов ҳам январь ойида ҳоким ёрдамчиси лавозимига очиқ танлов асосида тайинлаиб, ўз иш фаолиятини самарали тарзда олиб бормоқда.

Маҳаллага аҳоли жон бошидан келиб чиқиб, 1 млрд. 522 млн сўм миқдорда кредит ресурслари ажратилган бўлиб, бугунги кунда 35 нафар фуқарога ушбу маблағлар ҳисобидан 780 млн. сўм миқдорида тадбиркорликнинг турли йўналишлари билан шуғулланиш учун кредитлар ажратилди.

Бугунги кунда маҳаллада 770 та хонадонда 4 минг 299 нафар аҳоли истиқомат қилади. Ҳоким ёрдамчиси ушбу фуқаролар билан бирма-бир суҳбатлашиш асносида муаммоларни “хонадонбай” тарзда ўрганиб ҳал қилишга эришмоқда.

Жумладан, маҳаллада яшовчи Чаршамбой Қўчқаровга 33 млн. сўм миқдорида имтиёзли кредит олишда амалий ёрдам берилди. Чаршамбой ака ушбу маблағга юк ташишга мўлжалланган мотоцикл сотиб олиб, маҳалладошларининг оғирини енгил қилиш билан бирга анчагина даромад ҳам топмоқда. Қолаверса, ўз даласида етиштирган қишлоқ хўжалиги маҳсулотларини бозорга олиб чиқиб сотишда, маҳалладошларининг оғир юкларини манзилларига етказиб беришда ушбу мотоцикл қўл келмоқда. Маҳаллада ҳоким ёрдамчиси кўмаги билан мана шундай мотоцикл соҳиби бўлган яна 3 нафар фуқаро бор.

Ундан ташқари, ҳоким ёрдамчисининг бевосита ёрдами билан 20 млн. сўм имтиёзли кредит олиб, ҳовлисида асаларичилик билан шуғулланаётган Озодбой Тўраев ҳам катта даромад кўрмоқда. Айни кунларда Озодбой ака асалари қутиларидан асал йиғиб олмоқда. 20 қути асалари уясидан 350-400 килограммдан ортиқ асал олиб, 1 килограмм асални 60 минг сўмдан сотади ва ҳар мавсумда 24-25 миллион сўм атрофида фойда кўради.

Айни кунларда Арнабўйи маҳалласида паррандачилик кооперациясини ташкил қилиш бўйича ҳам ташкилий ишлар олиб борилмоқда.

Бундан ташқари, ҳоким ёрдамчисининг амалий кўмаги билан маҳалла ҳудудида истиқомат қилувчи “Аёллар дафтари”, “Ёшлар дафтари”га киритилган 25 нафар фуқаронинг ҳар бирига 80 та товуқ, шунингдек, товуқларни боқиш учун 1 ойлик дон-дун олиб берилди. Товуқлардан бир кунда ўртача 70-75 та тухум олиниб, бозор расталари арзон ва сифатли тухумлар билан таъминланишига ҳисса қўшилмоқда. Ишсиз, бандлиги таъминланмаган аёл-қизлар, ёшларга берилган бундай имконият уларнинг уйда ўтириб ҳам катта даромад топишида муҳим омил бўлиб хизмат қилаётир.

Айтиш жоизки, жорий йилдан бошлаб мамлакатимиз маҳаллаларида иш бошлаган ушбу мутлақо янги тизим аҳволи оғир оилаларга манзилли кўмак бериш, уларни ишбилармонликка жалб қилиш орқали камбағалликни қисқартириш ва халқимиз фаровонлигини таъминлашга қаратилгани билан катта аҳамиятга эга. Қолаверса, кимнингдир оғирини енгил қилиш, яшаш шароитининг яхшиланишига ёрдам беришнинг савоби улуғдир. Арнабўйи маҳалласининг ҳоким ёрдамчиси Сурож Ўразматов ҳам маҳалласида истиқомат қилаётган аҳолининг муаммоларини ҳал этишда уларга кўмакчи ва суянчиқ бўлиб келмоқда.

Туман ҳокимлигининг Ахборот хизмати