AMUDARYoDA EKSPORTBOP UZUM YeTIShTIRILMOQDA

Ulugʻ Amir Temur bobomiz oʻz zamonasida: “Ming nafar qoʻlidan ish kelmaydigan, tadbirsiz odamdan bir nafar tadbirkor afzal”, deganlarida el-yurt obodonchiligi, ona Vatan farovonligini taʼminlovchi qudratli kuch – tadbirkor, ishbilarmon insonlarni ulugʻlaganlar va bu boradagi fikr-u siyosatida sobit turib, ana shu toifa insonlarni gʻoyat qadrlaganlar.

Oradan necha asrlar oʻtsa hamki, nafaqat alohida mamlakatlar, balki dunyo iqtisodiyotining taraqqiy etishida ham tadbirkorlik faoliyatga eʼtibor va ragʻbat tobora oshib bormoqda. Mustaqil Oʻzbekistonimizda tadbirkorlik sohasi yil sayin jadal rivojlanib, mamlakatimiz, xalqimiz farovonligini taʼminlovchi yetakchi kuch vazifasini oʻtamoqda. Amudaryo tumanida ham sohaga qaratilayotgan eʼtibor tufayli iqtisodi yuksalib, nafaqat oʻziga, balki xalqimizga ham manfaat keltirayotgan tadbirkorlar talaygina.

Azimboy Jumamurodov 2017-yilda “Mangʻit omad savdo” masʼuliyati cheklangan jamiyatini tashkil etganida korxona hisob raqamida bank kredit mablagʻidan boshqa daromadi yoʻq edi. Bogʻdorchilik sohasiga, ayniqsa, uzumchilikka alohida ixlos qoʻygan Azimboy sohaga oid ilmiy adabiyotlarni izlab topib, oʻqib-oʻrganishdan, taniqli bogʻbonlar tajribasi bilan tanishish va oʻz faoliyatiga tatbiq etishdan aslo charchamadi.

Bir necha marta Oʻzbekistonning vodiy viloyatlariga safar uyushtirdi. Tajribali uzumchilik xoʻjaliklari rahbarlari, bogʻbonlari, soha mutaxassislari bilan uchrashib, tok oʻstirish, koʻpaytirish, parvarishlash, qoʻyingki, sohaga oid jamiki agrotexnik tadbirlar yuzasidan maslahat va tavsiyalar oldi. Hatto yetishtirilgan uzum mevasini qishga saqlash boʻyicha qimmatli tajribalarini erinmay oʻrgandi. Oʻzi mustaqil oʻrgangan bilim va amaliy tajribalari asosida ishni tashkil etishga harakat qildi.

Oʻrganganlari asosida shu narsaga amin boʻldiki, Amudaryo zaminida ham sersohil uzumzorlarni bunyod etish, hatto yuqori hosil olish imkoni mavjud. Muhimi, Amudaryo tumani iqlim sharoitida pishib-yetilgan uzum mevasi Oʻzbekistonning boshqa hududlariga nisbatan ancha shirin boʻlishini amalda koʻrgach, 2020-yilda qoʻshimcha 12 gektar yer olib, korxonasini bogʻdorchilik klasteri sifatida qayta tashkil etdi. Yana vodiy viloyatlariga borib, eksportbop uzum koʻchatlarini olib keldi. Asosan Andijon toifi navidan iborat 12 gektarlik uzumzor bogʻda nihollarning toʻliq unib-oʻsib ketishi uchun fidoyilik bilan mehnat qildi.

Klaster korxonasi tashkil etilishi bilan 10 nafar yoshlar doimiy ish bilan taʼminlandi. Mavsumiy ishlarga jalb qilingan 40 nafar yoshlarga esa kunbay ish haqi toʻlanayotgani uchun uzumzor bogʻda barcha ishlar reja asosida olib borilmoqda.

Ayni paytda klaster korxonasi rahbari Azimboy Jumamurodovning rejalari katta. Joriy yil kuzda uzumzor bogʻlan ilk hosil xirmonini koʻtarishga taraddud koʻrayotgan klaster korxonasida sigʻimi 1000 tonnalik zamonaviy muzlatgich qurib bitkazildi.

Asosiy hosilni Rossiya va Qozogʻistonga eksport qilishni rejalashtirgan korxona rahbariga barcha oila aʼzolari yaqin koʻmakdosh. Ukalari Nizomjon, Ilhomjon, Ikromjon Jumamurodovlar oʻzlarining doimiy va daromadli ish bilan bandligini taʼminlagani uchun Azimboy akasidan minnatdor.

Bu yil klaster korxonasi ishchilari safiga Jumamurodovlar oilasining uchinchi avlodi ham kelib qoʻshilishdi. Yosh sohibkor bogʻbonlar Sardor, Sarvar va Sanjar Safarboyevlar uzum toklarini parvarishlash, zangi va bagʻazlarga bogʻlash, oziqlantirish ishlarini puxta oʻrganib olishgan. 12 gektarlik yangi uzumzor bogʻda esa moʻl hosil va boʻlajak daromaddan darak berib, uzum gʻoʻralari quyosh nuridan bahra olib, pishib-yetilmoqda.

Robiya YOʻLDOShEVA.