АМУДАРЁДА ЭКСПОРТБОП УЗУМ ЕТИШТИРИЛМОҚДА

Улуғ Амир Темур бобомиз ўз замонасида: “Минг нафар қўлидан иш келмайдиган, тадбирсиз одамдан бир нафар тадбиркор афзал”, деганларида эл-юрт ободончилиги, она Ватан фаровонлигини таъминловчи қудратли куч – тадбиркор, ишбилармон инсонларни улуғлаганлар ва бу борадаги фикр-у сиёсатида собит туриб, ана шу тоифа инсонларни ғоят қадрлаганлар.

Орадан неча асрлар ўтса ҳамки, нафақат алоҳида мамлакатлар, балки дунё иқтисодиётининг тараққий этишида ҳам тадбиркорлик фаолиятга эътибор ва рағбат тобора ошиб бормоқда. Мустақил Ўзбекистонимизда тадбиркорлик соҳаси йил сайин жадал ривожланиб, мамлакатимиз, халқимиз фаровонлигини таъминловчи етакчи куч вазифасини ўтамоқда. Амударё туманида ҳам соҳага қаратилаётган эътибор туфайли иқтисоди юксалиб, нафақат ўзига, балки халқимизга ҳам манфаат келтираётган тадбиркорлар талайгина.

Азимбой Жумамуродов 2017 йилда “Манғит омад савдо” масъулияти чекланган жамиятини ташкил этганида корхона ҳисоб рақамида банк кредит маблағидан бошқа даромади йўқ эди. Боғдорчилик соҳасига, айниқса, узумчиликка алоҳида ихлос қўйган Азимбой соҳага оид илмий адабиётларни излаб топиб, ўқиб-ўрганишдан, таниқли боғбонлар тажрибаси билан танишиш ва ўз фаолиятига татбиқ этишдан асло чарчамади.

Бир неча марта Ўзбекистоннинг водий вилоятларига сафар уюштирди. Тажрибали узумчилик хўжаликлари раҳбарлари, боғбонлари, соҳа мутахассислари билан учрашиб, ток ўстириш, кўпайтириш, парваришлаш, қўйингки, соҳага оид жамики агротехник тадбирлар юзасидан маслаҳат ва тавсиялар олди. Ҳатто етиштирилган узум мевасини қишга сақлаш бўйича қимматли тажрибаларини эринмай ўрганди. Ўзи мустақил ўрганган билим ва амалий тажрибалари асосида ишни ташкил этишга ҳаракат қилди.

Ўрганганлари асосида шу нарсага амин бўлдики, Амударё заминида ҳам серсоҳил узумзорларни бунёд этиш, ҳатто юқори ҳосил олиш имкони мавжуд. Муҳими, Амударё тумани иқлим шароитида пишиб-етилган узум меваси Ўзбекистоннинг бошқа ҳудудларига нисбатан анча ширин бўлишини амалда кўргач, 2020 йилда қўшимча 12 гектар ер олиб, корхонасини боғдорчилик кластери сифатида қайта ташкил этди. Яна водий вилоятларига бориб, экспортбоп узум кўчатларини олиб келди. Асосан Андижон тоифи навидан иборат 12 гектарлик узумзор боғда ниҳолларнинг тўлиқ униб-ўсиб кетиши учун фидойилик билан меҳнат қилди.

Кластер корхонаси ташкил этилиши билан 10 нафар ёшлар доимий иш билан таъминланди. Мавсумий ишларга жалб қилинган 40 нафар ёшларга эса кунбай иш ҳақи тўланаётгани учун узумзор боғда барча ишлар режа асосида олиб борилмоқда.

Айни пайтда кластер корхонаси раҳбари Азимбой Жумамуродовнинг режалари катта. Жорий йил кузда узумзор боғлан илк ҳосил хирмонини кўтаришга тараддуд кўраётган кластер корхонасида сиғими 1000 тонналик замонавий музлатгич қуриб битказилди.

Асосий ҳосилни Россия ва Қозоғистонга экспорт қилишни режалаштирган корхона раҳбарига барча оила аъзолари яқин кўмакдош. Укалари Низомжон, Илҳомжон, Икромжон Жумамуродовлар ўзларининг доимий ва даромадли иш билан бандлигини таъминлагани учун Азимбой акасидан миннатдор.

Бу йил кластер корхонаси ишчилари сафига Жумамуродовлар оиласининг учинчи авлоди ҳам келиб қўшилишди. Ёш соҳибкор боғбонлар Сардор, Сарвар ва Санжар Сафарбоевлар узум токларини парваришлаш, занги ва бағазларга боғлаш, озиқлантириш ишларини пухта ўрганиб олишган. 12 гектарлик янги узумзор боғда эса мўл ҳосил ва бўлажак даромаддан дарак бериб, узум ғўралари қуёш нуридан баҳра олиб, пишиб-етилмоқда.

Робия ЙЎЛДОШЕВА.