Hokim yordamchisining koʻmagi bilan tadbirkor suv tozalash uskunasi oʻrnatib, 4 ta mashina yordamida aholiga kuniga 10-15 tonna tozalangan suv yetkazib bermoqda

Amudaryo tumanining 3-sektori hududida joylashgan Bobur nomli ovulda 873 ta xonadonda 1264 ta oilalar istiqomat qiladi. Shundan 321 tasi yosh oilalar hisoblanadi. 478 gektarlik hududni egallagan ovulda jami 4542 nafar oʻzbek, qoraqalpoq, qozoq, turkman, rus, tatar kabi turli millat vakillari ahil-inoq yashab, oʻzlarining hayotlarini oʻz mehnatlari bilan obod, farovon va toʻkin qilishga intilishmoqda. Hududdagi biri-biridan muhtasham, zamonaviy binolar, turar joylar, ravon, keng yoʻllar ezgu niyatlar yoʻlida qilinayotgan mehnatlarning natijasidan darak berib turibdi.

Ovul fuqarolar yigʻini masʼullari har yili yil boshida hududdagi kam taʼminlangan, ishsiz aholini roʻyxatga olib, ushbu oilalarning daromad manbaiga ega boʻlishi, iqtisodini tiklashiga harakat qilmoqda.

Aytish joizki, ovulda 861 ta xonadon tomorqa yeriga, shundan 216 ta xonadon esa qoʻshimcha tomorqa yeriga ega boʻlib, umumiy maydoni 110 gektarni tashkil etadi. 28 ta xonadonda qishda ham turli sabzavotlar, ertagi ekinlar koʻchatlari yetishtiruvchi issiqxonalar mavjud. 821 ta oilada uy parrandalari qoʻshimcha daromad keltirmoqda. Shuningdek, 2476 bosh yirik shoxli qoramollar, 160 bosh qoʻy va echkilar namunali boqilib, aholining chorva mahsulotlariga boʻlgan ehtiyojini qondirishga xizmat qilmoqda.

2021-yil boshida 58 nafar ayol “Ayollar daftari”ga, 115 nafar yoshlar esa “Yoshlar daftari”ga kiritilgan edi.

Ushbu fuqarolarning koʻpchiligi mehnatga layoqatli boʻlganligi tufayli ularning ish bilan band boʻlib, doimiy daromad manbaiga ega boʻlishiga va oilasida qoʻshimcha daromad olishiga koʻmaklashish maqsadida chorva mollari boqish, tomorqasidan unumli foydalanishga jalb etildi.

Joriy yilning oʻzida tuman hokimining mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha yordamchisi Alisher Yoʻldoshev ovul fuqarolar yigʻini masʼullari bilan hamkorlikda hududdagi oilalarni xatlovdan oʻtkazib, ijtimoiy himoyaga muhtoj, shuningdek ishlash istagidagi ishsiz yoshlarni, tadbirkorlik faoliyati bilan shugʻullanish istagidagi fuqarolarni aniqlab, kerakli amaliy yordamlarni koʻrsatib kelmoqda.

Hokim yordamchisining bevosita aralashuvi va koʻmagi bilan ovulda yashovchi fuqaro Baxtiyor Xidirboyev 33 mln. soʻm imtiyozli kredit hisobiga suv tozalash uskunasini oʻrnatdi va 7 ta yangi ish oʻrni yaratdi. Shuningdek Javlon Qutlimurodov ham suv tozalash uskunasi oʻrnatib, 4 ta mashina yordamida aholiga kuniga 10-15 tonna tozalangan suv yetkazib bermoqda.

Uy bekasi Matluba Abdullayeva 33 mln. soʻm kredit hisobiga 20 ta zotdor qoʻy sotib olib, parvarish qilayapti. Nizomiddin Xalillayev 2 sotixlik issiqxonada limon yetishtirishni, yoʻlga qoʻygan. Bobur nomli ovulda yashovchi yana bir fuqaro Maxsuda Samandarova esa yigʻin binosining boʻsh turgan xonasida tikuvchilik tsexi tashkil qilib, hududning 4 nafar ayol-qizlarini ish bilan taʼminladi.

Harakatda – barakat, deydi xalqimiz. Chindan-da, chor-atrofimizga nazar solsak, koʻnglida ezgu niyati, bilagida kuchi bor, yaxshi yashashga intilgan odamlarning hayoti fayzli, obod boʻlayotganini koʻramiz.

Tumanimizning ovul va mahallalarida faoliyat yuritayotgan hokim yordamchilari ana shunday fuqarolarning intilishlarini qoʻllab-quvvatlab, amaliy yordamlar berayotgani nur ustiga aʼlo nur boʻlayotir.

Oygul RAJABOVA.