Ҳоким ёрдамчисининг кўмаги билан тадбиркор сув тозалаш ускунаси ўрнатиб, 4 та машина ёрдамида аҳолига кунига 10-15 тонна тозаланган сув етказиб бермоқда

Амударё туманининг 3-сектори ҳудудида жойлашган Бобур номли овулда 873 та хонадонда 1264 та оилалар истиқомат қилади. Шундан 321 таси ёш оилалар ҳисобланади. 478 гектарлик ҳудудни эгаллаган овулда жами 4542 нафар ўзбек, қорақалпоқ, қозоқ, туркман, рус, татар каби турли миллат вакиллари аҳил-иноқ яшаб, ўзларининг ҳаётларини ўз меҳнатлари билан обод, фаровон ва тўкин қилишга интилишмоқда. Ҳудуддаги бири-биридан муҳташам, замонавий бинолар, турар жойлар, равон, кенг йўллар эзгу ниятлар йўлида қилинаётган меҳнатларнинг натижасидан дарак бериб турибди.

Овул фуқаролар йиғини масъуллари ҳар йили йил бошида ҳудуддаги кам таъминланган, ишсиз аҳолини рўйхатга олиб, ушбу оилаларнинг даромад манбаига эга бўлиши, иқтисодини тиклашига ҳаракат қилмоқда.

Айтиш жоизки, овулда 861 та хонадон томорқа ерига, шундан 216 та хонадон эса қўшимча томорқа ерига эга бўлиб, умумий майдони 110 гектарни ташкил этади. 28 та хонадонда қишда ҳам турли сабзавотлар, эртаги экинлар кўчатлари етиштирувчи иссиқхоналар мавжуд. 821 та оилада уй паррандалари қўшимча даромад келтирмоқда. Шунингдек, 2476 бош йирик шохли қорамоллар, 160 бош қўй ва эчкилар намунали боқилиб, аҳолининг чорва маҳсулотларига бўлган эҳтиёжини қондиришга хизмат қилмоқда.

2021 йил бошида 58 нафар аёл “Аёллар дафтари”га, 115 нафар ёшлар эса “Ёшлар дафтари”га киритилган эди.

Ушбу фуқароларнинг кўпчилиги меҳнатга лаёқатли бўлганлиги туфайли уларнинг иш билан банд бўлиб, доимий даромад манбаига эга бўлишига ва оиласида қўшимча даромад олишига кўмаклашиш мақсадида чорва моллари боқиш, томорқасидан унумли фойдаланишга жалб этилди.

Жорий йилнинг ўзида туман ҳокимининг маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ёрдамчиси Алишер Йўлдошев овул фуқаролар йиғини масъуллари билан ҳамкорликда ҳудуддаги оилаларни хатловдан ўтказиб, ижтимоий ҳимояга муҳтож, шунингдек ишлаш истагидаги ишсиз ёшларни, тадбиркорлик фаолияти билан шуғулланиш истагидаги фуқароларни аниқлаб, керакли амалий ёрдамларни кўрсатиб келмоқда.

Ҳоким ёрдамчисининг бевосита аралашуви ва кўмаги билан овулда яшовчи фуқаро Бахтиёр Хидирбоев 33 млн. сўм имтиёзли кредит ҳисобига сув тозалаш ускунасини ўрнатди ва 7 та янги иш ўрни яратди. Шунингдек Жавлон Қутлимуродов ҳам сув тозалаш ускунаси ўрнатиб, 4 та машина ёрдамида аҳолига кунига 10-15 тонна тозаланган сув етказиб бермоқда.

Уй бекаси Матлуба Абдуллаева 33 млн. сўм кредит ҳисобига 20 та зотдор қўй сотиб олиб, парвариш қилаяпти. Низомиддин Халиллаев 2 сотихлик иссиқхонада лимон етиштиришни, йўлга қўйган. Бобур номли овулда яшовчи яна бир фуқаро Махсуда Самандарова эса йиғин биносининг бўш турган хонасида тикувчилик цехи ташкил қилиб, ҳудуднинг 4 нафар аёл-қизларини иш билан таъминлади.

Ҳаракатда – баракат, дейди халқимиз. Чиндан-да, чор-атрофимизга назар солсак, кўнглида эзгу нияти, билагида кучи бор, яхши яшашга интилган одамларнинг ҳаёти файзли, обод бўлаётганини кўрамиз.

Туманимизнинг овул ва маҳаллаларида фаолият юритаётган ҳоким ёрдамчилари ана шундай фуқароларнинг интилишларини қўллаб-қувватлаб, амалий ёрдамлар бераётгани нур устига аъло нур бўлаётир.

Ойгул РАЖАБОВА.