Tumanda "E-AUKSION" elektron savdo platformasi orqali 859 ta lotlarda 219,8 gektar yer maydoni savdoga qoʻyildi

Soʻnggi yillarda qishloq xoʻjaligini isloh qilish va sohaga bozor mexanizmlarini joriy etish borasida izchil chora-tadbirlar amalga oshirilmoqda, Shu bilan birga, paxta va gʻalladan qisqartirilayotgan yer maydonlarida bogʻdorchilik, uzumchilik, poliz va sabzavotchilik, dukkakli va moyli ekinlarni yetishtirish sohasida eksportbop qishloq xoʻjaligi ekinlari ekishni koʻpaytirish, shuningdek, aholining keng qatlamlarini jalb qilish orqali ushbu yerlardan samarali foydalanish tizimini yaratish evaziga tarmoqda qoʻshimcha oʻsishga erishishda ilmiy asoslangan yondashuv va oʻrganishlarni inobatga olish taqozo etilmoqda.

Jumladan, hisob-kitoblarga koʻra 1 gektar maydonda yetishtirilgan paxta xom ashyosiga nisbatan uzumdan 7 baravar, gilosdan 6 baravar, yongʻoqdan 5 baravar koʻp daromad olish hamda ushbu yerlarda oilaviy tadbirkorlik doirasida kichik intensiv bogʻdorchilik, uzumchilik, poliz, dukkakli, moyli ekinlar, kartoshka yetishtirish va sabzavotchilik loyihalarini qoʻllab-quvvatlash orqali «Temir daftar», «Ayollar daftari» va «Yoshlar daftari»da roʻyxatda turgan ehtiyojmand oilalarning daromadli mehnat bilan bandligini taʼminlash boʻyicha katta imkoniyat mavjud.

Amudaryo tumanida aholining daromad topishga qaratilgan tadbirkorlik tashabbuslarini moliyaviy qoʻllab-quvvatlash, aholiga agrar tarmoqda oʻz biznesini tashkil etishga koʻmaklashish, qishloq xoʻjaligi mahsulotlarini yetishtirishda dehqon xoʻjaliklarining ulushini oshirish orqali oziq-ovqat xavfsizligini taʼminlash maqsadida manzilli ishlar amalga oshirilmoqda.

Xususan, joriy dehqonchilik yilida Amudaryo tuman hokimligi zahira yer maydonidan 3,9 gektar yer auktsion savdolariga qoʻyilgan boʻlib, mazkur auktsion savdolarida qatnashgan fuqarolardan 15 nafari gʻoliblikni qoʻlga kiritdilar. Auktsion savdolarida gʻolib boʻlgan 14 nafar ishsiz fuqaroning har biri 25 sotixdan, 1 nafar fuqaro esa 40 sotix yer egalari boʻlishdi. Auktsion gʻoliblariga Xolimbeg ovul fuqarolar yigʻini hududidagi “Usta Ollayor” fermer xoʻjaligi hisobidan 4 gektar yer maydoni ajratib berilib, ayni paytda yer egalari boʻlgan 15 nafar fuqarolar piyoz, kartoshka, karam, bulgʻor qalampiri, pomidor, sabzi kabi sabzavot ekinlarini parvarish qilishmoqda.

Shuni alohida eʼtirof etish kerakki, auktsion savdolarida ishtirok etib, yer egasi boʻlgan Jamol Iskandarov, Xosiyat Yoʻldosheva, Dilshodbek Qurbonboyev, Jamshid Tilavov, Dilmurod Ahmedov va ularning hamqishloqlari nafaqat oʻzlarining ish bilan bandligini taʼminlashdi, balki oilasining iqtisodini koʻtarish imkoniga ham ega boʻlishdi.

Oʻzbekiston Respublikasi Prezidentining 2021-yil 23-noyabrdagi “Meva-sabzavotchilik va uzumchilikda oilaviy tadbirkorlikni rivojlantirish, qishloq xoʻjaligi ishlab chiqarishida dehqon xoʻjaliklarining ulushini oshirish chora-tadbirlari toʻgʻrisida”gi Qarori ijrosi yuzasidan tumanda bu boradagi rejaga binoan 2022-yilda 897 gektar, 2023-yilda 578 gektar, 2024-yilda 437 gektar va 2025-yilda 330 gektar maydonda dehqon xoʻjaliklarini tashkil qilish koʻzda tutilgan.

2022-yilda jami 932,4 gektar maydonda 3579 lotda dehqon xoʻjaliklari tashkil qilinishi belgilandi. Bugungi kun xolatiga "E-AUKSION" elektron savdo platformasi orqali 674,4 gektar maydonida 2659 lotlarda tanlov gʻolibi aniqlandi va yana "E-AUKSION" elektron savdo platformasi orqali 219,8 gektar maydonda 859 lotlar savdo maydonchasiga qoʻyildi.

 “Bir kontur - bir mahsulot” tamoyili asosida ishlarni toʻgʻri tashkil qilish “Amudaryo tomorqa xizmat” MChJ klasteri tasarrufidagi dehqon xoʻjaliklari tomonidan yetishtirilgan qishloq xoʻjalik mahsulotlarining bozorbopligini taʼminlash, bozorlarda narx-navoni bir xil ushlab turishga erishiladi. Bundan tashqari, dehqon xoʻjaliklari tashkil qilish orqali shu kungacha 2659 ta fuqaroning doimiy ish bilan bandligi taminlandi va yana 859 nafar fuqaroning bandligini taʼminlash koʻzda tutilgan.

Shu bilan birga, mavjud dehqon xoʻjaliklarining iqtisodiy ahvolini yaxshilash, mahsulot yetishtirish hajmini oshirish masalasiga ham eʼtibor qaratmoqdamiz. Xususan, Oʻzbekiston fermer, dehqon xoʻjaliklari va tomorqa yer egalari Kengashi xuzuridagi fermer, dehqon xoʻjaliklari va tomorqa yer egalarini qullab-quvvatlash jamgʻarmasi mablagʻlari hisobidan dehqon xoʻjaliklari uchun 14 foizdan bank kreditlari berish ham yoʻlga qoʻyilgan.

Muxtaram Prezidentimiz tomonidan belgilab berilgan bu yoʻnalish, yaʼni «Temir daftar», «Ayollar daftari» va «Yoshlar daftari»da roʻyxatda turgan ehtiyojmand oilalarga yer maydonlari ajratib berish orqali ularning bandligini taʼminlashga qaratilgan saʼy-harakatlardan xalqimiz ham mamnun. Bu yil yer berilgan yoshlarimiz orasidan tajribali va tashabbuskorlarini aniqlab, kelgusi yillarda tuman zahira yer fondi hisobidan yer maydonlari ajratib berish, shu bilan birga ularning fermer xoʻjaliklarini tashkil qilish uchun oʻtkaziladigan tenderda ishtirok etishlari uchun sharoit yaratishga, shu orqali aholi farovonligini oshirishga qaratilgan ishlar izchil davom ettiriladi.

Javlon RAJABOV, Amudaryo tuman fermer, dehqon xoʻjaliklari va tomorqa yer egalari Kengashi xuzuridagi aholi xonadonlarida tomorqadan samarali foydalanish boʻyicha agronom.