Hokim va bitiruvchi yoshlar uchrashuvi boʻlib oʻtdi

2022-yil 23-iyun kuni Amudaryo tumani hokimligi binosida hokim va bitiruvchi yoshlar uchrashuvi boʻlib oʻtdi. Unda tuman hokimi Sultonboy Yoʻldashev, hokim oʻrinbosari Mahmud Shermetov, Mahalla va nuroniylarni qoʻllab-quvvatlash boʻlimi qoshidagi “Nuroniylar” jamoatchilik kengashi raisi oʻrinbosari Bekmon ota Allaberganov, tuman Xalq taʼlimi boʻlimi mudiri Akmal Ismailov, Qoraqalpogʻiston Respublikasi Joʻqorgʻi Kengashi deputati, 40-sonli umumiy oʻrta taʼlim maktabi direktori Sanobar Xoʻjamuratova hamda tumandagi 85 ta maktabning ilgʻor bitiruvchi yoshlari ishtirok etishdi.

Uchrashuvda tuman hokimi Sultonboy Yoʻldashev bitiruvchilarni yetuklik shahodatnomalarini olib, yangi hayot ostonasida turganliklari bilan samimiy tabrikladi.

Shundan soʻng Mahalla va nuroniylarni qoʻllab-quvvatlash boʻlimi qoshidagi “Nuroniylar” jamoatchilik kengashi raisi oʻrinbosari Bekmon ota Allaberganov oʻzining maktab davri, oʻsha paytdagi taʼlim tizimi haqidagi xotiralari bilan oʻrtoqlashib, kechagi maktab bitiruvchilari bilan bugungi kun bitiruvchilarini qiyoslab, ularning oʻrtasida katta farq mavjudligini, bugun yoshlar uchun barcha imkoniyatlar eshiklari keng ochilganini taʼkidladi. Shuningdek, yangi hayot ostonasida turgan bitiruvchilarga turli yot illatlarga berilmaslik, internetdan foydalanish madaniyatiga amal qilish boʻyicha oʻzining nasihat hamda koʻrsatmalarini berib oʻtdi.

Uchrashuvda Qoraqalpogʻiston Respublikasi Joʻqorgʻi Kengashi deputati, 40-sonli maktab direktori Sanobar Xoʻjamuratova oʻzining yoshlik davrini, oʻqishga kirish yoʻlida chekan mashaqqatlarini soʻzlab, bugungi kunda yoshlar uchun ulkan imkoniyatlar yaratilganini, yoshlardan esa faqatgina undan foydalanish talab etilishini aytib, bitiruvchilarga katta shijoat ulashdi.

 Shundan soʻng tuman Xalq taʼlimi boʻlimi mudiri Akmal Ismailov tumanda joriy oʻquv yilida 2 ming 582 nafar bitiruvchi 11-sinfni tugatganligi, fanlarini aʼlo baholarga oʻzlashtirgan 15 nafar oʻquvchi oltin va 2 nafar oʻquvchi kumush medal bilan taqdirlanib, 5 nafar oʻquvchi ingliz tili boʻyicha xalqaro V2 va S1 sertifikati sohibi boʻlishganini, undan tashqari 2 nafar oʻquvchi Toshkent amaliy fanlar universitetiga imtihonlarsiz kirish boʻyicha sertifikat bilan taqdirlanganini mamnuniyat bilan eʼtirof etdi. U oʻz soʻzida bitiruvchilarning Oliy taʼlim muassasalariga davlat granti asosida oʻqishga kirishlarida muvaffaqiyat va omad tiladi.

Uchrashuv davomida tuman hokimi Sultonboy Yoʻldashev bitiruvchilarni erishgan yutuqlari bilan tabriklab, ularga taʼlim va tarbiya bergan ustozlari hamda ota-onalariga oʻzining chuqur minnaddorligini bildirdi. Shuningdek, bitiruvchilarning kelgusida Vatan ravnaqiga hissa qoʻshadigan munosib farzand boʻlib yetishishlariga ishonch bildirdi.

Uchrashuv yakunida xalqaro va milliy sertifikatlar sohibi, 40-sonli umutaʼlim maktabning ingliz tili fani oʻqituvchisi Nurbek Jumaniyazov hamda matematika fanidan milliy sertifikatga ega boʻlgan, 94 foiz oʻquvchisi Oliy taʼlim muassasi talabasi boʻlgan 40-sonli maktabning matematika fani oʻqituvchisi Sherzod Ashirovlar bitiruvchilarga oʻzlarining samimiy tabriklarini yoʻllashdi.

Bitiruvchi yoshlar oʻzlariga bildirilgan yuksak eʼtibor hamda ishonchni oqlagan holda kelgusida Vatanimiz koriga yaraydigan komil insonlar boʻlib yetishishlariga tilakdoshmiz.

Tuman hokimligining Axborot xizmati.