GʻALLA XIRMONLARI SARBALAND FERMER XOʻJALIKLARI

Gʻalla – insoniyatning muhim hayot manbalaridan biri. Gʻalla xirmonlari qanchalik yuksak boʻlsa, hayot farovonligi ham shunchalik yuqori boʻladi. Shu bois, mamlakatimizda istiqlolning ilk kunlaridanoq oʻz gʻalla mustaqilligiga erishish maqsadida agrar sohaning ushbu yoʻnalishida jiddiy islohotlar amalga oshirildi.

Bugungi kunda mamlakatimizning barcha hududlarida, shu jumladan Amudaryo tumanida ham gʻallachilik klaster korxonalari, gʻallachilik tarmogʻiga ega fermer xoʻjaliklari tomonidan gʻalla yetishtirish boʻyicha har yilgi shartnomaviy rejalar ortigʻi bilan bajarilib, gʻallani qayta ishlash korxonalarining yil davomida xalqimizni sifatli un va un mahsulotlari bilan taʼminlash imkoniyati oshib bormoqda.

Amudaryo tumanida bugʻdoy yetishtirish boʻyicha oʻziga xos tajriba maktabiga ega gʻallakorlar koʻp. Birgina Doʻrman ovuli hududidagi 20 ta fermer xoʻjaligida gʻallachilik tarmogʻi mavjud. Mazkur hududdagi fermer xoʻjaliklarining 366 gektar bugʻdoyzorlarida ham joriy dehqonchilik yilida moʻl hosil yetishtirildi. Hudud fermer xoʻjaliklarining umumiy gʻalla xirmoni 914 tonnadan oshib ketdi. Hosildorlik esa kutilganidan ham ziyoda boʻldi. Yaʼni, gektariga 70 tsentnerni tashkil etmoqda.

Hududda ilgʻor gʻallakorlar talaygina. Xususan, Toʻraboy Pirnazarov rahbarligidagi fermer xoʻjaligi hududdagi gʻallakorlar orasida hamisha peshqadam. 2021-2022-yil hosili uchun mazkur fermer xoʻjaligida 20 gektar yerga bugʻdoyning tumanimiz iqlimi sharoitiga mos navlaridan ekildi. Bugʻdoyzorlarda kuzgi-qishgi agrotexnik tadbirlar sifatli amalga oshirilib, gektarlarda moʻl gʻalla hosili yetishtirildi. Xoʻjalik gʻallakorlari hosildorlikni 70 tsentnerga, umumiy qirmizi don xirmonini esa 140 tonnaga yetkazishdi. Ayni paytda fermer xoʻjaligi dalalarida gʻalla oʻrim-yigʻimi qizgʻin davom etmoqda. Bugʻdoy oʻrim-yigʻimi va yanchish ishlarida kombaynchi Xurshid Otajonovning hissasi katta boʻlmoqda.

Amudaryo tumanidagi “Bekman Allaberganov” nomli fermer xoʻjaligi gʻallakorlari ham joriy yilgi qirmizi don xirmonini shartnomaviy rejadagi 85 tonna oʻrniga 86 tonnaga, hosildorlikni esa har gektar hisobiga 70 tsentnerga yetkazdilar.

Mazkur fermer xoʻjaligidagi mavjud 34 gektar gʻallazorda ayni paytda hosil oʻrim-yigʻim ishlari uyushqoqlik bilan davom ettirilmoqda.

Mehnat qilganning rizqi ziyoda, nasibasi ulugʻ boʻladi, deydilar. “Bekman Allaberganov” fermer xoʻjaligi ishchilari 34 gektar yerdagi bugʻdoyzorda barcha mavsumiy yumushlarni bekam-u koʻst ado etishib, avvalo, gektarlarda toʻliq nihol olishga erishdilar. Oʻz vaqtida amalga oshirilgan kuzgi-qishgi va bahorgi agrotexnik tadbirlar natijasida dalalarda moʻl hosil toʻplandi.

Bugʻdoyzorlarda oziqlantirish, begona oʻtlardan tozalash, dalalarni oʻrim-yigʻim mavsumiga tayyorlash ishlarida uch nafar ijarachi-dehqonlar samarali faoliyat olib bordilar. Qilingan halol va fidoyi mehnatning samarasi bugun xoʻjalikning yuksak gʻalla xirmonida namoyon.

Yetishtirilgan gʻalla hosilidan 300 million soʻmlik daromad olishni moʻljallayotgan fermer xoʻjaligi gʻallakorlari uchun shundan naqd 100 million soʻmi sof daromaddir.

Qolaversa, shartnomaviy rejadan tashqari yetishtirilgan hosilning fermer xoʻjaligi tasarrufida qolishi xoʻjalik ishchilarining moddiy manfaatdorligi va iqtisodiy farovonligini yanada oshirish imkonini beradi.

Ayni kunlarda amudaryolik gʻallakorlar yetishtirilgan qirmizi don mahsulotini nest-nobut qilmay, davlat omborlariga topshirish, hosilning soʻnggi misqoligacha yigʻishtirib olish ishlarini uyushqoqlik bilan olib borishmoqda.

Robiya YOʻLDOShEVA.