ҒАЛЛА ХИРМОНЛАРИ САРБАЛАНД ФЕРМЕР ХЎЖАЛИКЛАРИ
Ғалла – инсониятнинг муҳим ҳаёт манбаларидан бири. Ғалла хирмонлари қанчалик юксак бўлса, ҳаёт фаровонлиги ҳам шунчалик юқори бўлади. Шу боис, мамлакатимизда истиқлолнинг илк кунлариданоқ ўз ғалла мустақиллигига эришиш мақсадида аграр соҳанинг ушбу йўналишида жиддий ислоҳотлар амалга оширилди.
Бугунги кунда мамлакатимизнинг барча ҳудудларида, шу жумладан Амударё туманида ҳам ғаллачилик кластер корхоналари, ғаллачилик тармоғига эга фермер хўжаликлари томонидан ғалла етиштириш бўйича ҳар йилги шартномавий режалар ортиғи билан бажарилиб, ғаллани қайта ишлаш корхоналарининг йил давомида халқимизни сифатли ун ва ун маҳсулотлари билан таъминлаш имконияти ошиб бормоқда.
Амударё туманида буғдой етиштириш бўйича ўзига хос тажриба мактабига эга ғаллакорлар кўп. Биргина Дўрман овули ҳудудидаги 20 та фермер хўжалигида ғаллачилик тармоғи мавжуд. Мазкур ҳудуддаги фермер хўжаликларининг 366 гектар буғдойзорларида ҳам жорий деҳқончилик йилида мўл ҳосил етиштирилди. Ҳудуд фермер хўжаликларининг умумий ғалла хирмони 914 тоннадан ошиб кетди. Ҳосилдорлик эса кутилганидан ҳам зиёда бўлди. Яъни, гектарига 70 центнерни ташкил этмоқда.
Ҳудудда илғор ғаллакорлар талайгина. Хусусан, Тўрабой Пирназаров раҳбарлигидаги фермер хўжалиги ҳудуддаги ғаллакорлар орасида ҳамиша пешқадам. 2021-2022 йил ҳосили учун мазкур фермер хўжалигида 20 гектар ерга буғдойнинг туманимиз иқлими шароитига мос навларидан экилди. Буғдойзорларда кузги-қишги агротехник тадбирлар сифатли амалга оширилиб, гектарларда мўл ғалла ҳосили етиштирилди. Хўжалик ғаллакорлари ҳосилдорликни 70 центнерга, умумий қирмизи дон хирмонини эса 140 тоннага етказишди. Айни пайтда фермер хўжалиги далаларида ғалла ўрим-йиғими қизғин давом этмоқда. Буғдой ўрим-йиғими ва янчиш ишларида комбайнчи Хуршид Отажоновнинг ҳиссаси катта бўлмоқда.
Амударё туманидаги “Бекман Аллаберганов” номли фермер хўжалиги ғаллакорлари ҳам жорий йилги қирмизи дон хирмонини шартномавий режадаги 85 тонна ўрнига 86 тоннага, ҳосилдорликни эса ҳар гектар ҳисобига 70 центнерга етказдилар.
Мазкур фермер хўжалигидаги мавжуд 34 гектар ғаллазорда айни пайтда ҳосил ўрим-йиғим ишлари уюшқоқлик билан давом эттирилмоқда.
Меҳнат қилганнинг ризқи зиёда, насибаси улуғ бўлади, дейдилар. “Бекман Аллаберганов” фермер хўжалиги ишчилари 34 гектар ердаги буғдойзорда барча мавсумий юмушларни бекам-у кўст адо этишиб, аввало, гектарларда тўлиқ ниҳол олишга эришдилар. Ўз вақтида амалга оширилган кузги-қишги ва баҳорги агротехник тадбирлар натижасида далаларда мўл ҳосил тўпланди.
Буғдойзорларда озиқлантириш, бегона ўтлардан тозалаш, далаларни ўрим-йиғим мавсумига тайёрлаш ишларида уч нафар ижарачи-деҳқонлар самарали фаолият олиб бордилар. Қилинган ҳалол ва фидойи меҳнатнинг самараси бугун хўжаликнинг юксак ғалла хирмонида намоён.
Етиштирилган ғалла ҳосилидан 300 миллион сўмлик даромад олишни мўлжаллаётган фермер хўжалиги ғаллакорлари учун шундан нақд 100 миллион сўми соф даромаддир.
Қолаверса, шартномавий режадан ташқари етиштирилган ҳосилнинг фермер хўжалиги тасарруфида қолиши хўжалик ишчиларининг моддий манфаатдорлиги ва иқтисодий фаровонлигини янада ошириш имконини беради.
Айни кунларда амударёлик ғаллакорлар етиштирилган қирмизи дон маҳсулотини нест-нобут қилмай, давлат омборларига топшириш, ҳосилнинг сўнгги мисқолигача йиғиштириб олиш ишларини уюшқоқлик билан олиб боришмоқда.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
