Uch kunlik oʻquv-amaliy seminarni muvaffaqiyatli yakunlagan hokim yordamchilariga maxsus sertifikatlar topshirildi

Yangiliklar 17 06 2022

1. Bugungi kunda Amudaryo tumanidagi 49 ta ovul va mahalla fuqarolar yigʻinida tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha 49 nafar hokim yordamchilari faoliyat yuritmoqda.

Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi Biznes va tadbirkorlik Oliy maktabi hamda Mahallabay ishlash va tadbirkorlikni rivojlantirish agentligi bilan hamkorlikda tuzilgan memorandumga asosan 9-13-iyun kunlari Beruniy tumanida joylashgan 35-sonli ixtisoslashtirilgan davlat umumtaʼlim maktabi binosida Amudaryo, Beruniy, Toʻrtkoʻl, Ellikqalʼa tumani mahallalarida faoliyat yuritayotgan hokim yordamchilari uchun “Hokim yordamchilari faoliyatini samarali tashkil qilish: mahallada tadbirkorlikni rivojlantirish, aholi bandligini taʼminlash va kambagʻallikni qisqartirish yoʻllari” mavzusida seminar tashkil etilgan edi.

Uch kun davom etgan seminarda hokim yordamchilariga malakali professor-oʻqituvchilar tomonidan aholi bandligini taʼminlash yoʻllari, mahallalarda tadbirkorlikni rivojlantirishning moliyaviy manbalari, mahallaning “oʻsish nuqtasi”ni aniqlash, “mahallabay” ishlash tizimi kabi mavzularda batafsil maʼlumotlar berildi.

Qolaversa, maʼruzachilar tomonidan iqtisodiyot va menejment asoslari yoʻnalishida mahorat darslari tashkil etilib, hokim yordamchilari uchun faoliyatlari davomida zarur boʻladigan bilimlar noanʼanaviy usullarda tushuntirildi.

Oʻquv-amaliy seminar 13-iyun sanasida yakunlandi. Mazkur tumanlar kesimidagi seminarda jami 162 nafar hokim yordamilari oʻz bilimlarini amaliy va keys mashgʻulotlar asosida yanada mustahkamladilar.

 13-iyun kuni Amudaryo tumani hokimligi binosida oʻquv-kursni yakunlab, testlardan muvaffaqiyatli oʻtgan hokim yordamchilariga sertifikatlar tantanali tarzda topshirildi.

Tadbirda Amudaryo tumani hokimining birinchi oʻrinbosari Rashid Salayev, Biznes va tadbirkorlik oliy maktabi Qoraqalpogʻiston Respublikasi filiali rahbari Gulzira Rizayeva hamda Iqtisodiy taraqqiyot va kambagʻallikni qisqartirish vazirligi huzuridagi Mahallabay ishlash va tadbirkorlikni rivojlantirish agentligining Qoraqalpogʻiston Respublikasi boshqarmasi bosh mutaxassisi Aziza Xudaynazarovalar ishtirok etishdi.

Tadbir davomida Gulzira Rizayeva tumanda hokim yordamchilari tomonidan aholinining yashash sharoitini yaxshilash, bandligini taʼminlash, tadbirkorlik rejalarini qoʻllab-quvvatlash borasida amalga oshirilayotgan ishlarni alohida eʼtirof etib oʻtdi.

Shuningdek, hokim yordamchilariga xalq xizmatiga doimo shay boʻlib, sidqidildan mehnat qilishlarida kuch-quvvat va zafarlar tiladi.

Tuman hokimligining Axborot xizmati.