AMUDARYoLIK PILLAKORLAR YuKSAK “KUMUSh TOLA” XIRMONINI BUNYoD ETIShDI

Pillachilik – mamlakatimiz qishloq xoʻjaligining muhim tarmoqlaridan biri sanalishi bilan birga, ipakchilik sanoatini rivojlantirish hamda ota-bobolarimizning boy madaniy merosi hisoblanadi. Shu bois, mazkur qadriyatni davom ettirish mustaqil davlatimizda muhim va dolzarb masalalardan biri hisoblanadi.

Pillakorlarimiz tomonidan yetishtirilayotgan pilla salmogʻini va har bir quti qurt urugʻidan olinadigan hosildorlikni talab darajasiga yetkazish maqsadida ozuqa miqdori  va sifati hamda ipak qurtining oziqlanish maydoni bilan bogʻliq masalalarni ijobiy hal qilish maqsadida pillachilik tarmogʻiga ega fermer xoʻjaliklarida mavjud tutzorlar parvarishiga alohida eʼtibor qaratilayotgani bois, Amudaryo tumanida har yili pilladan yuqori hosil olinishiga erishilmoqda.

Oʻzbekiston Respublikasi Prezidentining 2017-yil 29-martdagi “Oʻzbek ipaksanoat” uyushmasi faoliyatini tashkil etish chora-tadbirlari toʻgʻrisida”gi Qarori Amudaryo tumanida pillachilik sohasidagi islohotlarning izchil amalga oshirilishiga turtki boʻldi.

Joriy yilda Amudaryo tumanida “Jayhun silk” masʼuliyati cheklangan jamiyati bilan 1980 nafar kasanachi oilalar oʻrtasida tuzilgan shartnomalarga asosan amudaryolik mohir pillakorlar 4163 quti ipak qurti parvarishlab, pilla yetishtirish boʻyicha shartnomaviy rejani ortigʻi bilan bajardilar. Davlat xazinasiga rejadagi 237 tonna oʻrniga 237 ming 40 kilogramm yuqori sifatli sanoat xom ashyosi yetkazib berldi.

Tumanning pillachilik sohasini rivojlantirishga oʻzining munosib hissasini qoʻshib kelayotgan Oʻrta qalʼa ovulida yashovchi tajribali pillakor Suʼdulla Toʻrayevning joriy yilda erishgan yutugʻi eʼtiborga munosib. U zmmasidagi 86 kilogramm oʻrniga 142 kilogramm yuqori sifatli pilla hosili yetishtirib, Oʻrta qalʼalik pillakorlar orasida peshqadam boʻldi.

Yana bir kasanachi-pillakor Rustam Eshimov esa har bir quti ipak qurti urugʻidan oʻrtacha 65 kilogrammdan hosil yetishtirib, zimmasidagi 143 kilogramm oʻrniga 230 kilogramm pilla topshirishga muvaffaq boʻldi.

Shuningdek, zimmalaridagi shartnomaviy  rejalarini birinchilardan boʻlib ado etgan Toshyop ovulida yashovchi kasanachi-pillakor Shahnoza Abdullayeva 57 kilogramm oʻrniga 84 kilogramm pilla hosili yetishtirib, yetishtirilgan hosilning barchasini yuqori navlarga  topshirdi.

Albatta, erishilgan yutuqlar pillakorlarimizning fidoyi mehnatlari natijasidir. Chunki ipak qurti parvarishlash mavsumining muvaffaqiyatli oʻtishi koʻp jihatdan mavsumga tayyorgarlik ishlarining agrotexnika qoidalariga muvofiq tashkil etilishiga bogʻliq. Bunda ipak qurtining oziqlanish maydoni – tutzorlar hosildorligini oshirish borasidagi chora-tadbirlar muhim ahamiyatga ega. Shu bois, amudaryolik pillakorlar mavjud tutzorlarda kuzgi va bahorgi agrotexnik tadbirlarni oʻz vaqtida, belgilangan reja asosida tashkil etib, har bir tup tut daraxtini qatʼiy nazoratga oldilar. Avvaldan mavjud boʻlgan tutzorlar kaliyli va fosforli oʻgʻitlar bilan oziqlantirilib, oralari yumshatildi. Dalalar chetlariga, ariqlar boʻylariga yangidan ekilgan tut koʻchatlariga alohida shakl berilib, atroflari begona oʻtlardan tozalandi. Natija esa kutilganidan ziyoda boʻldi.

Ipak qurti parvarishi jarayonida barg yetishmovchiligi bilan bogʻliq muammo kuzatilmadi va 237 tonnadan ortiq boʻlgan Amudaryo “kumush tola” xirmoni bunyod etildi.

Xoʻjaliklar qurtxonalarida pilla terish jarayonlari hamon uyushqoqlik bilan davom etmoqda. Joriy qishloq xoʻjalik yilining dastlabki hosil xirmonini yanada yuksaltirish maqsadida yetishtirilgan hosilni nest-nobud qilmay davlat xazinasiga topshirish maqsadida pillakorlar hamjihatlik bilan mehnat qilishmoqda.

Aziz pillakorlarimiz boshlab bergan mehnat gʻalabasi Amudaryo tumani qishloq xoʻjaligi va ishlab chiqarishning turli sohalarida ham izchil davom etsin, deya tilakdoshlik bildiramiz.

Robiya YOʻLDOShEVA.