«ONA TABIAT BAGʻRIDA BIR KUN» MAVZUSIDA AMUDARYoLIK YoShLAR UChUN QUYI AMUDARYo DAVLAT BIOSFERA REZERVATIGA SAYoHAT UYuShTIRILDI

Atrofimizni oʻrab turgan jonli tabiat betakror goʻzalligi, turfa neʼmatlari bilan hayotimizga fayz bagʻishlab turadi. Inson hayoti  uchun eng zaruriy manba – bitmas-tuganmas kislorod fabrikasi, koʻzlarimizga quvonch bagʻishlovchi fauna va florasi naqadar bebaho ekanligini anglash, bu goʻzallikni boyitishga hissa qoʻshish – nafaqat oʻzimiz, balki insoniyat uchun azaliy qadriyatdir. Chunki ona tabiatsiz biz hech kim emasmiz va oʻzimiz jonajon tabiat mahsulimiz.

Qoraqalpogʻiston Respublikasi Ekologiya va atrof-muhitni muhofaza qilish qoʻmitasining Amudaryo tuman boʻlimi tomonidan yoshlarning ekologik madaniyatini shakllantirish, ekologik bilimini va ekologiyaga boʻlgan munosabatini, mehr-muhabbatini kuchaytirish munosabatini, mehr-muhabbatini kuchaytirish maqsadida Quyi Amudaryo davlat biosfera rezervatiga tez-tez sayohatlar tashkil etilib, atrof-muhit muhofazasiga bagʻishlangan targʻibot-tashviqot tadbirlari amalga oshirilib kelinmoqda.

Maʼlumki, Quyi Amudaryo davlat biosfera rezervati 2021-yil 16-sentyabrda YuNESKOning  “Inson va biosfera” dasturi doirasida butunjahon  qoʻriqxonalari tarmogʻiga kiritildi. Quyi Amudaryo davlat biosfera rezervati Amudaryo quyi oqimining shimoliy qismida, Orol dengizining sobiq sohili janubiy-sharqida joylashgan boʻlib, bu Markaziy Osiyodagi eng yirik tabiiy toʻqaylardan biri hisoblanadi. U global nuqtai nazardan yoʻq boʻlib ketish xavfi ostida turgan noyob ekotizmdir.

Bu hudud oʻsimliklar va hayvonlarning muhim yashash joyi  boʻlib, Oʻrta Osiyoning choʻl mintaqalarida eng yuqori  biologik xilma-xilligi bilan ajralib turadigan va shuningdek, yoʻqolib ketish xavfi ostida turgan Buxoro kiyiklarining qoʻriqlanadigan tabiiy yashash joyidir. Qoraqalpogʻiston Respublikasi ekologiya va atrof-muhitni muhofaza qilish qoʻmitasining Amudaryo tuman boʻlimi tomonidan yaqinda amudaryolik yoshlar uchun uyushtirilgan “Ona tabiat bagʻrida bir kun” mavzusidagi maʼnaviy-maʼrifiy va ekologik targʻibot-tashviqot tadbirida bu haqda yoshlarga mutaxassislar tomonidan zarur tushuncha va maʼlumotlar berildi.

Yoshlar Quyi Amudaryo davlat biosfera rezervati Qoraqalpogʻiston Respublikasining Beruniy va Amudaryo tumanlari hududida joylashgani, Markaziy Osiyo oʻrmonlarining 20 foizi, Oʻzbekiston oʻrmonlarining 74 foizi ushbu hududga  toʻgʻri kelishi haqidagi qimmatli maʼlumotlarga ega boʻldilar.

Umumiy yer maydoni 69 ming gektarni tashkil etuvchi mazkur biosfera rezervatidagi mavjud 419 turdagi oʻsimliklarning 2 turi, 36 turdagi hayvonlarning 1 tasi, 43 xil baliq turining 12 tasi, 246 qushlar turidan 23 ta si Qizil Kitobga kiritilgani haqidagi maʼlumotlar sayohat ishtirokchilari boʻlgan yoshlar qalbida atrof-muhit, ayniqsa, jonli tabiat bilan ehtiyotkorona munosabatda boʻlish tuygʻusini uygʻotdi.

Ayniqsa, yoshlar Oʻzbekiston Respublikasi Fanlar Akademiyasi Qoraqalpogʻiston boʻlimi, oliy taʼlim muassasalari professor oʻqituvchilari, talabalari bilan hamkorlikda Buxoro bugʻularining populyatsiyasi, biosfera rezervati entemofaunasi, hududdagi oʻsimliklarning monitoringi, olib borilayotgan ilmiy tadqiqot ishlariga katta qiziqish bildirdilar.

Yoshlar jonli tabiat moʻʼjizalari bilan oshno boʻlib, Buxoro bugʻulari va turfa qushlar, oʻsimliklar olami bilan yaqindan tanishdilar. “Ona tabiat bagʻrida bir kun” mavzusida, amudaryolik yoshlar ishtirokida oʻtkazilgan maʼnaviy-maʼrifiy va ekologik targʻibot-tashviqot sayohat tadbiri yoshlarning ekologiya va atrof-muhit boʻyicha bilim va koʻnikmalarini oshirishlarida muhim ahamiyat kasb etdi.

Robiya YOʻLDOShEVA.