Oliy Majlis Senatining 25-yalpi majlisida qabul qilingan qonun hujjatlarining mazmun-mohiyatini tushuntirishga bagʻishlangan yigʻilish boʻlib oʻtdi

Oliy Majlis Senatining 25-yalpi majlisida qabul qilingan qonun hujjatlarining mazmun-mohiyatini tushuntirishga bagʻishlangan yigʻilish boʻlib oʻtdi

Maʼlumki, joriy yil 28-29 aperl kunlari Toshkent shahrida Oʻzbekiston Respublikasi Oliy Majlisi Senatining yigirma beshinchi yalpi majlisi boʻlib oʻtgan edi. Yalpi majlisda 21 ta masala, shu jumladan 10 ta Qonun loyihasi koʻrib chiqilib, senatorlar tomonidan qizgʻin muhokama qilindi.

 19-may kuni Amudaryo tumani hokimligining majlislar zalida Senatning yalpi majlisida koʻrib chiqilgan masalalar, muhokama qilingan qonun loyihalarining mazmun-mohiyatini tushuntirish va jamoatchilik nazoratini yoʻlga qoʻyish boʻyicha yigʻilish boʻlib oʻtdi.

Yigʻilishda tuman hokimining birinchi oʻrinbosari Rashid Salayev, Qoraqalpogʻiston Respublikasi Joʻqorgʻi Kengesi deputati Sanobar Xoʻjamuratova, Xalq deputatlari Amudaryo tuman Kengashi kotibiyati mudiri Mansur Oʻrazbayev shuningdek, tumandan saylangan Qoraqalpogʻiston Respublikasi Joʻqorgʻi Kengesi deputatlari, Xalq deputatlari tuman Kengashi deputatlari, sektor rahbarlari, hokim oʻrinbosarlari hamda tegishli korxona va tashkilotlar rahbarlari, ommaviy axborot vositalari vakillari ishtirok etishdi.

Dastlab, Qoraqalpogʻiston Respublikasi Joʻqorgʻi Kengesi deputati Sanobar Xoʻjamuratova yalpi majlis davomida koʻrib chiqilgan maslalar yuzasidan maʼruza qildi.

 Shundan soʻng, “Pochta aloqasi toʻgʻrisida”gi Qonun loyihasining mazmun-mohiyati yuzasidan tuman Pochta aloqa boʻlimi boshligʻi Shakir Gaipovning maʼruzasi tinglandi.

Qayd etilganidek, Qonun loyihasi pochta aloqasining xavfsizligini taʼminlash choralari toʻgʻrisidagi yangi norma bilan toʻldirilmoqda. Qolaversa davlat tomonidan pochta aloqasini xalqaro normalar va standartlarga muvofiq rivojlantirish boʻyicha bir qator chora-tadbirlar belgilangan.

“Ichimlik suvi taʼminoti va oqova suvlarni chiqarib yuborish toʻgʻrisida”gi Qonun loyihasining mazmun-mohiyati bilan “Qoraqalpoqsuvtaʼminoti” masʼuliyati cheklangan jamiyati Amudaryo tumani filiali boshligʻi Sanjar Muratov tanishtirib oʻtdi. Qonun ichimlik suvidan foydalanish bilan bogʻliq barcha masalalarni tartibga solishga xizmat qiladi.

 Yigʻilish davomida “Oʻzbekiston Respublikasida tibbiy-ijtimoiy xizmatlar tizimi takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida”gi Qonun loyihasi ham koʻrib chiqildi.

Shundan keyin “Koʻp kvartirali uylarni boshqarish tizimi takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonun loyihasi toʻgʻrisida tuman Uy-joy kommunal xizmat koʻrsatish boʻlimi boshligʻi Botir Atabillayev maʼlumot berdi.

 Taʼkidlanganidek, mazkur Qonunning hayotga tatbiq etilishi natijasida kommunal xizmat koʻrsatish sohasida, shu jumladan koʻp kvartirali uylarni saqlash va undan foydalanishda qonun buzilish holatlarini oldini olishga hamda aholining xavfsiz yashashiga sharoit yaratib berilishiga erishiladi.

Yigʻilishda Oʻzbekiston Respublikasining “Soliq kodeksiga oʻzgartish va qoʻshimchalar kiritish toʻgʻrisida”gi Qonun loyihasi bilan tuman Davlat soliq inspektsiyasi boshligʻi Aydos Seyitov tanishtirib oʻtdi.

Shundan soʻng, “Yoshlarga oid davlat siyosatining hududlarda amalga oshirilishi boʻyicha reyting tizimini joriy etish toʻgʻrisida”gi Senat Qarori ijrosi yuzasidan Yoshlar ishlari agentligi tuman boʻlimi boshligʻi Sardor Ismoilov axborot berdi.

 Axborotda taʼkidlanganidek, Yoshlar muammolarini mahallabay mexanizm asosida tizimli bartaraf etish boʻyicha “Yoshlar balansi”ni shakllantirish, “Yoshlar daftari”ni yuritish va “Yoshlar dasturi”ni amalga oshirish boʻyicha muhim yoʻnalishi belgilab olingan.

 Yigʻilish kun tartibidagi navbatdagi masala yuzasidan tuman hokimligining Bolalarni himoya qilish masalalari shoʻʼbasi mudiri Jahongir Xolmurodovning ham axboroti tinglandi. Maʼruzada bolalarni himoya qilish borasida tumanda amalga oshirilayotgan ishlar haqida batafsil maʼlumot berildi.

 Yigʻilish ishtirokchilari kun tartibida koʻrib chiqilgan masalalar yuzasidan oʻz fikr va mulohazalarini bildirdi. Shuningdek, oʻzlarini qiziqtirgan savollar bilan mutasaddilarga murojaat qilib, tegishlicha javoblar oldi.

Tuman hokimligining Axborot xizmati.