Олий Мажлис Сенатининг 25-ялпи мажлисида қабул қилинган қонун ҳужжатларининг мазмун-моҳиятини тушунтиришга бағишланган йиғилиш бўлиб ўтди

Олий Мажлис Сенатининг 25-ялпи мажлисида қабул қилинган қонун ҳужжатларининг мазмун-моҳиятини тушунтиришга бағишланган йиғилиш бўлиб ўтди

Маълумки, жорий йил 28-29 аперль кунлари Тошкент шаҳрида Ўзбекистон Республикаси Олий Мажлиси Сенатининг йигирма бешинчи ялпи мажлиси бўлиб ўтган эди. Ялпи мажлисда 21 та масала, шу жумладан 10 та Қонун лойиҳаси кўриб чиқилиб, сенаторлар томонидан қизғин муҳокама қилинди.

 19 май куни Амударё тумани ҳокимлигининг мажлислар залида Сенатнинг ялпи мажлисида кўриб чиқилган масалалар, муҳокама қилинган қонун лойиҳаларининг мазмун-моҳиятини тушунтириш ва жамоатчилик назоратини йўлга қўйиш бўйича йиғилиш бўлиб ўтди.

Йиғилишда туман ҳокимининг биринчи ўринбосари Рашид Салаев, Қорақалпоғистон Республикаси Жўқорғи Кенгеси депутати Санобар Хўжамуратова, Халқ депутатлари Амударё туман Кенгаши котибияти мудири Мансур Ўразбаев шунингдек, тумандан сайланган Қорақалпоғистон Республикаси Жўқорғи Кенгеси депутатлари, Халқ депутатлари туман Кенгаши депутатлари, сектор раҳбарлари, ҳоким ўринбосарлари ҳамда тегишли корхона ва ташкилотлар раҳбарлари, оммавий ахборот воситалари вакиллари иштирок этишди.

Дастлаб, Қорақалпоғистон Республикаси Жўқорғи Кенгеси депутати Санобар Хўжамуратова ялпи мажлис давомида кўриб чиқилган маслалар юзасидан маъруза қилди.

 Шундан сўнг, “Почта алоқаси тўғрисида”ги Қонун лойиҳасининг мазмун-моҳияти юзасидан туман Почта алоқа бўлими бошлиғи Шакир Гаиповнинг маърузаси тингланди.

Қайд этилганидек, Қонун лойиҳаси почта алоқасининг хавфсизлигини таъминлаш чоралари тўғрисидаги янги норма билан тўлдирилмоқда. Қолаверса давлат томонидан почта алоқасини халқаро нормалар ва стандартларга мувофиқ ривожлантириш бўйича бир қатор чора-тадбирлар белгиланган.

“Ичимлик суви таъминоти ва оқова сувларни чиқариб юбориш тўғрисида”ги Қонун лойиҳасининг мазмун-моҳияти билан “Қорақалпоқсувтаъминоти” масъулияти чекланган жамияти Амударё тумани филиали бошлиғи Санжар Муратов таништириб ўтди. Қонун ичимлик сувидан фойдаланиш билан боғлиқ барча масалаларни тартибга солишга хизмат қилади.

 Йиғилиш давомида “Ўзбекистон Республикасида тиббий-ижтимоий хизматлар тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартишлар киритиш тўғрисида”ги Қонун лойиҳаси ҳам кўриб чиқилди.

Шундан кейин “Кўп квартирали уйларни бошқариш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун лойиҳаси тўғрисида туман Уй-жой коммунал хизмат кўрсатиш бўлими бошлиғи Ботир Атабиллаев маълумот берди.

 Таъкидланганидек, мазкур Қонуннинг ҳаётга татбиқ этилиши натижасида коммунал хизмат кўрсатиш соҳасида, шу жумладан кўп квартирали уйларни сақлаш ва ундан фойдаланишда қонун бузилиш ҳолатларини олдини олишга ҳамда аҳолининг хавфсиз яшашига шароит яратиб берилишига эришилади.

Йиғилишда Ўзбекистон Республикасининг “Солиқ кодексига ўзгартиш ва қўшимчалар киритиш тўғрисида”ги Қонун лойиҳаси билан туман Давлат солиқ инспекцияси бошлиғи Айдос Сейитов таништириб ўтди.

Шундан сўнг, “Ёшларга оид давлат сиёсатининг ҳудудларда амалга оширилиши бўйича рейтинг тизимини жорий этиш тўғрисида”ги Сенат Қарори ижроси юзасидан Ёшлар ишлари агентлиги туман бўлими бошлиғи Сардор Исмоилов ахборот берди.

 Ахборотда таъкидланганидек, Ёшлар муаммоларини маҳаллабай механизм асосида тизимли бартараф этиш бўйича “Ёшлар баланси”ни шакллантириш, “Ёшлар дафтари”ни юритиш ва “Ёшлар дастури”ни амалга ошириш бўйича муҳим йўналиши белгилаб олинган.

 Йиғилиш кун тартибидаги навбатдаги масала юзасидан туман ҳокимлигининг Болаларни ҳимоя қилиш масалалари шўъбаси мудири Жаҳонгир Холмуродовнинг ҳам ахбороти тингланди. Маърузада болаларни ҳимоя қилиш борасида туманда амалга оширилаётган ишлар ҳақида батафсил маълумот берилди.

 Йиғилиш иштирокчилари кун тартибида кўриб чиқилган масалалар юзасидан ўз фикр ва мулоҳазаларини билдирди. Шунингдек, ўзларини қизиқтирган саволлар билан мутасаддиларга мурожаат қилиб, тегишлича жавоблар олди.

Туман ҳокимлигининг Ахборот хизмати.