YoShLAR OʻRTASIDA MINI FUTBOL BOʻYIChA DXX BOShLIGʻI KUBOGI MUSOBAQALARINING TUMAN BOSQIChI GʻOLIBLARI ANIQLANDI

Maʼlumki, aprel oyida Oʻzbekiston Respublikasi Davlat xavfsizlik xizmati kubogi uchun sportning mini futbol va futbol turlari boʻyicha musobaqalarga start berilgan edi.

Mazkur musobaqalar Amudaryo tumanida ham yuksak saviyada tashkil etildi. Jumladan, 5-aprel kuni Chordara mahallasi hududida joylashgan sunʼiy qoplamali mini futbol maydonida Davlat xavfsizlik xizmati boshligʻi kubogi uchun musobaqalarning ochilish marosimi oʻtkazildi. Ochilish marosimida Amudaryo tumani hokimi Sultonboy Yoʻldashev ishtirok etdi va musobaqada qatnashuvchi jamoalarga omad tiladi. Shuningdek, musobaqaning ochilish marosimida Davlat xavfsizlik xizmati tuman boʻlimi rahbari, sektorlar rahbarlari,  hokim oʻrinbosarlari, Sportni rivojlantirish boʻlimi, Yoshlar ishlari agentligi Amudaryo tumani boʻlimi, Bolalar-oʻsmirlar sport maktabi va Amudaryo tuman Madaniyat boʻlimi masʼullari qatnashdi.

Musobaqalar 7-aprel sanasida Yangiobod va Olmazor mahallalari hududidagi sunʼiy qoplamali mini futbol maydonlarida davom etirildi. Unda tumanimizdagi 1-sektorga qarashli mahallalar mini futbol jamoalari oʻzaro bellashdilar. Musobaqada jami 120 nafar sportchi yoshlar qamrab olinib, musobaqa yakunida Nazarxon ovulining yosh mini futbol jamoasi 1-oʻrinni qoʻlga kiritdi va keyingi bosqichga yoʻllanma oldi.

Shu kuni Yangiobod mahallasi hududida joylashgan matematika faniga ixsoslashgan maxsus maktabning sunʼiy qoplamali mini futbol maydonida 2-sektorga qarashli mahallalar sportchilari jamoalari oʻrtasidagi mini futbol musobaqalar ham qizgʻin bahslarga boy boʻldi. Mazkur musobaqada sektor hududida yashovchi 170 nafar yoshlar qamrab olindi. Musobaqa yakunida Farovon mahallasi jamosi 1-oʻrinni egalladi va keyingi bosqichga yoʻllanmani qoʻlga kiritdi.

Davlat Xavfsizlik xizmati boshligʻi kubogi musobaqalari 8-aprel kuni Doʻstlik mahallasi hududidagi mini futbol maydonida doʻstona va samimiy ruhda davom etdi. Unda 3-sektorga qarashli mahalla jamoalari oʻzaro kuch sinashdilar. Musobaqada sektor hududida yashovchi 120 nafar yoshlar qamrab olinib, yakunida Kuyuk koʻpir ovuli sportchilari jamoasi keyingi bosqichga yoʻllanmani qoʻlga kiritishdi.

Musobaqalar 8-aprel kuni Yangiobod mahallasi hududida joylashgan matematika faniga ixsoslashgan maktabning sunʼiy qoplamali mini futbol maydonida davom ettirilib, unda 4-sektorga qarashli mahallalar mini futbol jamoalari oʻz mahoratlarini namoyish etishdi va musobaqada jami 80 nafar yoshlar qamrab olindi. Qizgʻin bahslarga boy oʻtgan musobaqa yakunida Boʻston mahallasi jamoasi 1-oʻrinni egalladi va musobaqaning keyingi bosqichiga yoʻllanmani qoʻlga kiritdi.

Musobaqlarning tuman final uchrashuvlari 27-aprel kuni oʻtkazildi. Qizgʻin va murosasiz kechgan musobaqalar yakunlariga koʻra 1-oʻrinni Boʻston mahallasi, 2-oʻrinni Kuyuk koʻpir ovuli, 3-oʻrinni Farovon mahallasi jamoalari egallashdi.

Boʻlib oʻtgan musobaqalar yakunida Amudaryo tuman hokimi oʻrinbosari Mahmud Shermetov, sportni rivojlantirish boʻlimi boshligʻi Gʻulomjon Qurbonboyev, Yoshlar ishlari Agentligi Amudaryo tuman boʻlimi boshligʻi Sardor Ismoilov va boshqa masʼul tashkilotlar rahbarlari ishtirok etib, sport turlarining ommaviyligini oshirish va yoshlar oʻrtasida sogʻlom turmush tarzini targʻib qilish borasida belgilangan vazifalarga toʻxtalib oʻtdilar.

Musobaqalar yakunida gʻolib jamoalar tashkilotchilar tomonidan diplom va qimmatbaho esdalik sovgʻalari bilan ragʻbatlantirildi.

Risolat IBRAGIMOVA, amunews.uz jamoatchi muxbiri.